| ||||||
城 市電訊（1137）創辦人、曾幾何時有「電訊魔鬼」之稱嘅域奇．王維基，為咗令公司更上一層樓邁向國際化，好早之前已經宣佈退居幕後領軍，務求洗去個人色 彩，但唔知係咪個市場get唔到佢呢個message，搞到仲係公司Chairman嘅佢，要喺自己本年報度，以Q&A形式整番個《主席訪談》， 重申自己唔會賣咗一生心血，仲相信城電會繼續發展落去，最終成為百年老店，認真唔講得笑。 前提係電盈除牌 華華覺得佢直情係想 挑戰老大電訊盈科（008），點解？因為域奇話，集團未來發展方向好清晰，「到2016年成為全港最大的新一代網絡供應商……」明顯係講畀對家八號仔二少 （李澤楷）聽。至於管理層點解有咁大轉變？「我們是一家基建公司，不會接受他人的收購意見，這個集團屹立不倒，比我和另一位創辦人（佢表哥張子建）的生命 時間更長，因此要建立系統確保……」咁又係，唔係個個好似六叔咁百幾歲人，長命之餘仲做緊CEO！域奇又話，要喺2016年做到香港No.1，係一個「宏 大驚險大膽目標」。即係咁，若果對家二少真係用四個二銀錢一股成功私有化電盈，咁城電就有機會取代電盈做「香港百年（上市）老店」，實現域奇嘅願望。 董事個個加人工 至 於話「宏大驚險大膽目標」嘛，講真，呢樣嘢就點都未追到二少嘞，一時賣盤一時賣資產，衰咗之後又話私有化，郁吓都幾百億上落，呢方面域奇仲有排向二少學 習！其實又唔止公司文化成功嘅，睇睇今年年報，喺環球金融海嘯下，佢哋成個董事局個個都有人工加，呢的咪叫成功囉！李華華 [email protected] | ||||||
| ||||||
由小賭王何猷龍做主席嘅香港上市公司商會，今年第二屆搞「香港公司管治卓越獎」。據大會講，今年遇着金融海嘯，參加嘅公司少咗。 攞三分二獎稱霸 咁 都好正常，咁多嘢要應付，仲邊得閒去比賽爭獎吖。照咁講，係咪冇咁受海嘯影響嘅企業，先至有「閒情」參加呢？睇番得獎名單，都可能有啲頭緒，因為9間得獎 嘅公司，6間嚟自內地，佔咗三分之二，包括建行（939）同神華（1088）等（見表）。咁好多人都話，受金融海嘯影響最細嘅國家會係中國，咁呢份名單係 咪已經畀咗答案大家呢？小賭王話，呢啲時勢，正可以睇到間公司嘅公司管治係咪做得好，尤其近排香港以至全球多間金融機構同公司陷入困境，其實呢啲公司只要 建立健全嘅公司管治架構，佢哋嘅問題有部份可以及早解決喎。 08年公司管治卓越獎名單 主板（恒指成份股）建行（939）、神華（1088）、工行（1398）、平保（2318）、中海油（883）*主板（不包括成份股）中鐵（390）*其他主板及創業板葉氏化工（408）、佐丹奴（709）、瑞安建業（983）*評委嘉許 | ||||||