七年之癢 譚小環魚蛋檔捱世界 老公圓方偷食拖女
1 :
GS(14)@2015-06-18 14:36:322015-06-18 NM
07年，譚小環與做保險的蔡強榮（Eric）結婚，婚姻即將踏入第八年（9月11日），人前依然恩愛，老公更打本給她開小食魚蛋檔及手工藝教室，唔使再為每月萬八蚊死守大台，錫到老婆燶。看似美滿，但原來小環始終難敵「七年之癢」魔咒，最近有讀者向本刊爆料，指在保險公司做高層的Eric，經常趁老婆睇檔捱世界，四出偷食嗒女；上星期五（12/6），本刊發現Eric約了一名索女，到偷情熱點圓方食lunch，兩人更忍唔住在大庭廣眾下，公然拖手玩扯衫尾，態度曖昧。贏了魚蛋，輸了老公的譚小環見到偷食罪證時，皺晒眉，一臉委屈。
慣食散餐
外間一致認為，前港姐冠軍譚小環嫁得好，住何文田半山壹號過千呎豪宅，老公又連環打本給她搞魚蛋檔和手工教室，做老闆娘唔使再為雞碎咁多，留守大台捱更抵夜，生活得好幸福。
只不過，在保險公司擔任區域總監的蔡強榮（Eric），其實並非對婚姻忠誠的愛妻號。據知，Eric性格大男人，要話晒事，唔鍾意老婆太多聲氣俾意見，只要唔高興，就會黑晒口面，小環經常要睇住老公面色做人。
本刊最近收到讀者爆料，指小環老公經常瞞住老婆偷食嗒後生女。因為職業所需，見客大條道理，小環亦不以為然；玩完識返屋企的他，通常只選擇食散餐，免得留下手尾。
「Eric唔係靚仔，亦係人都知佢結咗婚，不過仲有好多女會黐埋去，可能因為佢成日都揸住啲靚車出入，一時波子一時法拉利，加上把口talk得，出嚟飲飲食食又捨得使，好多女都俾佢呃到，以為佢係有錢佬。
「有女埋身梗係食得唔好嘥！佢係公司高層，唔使成日返公司，佢老婆要睇住兩間鋪頭（魚蛋檔和手工教室），以為老公去見客，點知其實係約咗啲女出去玩！不過Eric玩得好高明，食快餐，永遠唔會長時間同一個。」爆料者說。
港姐殺手
現年50歲的蔡強榮（Eric），任職保險公司區域總裁，在保險界打滾多年，於業內頗有名氣。年薪逾百萬的Eric 07年同譚小環結婚，二人在尖沙咀洲際酒店筵開37席，百萬婚禮完全唔使揼心口搵贊助。Eric名下持有五間公司，現居市值千六萬的何文田半山壹號豪宅，名下有多部戰車，包括法拉利、保時捷，架架車牌自定，派頭十足。與小環結婚前，曾先後與梁佩瑚及向海嵐傳緋聞，被稱為「港姐殺手」。
冇戴婚戒
上星期五（十二日），本刊發現Eric約了個身形高『身兆』、身材均勻的年輕索女到九龍站圓方食lunch，為了方便吸煙，二人選擇坐餐廳露天位，成餐飯Eric的視線幾乎冇離開過坐對面的索女，又不時流露冧笑。記者留意到，當日Eric手上沒有戴上結婚戒指，其間提到自己有幾本事時，忘晒形的他更加講到手舞足蹈。相反，索女的戒備意識高得多，不時四圍望，似是怕被人發現。但Eric卻毫不擔心，甚至主動攞起索女的貼身用品，Line公仔Brown按摩棒來按摩。Hea到下午三點，二人才埋單離開。只見女方突然從背囊攞出口罩，又戴上眼鏡，盡量遮得就遮。沿途經過商場，Eric毫不避忌手多多，幫女伴掃頭髮，又出手拖住對方；但索女明顯有所避忌，拖一陣就縮開，經過較人多的地方，更會刻意彈開，保持距離。
勝地
位於九龍站的圓方商場，因為人流唔多，是名人「尋活動」的熱門「勝地」。
