ZKIZ Archives


滙豐朝八晚十捽死員工

1 : GS(14)@2011-10-24 22:25:06

http://m.sharpdaily.hk/detail.ph ... 4104&category=daily
《爽報》上星期報道咗獅子銀行上演現實版《奪命金》,管理層狂捽員工sell產品。有滙豐中人來函畀爽仔,叫小弟幫手反映更多佢哋嘅慘況。署名「亡命小金子」嘅讀者話,家陣滙豐個個都患咗「星期一恐懼症」,係乜嘢病嚟?不如大家自己睇吓封信就知道:
吳爽
爽仔,你好:
早幾日我哋同事講起《爽報》報道嘅「奪命金」,都唔知幾大快人心,報道講嘅係灣仔分區,已經未係最慘喇。我o依家喺北角分區,公認係最癲嘅分區,朝早08:00不在話下,晚上22:00至係慘慘慘。
同事壓力大 心臟病發亡
所謂嘅培訓到晚上10點真係常常發生嘅事,以前一個月交一至兩次projection,之後每星期,o依家係每日問住。
銀行咁多產品,每樣都話要培訓,口口聲聲話work life balance,但其實心理都平衡唔到,朝8晚10,仲邊度有work life balance呢?早前我哋分區都有同事因工作壓力大而心臟病瘁(猝)死,而因為壓力而失眠,的確大有人在。
o依家我哋已經患咗星期一恐懼症,放假之後要重回殘酷現實,好多人星期日晚都瞓唔着。有家室嘅同事更可悲,以我為例,o依家根本冇時間同家人食飯,老公雖然體諒我,但係人始終有脾氣,佢試過喺仔女面前畀說話我聽,話我做嗰間銀行24小時營業,我喺銀行紮營過夜,唔使返屋企㗎喇!
唉,我做咗滙豐差不多廿年,試過捱到甲狀腺生瘤,做手術割咗,醫生叫我唔可以畀自己咁大壓力,o依家好驚復發。唔通要好似《奪命金》個何韻詩咁夾帶私逃,先可以擺脫厄運?
亡命小金子上
2011年悲秋
2 : 200(9285)@2011-10-24 22:30:04

我哋分區都有同事因工作壓力大而心臟病瘁(猝)死

太古分行也‧
3 : GS(14)@2011-10-24 22:33:13

當唔當人是人
4 : 草帽(1253)@2011-10-24 22:38:53

2樓提及
我哋分區都有同事因工作壓力大而心臟病瘁(猝)死

太古分行也‧


自己友?
PermaLink: https://articles.zkiz.com/?id=276365

超市霸權 捽死小商戶

1 : GS(14)@2011-11-03 20:59:00

2011-11-3 NM
連鎖店阿信屋平售可樂惹起代理太古集團不滿,下令加價。本刊報導事件後,十萬網民聲討太古,公民黨要求提交到立法會層面討論。但有代理踢爆,李嘉誠控制的百佳(同系的屈臣氏),以及牛奶國際旗下的惠康(同系的萬寧),才是逼太古出手的幕後黑手,受害者除了阿信屋,還有近年崛起的連鎖超市佳寶及家興超市! 百佳、惠康一邊操控價格,剝削小市民;一邊壓搾供應商,他們忍氣吞聲,不敢得罪超市霸權。阿信屋事件之後,各界發覺不能再忍,群起攻擊,本刊走訪藥房、街市、雜貨鋪,發現小商戶以奇招突圍超市霸權。


剛過去的週末,港九新界的百佳超市,到處人頭湧湧。八罐裝可口可樂大特價,買兩盒$40.9,仲送六包裝陽光檸檬茶。「嘩!真係好平,除開每罐先$2.5(注:每罐$2.56)!」抱着兩大pack可樂的師奶興奮得大叫!不但百佳的可樂「至抵價」創新低,惠康在週五也大賣廣告,八罐裝定價$22.7,表面看貴過百佳,但買兩盒有九折,盛惠$40.9,售價竟「巧合地」與百佳一模一樣,且同樣送六包裝檸檬茶! 兩大超市不約而同「賣大包」平售可樂,平均每罐可樂的定價較阿信屋的「封殺價」$2.7還要平﹐但與兩大超市合作多年的供應商就直斥「超市惡霸」,爆料指這是超市「闊佬人哋」的慣技!該代理說:「超市要做特價,就要屈供應商補貼特價貨品的差額,就連贈品都要貼埋,超市毛利根本無少到,仲可以大賣廣告促銷,何樂而不為!」 市場佔有率達八成以上的兩大連鎖超市,合共有超過五百間分店,一直利用賤招,霸佔市場,就算大如太古集團一類跨國企業的供應商,為免得罪大客,也得就範,「今次太古明顯係代罪羔羊,超市眼紅阿信屋嘅可樂賣得平,又話要開到九十間,怕搶生意,先透過太古向阿信屋施壓,強迫提高定價,利用市場優勢操控價格,百佳惠康成日用呢招,但無人好似阿信屋咁,敢嘈之嘛!」一名知情的供應商說。

