【馮仁昭四圍超】公司合約未解決天堂鳥經理人插鄭紹康違規
1 :
GS(14)@2016-09-17 17:33:05陳浩源資料圖片
自稱「天下第一關」嘅鄭紹康呢排被圈中人輪住圍插操守問題，繼蘇永康、洪卓立、林柏希明寸暗嘲後，MK組合天堂鳥（BOP）經理人公司都加入戰團，質疑鄭紹康有違行規，關公災難陸續有嚟！
■天堂鳥喺Ig多謝鄭紹康邀請出席活動，被經理人公司創富文化集團副總經理陳浩源轟涉違約。
■鄭紹康前晚喺上環同友人打冷，心情靚靚冇受近日是非影響。
接Job貼相
事關天堂鳥同經理人公司創富文化集團發生合約糾紛，公司喺今個月2日發聲明重申天堂鳥只可透過創富文化接工作，點知，喺今個月7日成員Lincoln同Gordon喺社交網貼天堂鳥同鄭紹康合照，分別留言多謝鄭紹康邀請出席活動，似乎有人當天堂鳥經理人公司嘅聲明冇到！創富文化集團副總經理陳浩源接受電話訪問表示：「咁大間公關公司理應知道行情，有乜嘢藝人可以邀請、乜嘢藝人唔可以邀請，佢咁做已經有違行規，呢個係職業操守問題。」陳浩源仲話公司已經發信畀鄭紹康，但對方未有回覆：「我哋會交畀律師處理，相信法律係公正嘅。」前晚同友人去上環尚興食飯，醫飽出嚟摸摸肚笑晒嘅鄭紹康，噚日回應天堂鳥事件表示：「當收到律師信，我哋會交畀律師處理。」另外，張惠雅（Regen）新歌《慶祝》MV搵咗天堂鳥成員Tyrese做男主角，Regen噚日喺商台讚Tyrese好靚仔、跳舞又好。撰文：馮仁昭
來源:
http://hk.apple.nextmedia.com/entertainment/art/20160916/19771921