周嘉儀約會已婚男
無綫最索主播周嘉儀，被踢爆搭上已婚高層許方輝後，去年與已婚男在圓方Madam S'ate西餐廳撐枱腳。
彭順攬啜Liddy
去年彭順被發現背住老婆李心潔，與後生22年的僆模Liddy到圓方拍拖睇戲，更肆無忌憚又攬又錫。
黃長發搭富商三奶
09年，鞋王富商三奶李姿霆（Karen）被爆搭上港男黃長發，富商一怒下收車收樓，事件更鬧上法庭。姊弟戀曝光後，二人繼續冇有怕，拍拖到圓方睇戲行電器店買電腦。
只顧氹女
等攞車期間，因為有大柱位可以遮擋，兩人才變成連體嬰，Eric從後身貼身黐實索女，又拖住對方的手仔談心，玩玩吓更玩埋掹衫尾，全心投入氹女的他，完全沒有理會過自己已是人夫身份。之後，兩人一同坐上Eric的白色七人車離開。Eric背住老婆風流快活，但另一半小環卻為了生意事事親力親為，尤其是魚蛋檔，成功在銅鑼灣打出江山後，小環積極打到九龍，在尖沙咀搵鋪再開多間分店，忙到根本冇多餘時間睇實個老公，難逃七年之癢魔咒。經過了解，發現Eric偷嗒的索女，本身原來也有個正印男友。星期日（十四日），索女同正印男友到啟德郵輪碼頭拍拖，難怪當日與人夫Eric圓方密會，索女如此步步為營。
緊張睇相
本週二（十六日），小環坐住老公Eric用來接送索女的白色七人車，到葵涌一座工業大廈，見到記者及被問到有關老公偷食索女，她面色一沉，但仍幫口撐老公。「我同老公關係好好，其實好多時佢約啲單身女仔都係公事，因為佢做保險，我覺得唔係問題囉。（對佢好有信心？）有……有信心o架。」小環說。之後記者將Eric同索女的親密照，小環緊張望實相片，又不停逐張相仔細睇完又睇，皺晒眉再強裝微笑。「呢個女仔我唔識呀！我未見過佢，不如你哋等我了解吓先。唔……我睇完啲相我覺得好正常，公事上面佢好多時都會同我講嘅，佢咁多同事，我冇可能會識得晒，你哋唔好嚇我啦！」
總有個喺左近
男人要「偷食」，就算另一半管頭管腳，一樣有本事見招拆招，更何況，做嘢冇時冇候的娛圈人妻，更加睇唔實。
李心潔
07年與邦民女Kama到佐敦爆房斷正的彭順，去年再次背妻偷食，當街拖住小三Liddy又攬又錫，事件哄動全港，事後彭順即棄小三，撲返馬來西亞補鑊，最終亦得李心潔原諒。
趙頌茹
與周永恒結婚四年育有兩女，去年老公被踢爆搭上助手Ruby，加上經常發生家暴，令阿Yu徹底死心帶埋兩女返娘家，周永恒不但冇悔意，還多次出言恐嚇。
郭可盈
老公林文龍07年與內地女星董維嘉合作電視劇《朝九晚五》撻着，09年，林文龍向經理人汪子琦承認背妻偷食的電話錄音被公開，郭可盈開記者會挺夫，並反控汪子琦勒索，罪成入獄。未幾，郭可盈更忽然有喜，生女保住婚姻。
Selina突宣佈離婚老公上年拖女唱K係導火線？
1 :
GS(14)@2016-03-06 03:14:30台灣組合S.H.E.成員Selina，於10年10月在上海拍劇意外燒傷，當時張承中對佢不離不棄，被公認為好好先生，大家都祝福呢對金童玉女，佢哋睇嚟好似好幸福咁生活。不過，Selina昨晚突然喺facebook宣佈同老公張承中離婚消息，疑似係有導火線，被指喺舊年3月，張承中喺台灣被影到同索女、男性朋友，一齊唱K。當時同辣妹唱KTV一事，有損張承中嘅好好先生形象，張承中之後都澄清「我非聖人，跟大家一樣會吃飯喝酒唱歌」，喺事件被爆出之後，Selina以行動支持老公。幾日後，被影到Selina同老公手拖手晒恩愛，似乎有啲「此地無銀」。但只係事隔一年，Selina就宣佈同張承中分開，唔通當時佢地嘅婚姻，其實已亮起紅燈？！張承中帶索女唱K，可能只係其中一個導火線啩！