佳寶家興都受害
這名供應商曾代理一隻罐頭食品,同時供應給新崛起的平價超市佳寶,以及出名「夠惡」的百佳,結果被百佳詐型︰「嗰隻魚罐頭,超市賣$16,佳寶賣$10,百佳見到,即刻傳咗兩個電郵過嚟,話點解佳寶賣咁平。」他見百佳「問罪」,不敢怠慢,要求佳寶「賺多啲」加價至$12.6,但佳寶拒絕。這位供應商為免得罪百佳,惟有夾硬提高佳寶的批發價︰「我將批發價加到成$10,佢無可能賣得番$10,結果佳寶無再入呢隻罐頭。講真,對我哋嚟講係損失,但超市咁惡,好難硬碰。」除了佳寶,同樣以平突圍、在屯門起家的家興超市,也遭封殺,家興老闆曾向傳媒控訴,指出售的杯麵,因定價太平被針對。不願公開身份的供應商說:「我聽過百佳叫供應商簽約,規定佢哋取得的批發價要全港最低,你諗吓,佢哋入貨要最平,贈品要供應商俾埋,但零售定價就貴過人,仲要唔俾對手賣平過佢,人哋薄利多銷都唔得,要封殺,你話幾霸道?」超市夠惡,就連被喻為罐頭大王的李廣林亦不敢輕言得罪,「佢哋入貨,又要攞優惠,又要贈品又要折扣,你唔肯就範,就無生意囉!」

全城力撐阿信屋
「我知道有市民發起罷飲,其實太古夾喺中間都好難做,但要行業健康發展,我希望爭取自由定價。」零食店「759阿信屋」老闆林偉駿因為不屈服於太古集團及超市,拒絕將可樂的零售價提高,結果太古拒絕供貨。上星期,本刊報導了阿信屋的遭遇,結果換來全城力撐,阿信屋這個星期,每天都人頭湧湧,生意大升。 為撐阿信屋,有市民在社交網站Facebook開設了「撐759阿信屋 罷飲太古可口可樂香港旗下產品」及「我相信可以召集20萬位反對超市壟斷的香港人」群組,前者在短短幾日已經有達八萬人支持,更發表公開信,譴責超市壟斷市場,要求訂立《公平競爭法》。公民黨立法會議員梁家傑亦已經講到明會將今次事件提交立法會討論,總之就要聲討超市霸權。

賤招一:巧立名目賺到盡
超市要賺到盡,還有很多招數。事實上,一隻新產品要在超市「上架」,就要先付「入場費」,行內人指,入場費視乎你的產品放在幾多間超市,「每間店收五百,六十間都三萬啦,三隻產品一齊上架,就要成十萬,捱到第一年,之後每年要按營業額俾回佣,又要供廣告基金,每年三、四十萬無走雞,超市點樣宣傳,你無權過問。」知情人士謂,超市要求代理簽訂「不平等條約」,超市攞貨,半年後才找數,若貨品滯銷,所有貨品全數退回。換言之,超市入貨,變相零風險零成本。
「我哋批發嘅Unit Price個個都係一樣,但萬寧同屈臣氏就會用好多唔同名目攞折扣,一時又話要trade discount,一時又話要special discount,總之就係要減到超低價,如果我哋唔肯減,佢哋就要脅話唔攞貨。」一名日用品批發商向本刊大吐苦水,他多次欲言又止,又多番要求本刊保密他的身份。「千祈唔好寫我代理乜嘢產品,如果因為咁俾佢哋封殺,我連粥水都無得食!」
不過,這兩間連鎖店偶爾亦會推出一些平得令人咋舌的產品作招徠。上週六,萬寧將一隻染髮水的品牌定為「破底價」。「呢隻染髮水,我哋向代理入貨都要$64,但佢哋破底價竟然係$59.9,我估呢個價錢,可能係萬寧成本價,或者係賺幾毫子。」在北區經營藥房廿多年的超叔爆料說。
「其實我哋好多行家都會吼萬寧破底價產品,佢呢個價錢仲平過我向代理攞貨,我哋好多行家都有買定十萬八萬嘅萬寧禮券,用來掃貨。」超叔直言萬寧變相成為批發商賺多筆。

