ZKIZ Archives


周一嶽 摣正嚟做 大戰私家醫生有排打 中環客

來源: http://hkcitizensmedia.com/2017/02/21/%e5%91%a8%e4%b8%80%e5%b6%bd-%e6%8f%b8%e6%ad%a3%e5%9a%9f%e5%81%9a-%e5%a4%a7%e6%88%b0%e7%a7%81%e5%ae%b6%e9%86%ab%e7%94%9f%e6%9c%89%e6%8e%92%e6%89%93/

周一嶽 69歲退退嚇休,竟然重出江湖,做友邦保險高層,大家都以為,佢應該好似啲退休政府高官咁,搵啲hea嘢嚟做,點知周一嶽一上場,就要搞醫療保險保費改革,友邦保險出咗封信,話照腸鏡果啲小手術,除非有合理解釋,否則就算喺私家醫院做,都只會計日間醫療中心嘅費用。成班醫生心諗周一嶽咁玩法,會賺少咗,立即開記招話AIA無良。

講真,依家周一嶽只不過摣正嚟做,稍為知道香港醫療制度多少少,都唔會覺得班私家醫生有道理。

喺美國、歐洲呢啲醫療保險幾乎係必需品嘅國家,其實好少醫生立亂送病人去醫院做埋啲腸鏡、割白內障呢啲,唔駛喺醫院完成嘅手術,因為留院一定貴,個個醫生都唔計成本claim到盡,你估搞醫療保險係開善堂咩,咁樣只會羊毛出在羊身上,保費唔合理咁上升。所以一般嚟講,究竟點計數先合理,一方面睇個客買乜保險,有啲人有錢買豪華plan,咪喺醫院做定診所做都無分別,但啲公司corporate plan, 或者一般市民自己買果啲plan,其實係要保險公司同醫生大家傾清楚一個又能合符 accepted standards of medicine,但又最平嘅費用。美國甚至大家就照住medicare個網站係點定,大家跟住政府嘅手冊做,唔好煩。

但依家香港醫生係乜嘢態度,依家香港雙方無一個標準,定義果啲手術或者服務係唔係一定病人需要,係由任由私家醫生開價,咁搞點可能有收費水平合理嘅保險,結果咪人人都走曬去醫管局嘅醫院迫餐懵。所以周一嶽以佢嘅豐富經驗,佢做手術經驗唔會比醫學會班友少,目的就係完成佢未完成嘅醫療改革任務,理順番個醫療費用水平,至少私家醫生要開張單,都俾啲道理嚟,唔係依家好似黑箱咁,當人係羊牯。

蔡堅當然想大家退保AIA,因為只要AIA出現退保潮,其他保險公司就唔會學AIA咁玩,所以好睇消費者企邊一邊。但講真,依家香港私家醫生繼續咁樣玩無透明度嘅收費,長遠都係有問題,如果呢次大家可以好似美國咁,有個公認嘅標準量度收費,同埋醫療方案內容,咁都會三方三贏。唔通成棚人迫公立醫院,班私家醫生又會有著數咩。

PermaLink: https://articles.zkiz.com/?id=236969

Next Page

ZKIZ Archives @ 2019