來源:
http://hk.apple.nextmedia.com/entertainment/art/20160305/19517592
關楚耀拖女搵食全程拍DV
1 :
GS(14)@2016-04-12 18:16:11■關楚耀同Miu喺餐廳門口影咗一輪先入店幫襯。
【大坑】關楚耀（Kelvin）同韓籍女友Miu Kim熱戀，得閒就孖咇出動搵食，佢哋日前就拍拖去到大坑開餐。近日氣溫回暖，Kelvin着住背心短褲，一身街坊裝，而着住紅色背心短裙嘅Miu就全程拎住部手提DV機周圍拍，影吓食肆外貌同啲餐牌，最後佢哋入咗間小店，好隨意咁揀咗門口高枱位坐，Miu叫男友幫佢影相又拍DV，跟住又要求調位，用唔同角度影，兼邊食邊影，Miu仲七情上面，好似拍緊YouTuber片喎！食飽之後，女友拎住外賣，二人行返屋企。採訪、攝影：徐錦池、畢紹基
來源:
http://hk.apple.nextmedia.com/entertainment/art/20160412/19567102
收粗口留言 彭羚拖女撐林海峰是但噏 扮喊寸問責官員
1 :
GS(14)@2016-07-09 07:02:11■林海峰置身於以香港舊屋邨做背景的舞台上，並顯示收到粗口留言。
林海峰（Jan）一連六場「是但噏廣東話」昨晚在紅館開鑼，舞台以三面台設計，背景以最貼地的香港舊屋邨做背景，有巴士站，有拉了閘的舊街舖，捧場嘉賓除了老婆彭羚及囡囡林泳和林清，財爺曾俊華、鄭欣宜、草蜢都是座上客。
Jan前晚拍片唱「I want you8點3」提醒觀眾會準時8時15分開場，但昨晚最終8時半Jan才現身，不過Jan一上台便講不停，現場觀眾反應十分熱烈。
■林海峰昨晚再開棟篤笑「是但噏廣東話」，已是其是但噏系列第六個騷。
■彭羚帶同囡囡林泳來捧老公林海峰場。
■林海峰昨晚頭場演出，吸引大批觀眾捧場，座無虛席。
將粗口改靜音模式
Jan由05年至11年分別舉行過五次「是但噏」系列talk騷，粉絲「餓」足五年，昨晚開場大電視先貼出一段WhatsApp內容，Jan說是朋友聽完收音機播他的《I want you廣東歌》後好感動，WhatsApp給他留言，由於留言內容有粗口，Jan讀出來時自行將粗口改為「靜音模式」，內容是「Wah dxx頭先聽收音機聽到：I want you廣東歌發千分熱千分光，為你照前方。喺車度喊X左，多謝晒。」
Jan接着笑說：「我其實有好多唔同嘅作品，從來冇人話聽完我嘅歌話會感動，淨係有人話有衝動想揼我，但呢首歌有人WhatsApp我話感動，有乜咁感動呀，我心諗正常吖，因為我哋而家生活喺一個唔正常嘅年代，所以有少少正常嘅嘢，我哋都會覺得好感動！」
■蔡一傑（左）與蔡一智連同友人前來欣賞林海峰演出。
■欣宜一身便服打扮到來捧場。
寸強國人隨街大便