賤招二:搶品牌
兩大超市見某些品牌銷量好,又會自行聯絡生產商,要求生產同類產品,換上自家品牌。百佳的超值牌、佳之選、金御膳,以及惠康的首選牌、特惠牌、御品皇,都是這樣衍生出來。眼見兩大超市大咬,忍氣吞聲的供應商力謀反擊,據知,現時部分供應商計劃聯合起來,自行營辦超市,由供貨到零售一條龍,希望脫離魔爪。 市場全面傾側,經濟學家關焯照表示情況令人擔心,「超市市場佔有率達八至九成,已接近壟斷局面,中小企要突圍,只能在價格上競爭,依家人哋賣平,你唔俾,結果佔有埋嗰部分,想唔成為霸權都唔得。你睇阿信屋事件之後,兩大超市賣嘅可樂齊齊減價,就反映競爭的好處,問題係如果再無競爭法,保障市場可以公平運作,遲早只剩兩大超市,市民無選擇,只能買到五、六元一罐可樂,一定後悔莫及。」

擺脫超市魔爪街市大抽獎冧師奶
「中咗包紙巾都開心啦,唔使錢,又有用!」剛玩完街市幸運輪,拿着獎品的黃師奶笑着說。位於粉嶺的雍盛苑街市,是領匯的外判屋邨街市。街市及商場(私人承包)商會主席林國良表示,超市狂搶街市客,為留住班師奶,也要搞搞新意思。 「依家啲大型連鎖超市,梗有一間喺左近,好多仲賣埋濕貨,根本同街市無分別,競爭好大,唯有定期搞大抽獎,你喺豬肉檔買嚿肉,或是喺菜檔買斤菜,都會收到優惠券,集齊兩張,即抽即獎,送啲米、公仔麵、汽水同冬菇,好受主婦歡迎。」林說。捉緊師奶貪小便宜的心理,以送禮力抗超市霸權,結果,街市的人流亦有所上升。

專揀細代理
「唔可以只幫襯一個代理入貨,好似太古咁,同佢哋入貨仲貴,反而我哋搵到啲細拆家,向細拆家買可樂,批發價仲可以平啲。」由沙田婦女會主辦的社企超市「家家好」經理鄧潔美不諱言,不少大品牌的代理都會受超市掣肘,規定批發價,所以若果要入平貨,就要繞過代理,在市場上找一些低調的細「拆家」入貨。細「拆家」做不到大超市生意,所以亦不會受超市壓力。今年通脹加劇,「家家好」的生意反而飆升了四成。鄧潔美說,「家家好」薄利多銷,平均每件產品只賺一元,反而超市的貨品隨時標價高三四成,街坊識格價,自不然會走來幫襯。不過,其實鄧潔美亦心知能夠在超市霸權下生存的原因︰「或者係因為我哋係社企,所以超市無打壓我哋!」

直銷米向超市說不
「我哋有自己品牌,但順發嘜,只會直銷,唔會喺超市上架,唔使俾咁多乜費物費,啲嘢賣平啲,客人開心,我哋又唔使受超市氣,賺到三餐,雙贏!」有四十幾年歷史的順發行,專做糧油食品批發,被喻為本港直銷米大王的老闆鄭國榮直言,唔想受超市氣,所以從沒有去敲超市的門。「我哋呢啲小本生意,毛利唔高,唔通賣包順發牌豆豉,都要俾幾萬蚊入場,根本行唔通!」唯有靠自己打出新血路。順發行共有四間分店,總店設於油麻地的一條小橫街,像六、七十年代的老牌雜貨店:人手入豆豉,到處堆滿白米、罐頭。但原來,毫不起眼的小店,出售的白米行銷到美加,本港不少社團及學校,都向這間港產小店訂米。訪問之時,記者撞見自稱格價專家的楊太︰「呢度啲米泰國直接入口,同級數嘅,比超市平,近排水災,啲米仲會再貴,趁未加價前,諗住嚟買定囉!」「我哋之前做開批發,批啲米、麵粉呀去酒樓,後來金融風暴,好多食肆倒閉,成日賒數,為求生存,先搞車隊去屋邨上門推銷,貪立即收到錢嘛。」無心插柳,竟成為今天的核心業務。自設車隊送貨:泰國香米、順發牌廁紙,兼賣午餐肉、罐頭湯……零售價平均平過超市一至三成,吸引大批屋邨客人,甚至連半山豪宅,都有熟客捧場。 鄭國榮慶幸一早看清大超市的「真面目」,寧願「單打獨鬥」,好過寄人籬下,「做呢行咁多年,識好多代理商,佢哋對超市敢怒不敢言,好多做到要貼錢,最後轉埋行。如果我將順發嘜喺超市上架,可能結果都一樣!」鄭說。
PermaLink: https://articles.zkiz.com/?id=276464

Next Page

ZKIZ Archives @ 2019