之後Jan扮邊喊邊說：「將來有一日你可能會見到一個問責官員做錯嘢，佢終於肯問責道歉喇！好感動呀！嗰個差人終於肯伸張正義捉賊喇，好感動呀！我朋友買咗層樓，間房可以放到張床呀！好感動呀！仲有，公司話以後OT可以補水呀！好感動呀！」除外，Jan又寸盡強國人隨街大便及歌手參與內地節目，只唱兩句，台下觀眾便開始哭，又說要成立「廣東話苦主大聯盟」由他做主席。採訪：曹家誠攝影：沈健程
來源:
http://hk.apple.nextmedia.com/entertainment/art/20160709/19687378
Yumiko拖女家庭樂梁浸浸未玩夠
1 :
GS(14)@2016-07-12 22:08:10【學行萌爆】■梁浸浸開始學行，前日在西貢周圍走，似乎未玩夠。
【西貢】鄭希怡（Yumiko）女兒梁子柔（梁浸浸）已經15個月大喇！自從出世後，她的人氣已經比媽媽更強勁，不過Yumiko一點都不介意，還經常為梁浸浸上載最新的成長圖輯，大家眼見梁浸浸一日一日快高長大，見證她越來越可愛得意！早前有不少廣告商向梁浸浸招手，但Yumiko仍然要細心考量，只怕囡囡年紀小太辛苦。曾經講過不怕輸在起跑線上的潮媽Yumiko，除希望囡囡開心健康地成長，還要給梁浸浸一個快樂的童年，她果然是身體力行。日前Yumiko與家人帶着愛女梁浸浸一起去海洋公園遊玩。
【共敍天倫】■Yumiko與丈夫帶着囡囡梁浸浸，準備上車離開。
■日前Yumiko與家人帶梁浸浸到海洋公園遊玩。互聯網圖片
■剛剛學行的梁浸浸新車落地，榮升車主。互聯網圖片
囡囡揸靚車
前日Yumiko與丈夫梁學儲（Andy）又帶着梁浸浸，還有外公外婆，現身西貢海鮮街的停車場，大約下午2時許，他們一行人到泊車處取車，萌爆的梁浸浸開始學行，她拖住爸爸好似小企鵝一樣，左搖右擺行過馬路，由於他們的座駕好近馬路邊，Andy要拖着梁浸浸在馬路上車，梁浸浸意猶未盡，似乎還未玩夠，仍然想周圍行來行去，一班大人只好圍住她，再抱她上車。另外，潮媽Yumiko繼續為愛女po相，剛學行的梁浸浸已經收到一架新車，成為車主，Yumiko昨日在Instagram貼相，留言：「新車落地，你要快啲考番個車牌，一齊去遊車河啦！小心駕駛，一路順風！」採訪、攝影：潘冠恩、畢紹基
來源:
http://hk.apple.nextmedia.com/entertainment/art/20160712/19690589
趙世曾拖女同事睇戲
1 :
GS(14)@2016-10-24 04:21:01卓能集團主席趙世曾於前日本港受到強颱風「海馬」吹襲，掛8號風球期間，偕同內地女伴Dora十指緊扣現身圓方商場的戲院，欣賞湯告魯斯（Tom Cruise）主演的《烈探狙擊：誓不回頭》（Jack Reacher：Never Go Back）。散場時，Dora默默緊隨在趙世曾身後，但由步出戲院開始，趙世曾一隻手拿手機講電話，另一隻手就拖實Dora。當發現遇上記者時，Dora顯得有點尷尬，即時鬆開對方的手兼彈開。當邀請兩人影合照時，怕醜的Dora再度避開，不願上鏡。趙世曾被問到Dora是否新女友時，他即時否認：「唔係，佢係我深圳同事。」採訪、攝影：羅慧敏
來源:
http://hk.apple.nextmedia.com/entertainment/art/20161023/19809278
【爆相爆片】戒夜蒲目標結婚吳浩康拖女茶記擦蟹
1 :
GS(14)@2016-10-30 14:35:56■吳浩康早前在訪問中表示已屆適婚年齡，拍拖都以結婚做目標。資料圖片
現年33歲的吳浩康（Deep）過往夜蒲「闖禍」，早前在訪問中聲言要修心養性，表示：「搬早啲去玩，咁就冇嘢。」他的感情生活多姿多采，先後跟胡定欣、莊思敏拍拖，其後戀上鍾舒漫更到談婚論嫁階段，但因婚前被爆連媾六女，婚事撻Q，分手收場。Deep早前承認有新戀情，並謂適婚年齡，拍拖都以結婚做目標。
【有商有量】■吳浩康和新歡到茶餐廳撐枱腳，先在門口慢慢揀蟹。讀者提供圖片
【十指緊扣】■吳浩康和女友拍拖未夠半年，非常恩愛。
【並排而坐】■為免食相被看到，吳浩康和女友選坐背着門口的卡位。
穿街坊裝
拍拖未夠半年的Deep，被讀者施小姐透過本報的「爆相爆片」，分享了大前晚孖新歡在順利邨撐枱腳擦蟹。施小姐形容Deep的新歡樣子平凡，是年逾30歲的熟女。當時穿上T恤短褲街坊裝的Deep，孖女友到一間門口有養海鮮的舊式茶餐廳開餐。Deep與新歡手拖手，先在門外水缸揀了幾隻蟹，然後便入餐廳坐卡位，兩人排排坐，齊齊背着門口，未知是否怕被看到食相。
「幫我好多」
記者昨日致電Deep，他大方承認和女友撐枱腳：「同我食飯嗰個女仔係我女友，呢段時間幫我好多。」Deep近日忙着替ViuTV拍歌唱節目及打理唱歌學校工作，他很感謝女友在身邊支持。他未有仔細講及兩人拍拖的甜蜜事，他說：「都係生活點滴，我同佢知就OK，至於將來，我哋會好好去經營一下先。」並自爆與女友因為跟同一位唱歌老師而認識，那麼女友可會出道做歌手？Deep說：「佢自己諗喇，如果佢需要support，我就會幫手，暫時我都係做番自己工作先。」採訪：非非、皓騫
來源:
http://hk.apple.nextmedia.com/entertainment/art/20161030/19816708
李秉憲撇妻公然拖女
1 :
GS(14)@2016-12-03 04:42:46■李秉憲前晚相約同鄉聯誼，影合照更公然拖實一名女子。微博圖片
前日逾五十位韓星先後襲港，為韓國盛事「MAMA亞洲音樂大獎」做準備，眾韓星抵港後都有出動消遣，韓片《寒冷黑金》男星李秉憲就與其他同鄉韓孝珠、韓智敏、朴基雄、李智雅及秋瓷炫等，與寰亞老闆林建岳等人見面，有現場人士更上載合照到微博。照片中未見李秉憲的太太李敏貞同場，反而影大合照時就公然與一名女士親暱手拖手，似乎不擔心激嬲李敏貞。據了解該名女士是三星集團的孫女，同時亦都是韓國CJ集團的老闆。同樣前日已抵埗的張赫就在Ig上載與工作人員飲嘢的照片，又留言：「With my team」。女團TWICE前晚到尖沙嘴食晚飯，回酒店時因太多傳媒及粉絲追訪，座駕險撞到前面的吸糞車。
■前日已抵埗的張赫（左）與工作人員出外消遣。互聯網圖片
EXO包冚壓軸抵港
男團EXO前日完成日本騷後，昨午才壓軸抵港，有近300粉絲接機，粉絲以尖叫聲歡迎，並爭取時間拍下偶像抵港一刻，不過EXO就匆匆上車，趕忙到亞博館進行綵排。採訪、攝影：黃曉程、梁繼光、盧妹、陳俊強
來源:
http://hk.apple.nextmedia.com/entertainment/art/20161203/19853336
陪Shopping做阿四林德信拖女見家長 吳正元勁冧
1 :
GS(14)@2017-07-02 14:19:30【金鐘 融入家中】■林德信日前約媽媽吳正元及女友Candace去金鐘逛街，三人行感情好好。DV圖片
林德信與松岡李那分手一年多後有新歡，與同樣愛瑜伽的Candace Poon撻着。林德信沒有像以前跟松岡拍拖般避忌，實行與女友密密見，日前先帶身穿熱褲襯跌膊衫的Candace去中環開餐，翌日再帶她見媽媽吳正元，三人行到金鐘shopping。Candace與未來奶奶相處融洽，而林德信就做阿四拎戰利品兼做柴可夫司機。
現年32歲、林子祥與前妻吳正元所生的大仔林德信，與日籍舊愛松岡李那分手一年多，女方早前在安以軒的夏威夷婚禮上，與太陽文化娛樂老闆周焯華（洗米華）一攬傳緋聞成為新聞人物，不過洗米華隨即發聲明澄清，明顯想劃清界線。作為松岡的前度男友，林德信的感情生活就比較實在真實，近月已有固定女友Candace。Candace同樣愛瑜伽運動，二人不時被影到甜蜜拍拖，關係打得火熱。
【中環 食客吹水】■林德信日前與Candace在中環撐枱腳，更與認出他的鄰座食客打招呼。
【紙巾墊住】■Candace甚有儀態，進食時會用紙巾墊住。
【做柴可夫】■醫飽肚後，林德信駕車送女友回家。
做孝順仔
日前，本報就連環兩日直擊林德信與Candace在港島區拍拖。當日傍晚大概6時許，林德信與女友Candace現身中環九如坊，二人去了一間越南餐廳撐枱腳。Candace身穿熱褲襯跌膊衫，外表屬熱情如火型，林德信與她選了開揚的窗口位坐，似乎沒有戒心，不怕被人發現拍拖，相對他以前與松岡拍拖時長期避忌玩低調、前後腳的作風截然不同。林德信撐枱腳期間，鄰座食客認出他並打招呼，林德信禮貌微笑，表現零架子。他和Candace各自叫了一碗麵及小食共享，現場所見Candace雖然外形惹火，但食相甚有儀態，夾餸時會用紙巾墊住，二人吃了約45分鐘便結賬離開。拍拖不夠24小時，林德信和Candace翌日再次合體出動，Candace以短裙打扮示人，今次更有林媽媽吳正元做電燈膽，實行三人行去金鐘太古廣場shopping，即是女友已融入家中。林德信一心二用既做孝順仔，又做體貼男友，其間兩女結伴去洗手間，林德信就耐心等候，邊等邊玩手機，而他警覺性甚高，不時往商場上下層周圍望。
【金鐘 廁外玩機】■女友與媽媽去洗手間時，林德信企定定靜候玩手機。DV圖片
■林子祥與前妻吳正元育有大仔林德信及細女林德懿。資料圖片
■林德信與母親吳正元（左二）關係密切，曾一起上內地真人騷節目。資料圖片
讓出前座
作為未來新抱的Candace似乎與男友媽媽相處甚融洽，三人入了時裝店Zara掃貨，更有收穫，買了一大袋戰利品。林德信負責做阿四幫手拎，之後就齊齊去停車場取車。上車時，Candace相當識做，讓林媽媽坐司機位旁，而林德信亦充滿風度幫女友開車門，然後做柴可夫駕車離去。採訪、攝影：吳耀輝、孔志豪
來源:
http://hk.apple.nextmedia.com/entertainment/art/20170702/20075737
Next Page