ZKIZ Archives


英雄哥拒拉埋天窗 陳淑莊甩拖另有原因

1 : GS(14)@2010-11-06 15:33:53

http://www.eastweek.com.hk/index.php?aid=9229

陳淑莊同尖沙咀京菜館仙宮樓老細叢鐵飛(綽號「英雄哥」)拍拖八年,英雄與美人(在芸芸女議員中,算唔錯啦)本是絕配,奈何情海多變,世事無常,上周傳來消息話兩人已平靜地分手,回復自由身,一段情緣畫上句號。
陳淑莊與英雄哥(右圖)平靜分手,表面泰然,卻難掩內心黯然。她說分手原因是工作太忙,這並非故事的全部。

莊姐被記者追問,笑笑口證實此事,全冇沮喪神色。佢話甩拖皆因自己太忙,開會由朝到晚,禮拜六日又要出席居民大會、地區活動,就算抽到時間食餐飯,都要不停手覆電郵、回電話,講唔到幾句嘢,咁樣拍拖好難有情趣,但食得鹹魚抵得渴,議員生涯就係咁,惟有忍痛斬纜。
對英雄哥為人,莊姐評價十分正面,話佢好人到極,對自己無微不至,一直默默在背後支持,所以大家分手仍是好友,以後會繼續來往。
莊姐這個版本都有幾分真實,但並非故事的全部,一位同佢熟絡嘅人士,向小弟透露箇中另一原因,值得向各位補充。
該位人士指,兩人今次分手早在五、六月時開始醞釀,到八月間協議分手,為免畀人大做文章,大家「夾」過統一口徑,話做議員工作忙,相處時間少,所以感情轉淡,冇第三者亦冇其他問題。實情係:莊姐覺得大家已拍咗八年拖,自己年紀亦唔細(今年三十九歲啦),繼續「拖」落去始終唔踏實,所以提出不如正式拉埋天窗,給女孩子一個「家」。但英雄哥講到婚姻大事,就十分猶豫,好唔想從此被困,莊姐知道情花冇希望結果,冇名冇份拖落去都唔係辦法,不如各行各路算了。

為人好玩 唔想從此被困為何英雄哥抗拒結婚?知情人士分析,佢老哥接老竇間京菜館經營二十幾年,在娛樂圈中交遊廣闊,同唔少大明星稔熟玩埋一齊,而他性格豪邁,為人好玩,經常在菜館甚至屋企共敍把酒共歡,有時亦會去楊其龍的 dragon-i之類蒲點蒲吓,如果同莊姐結婚再度成家立室,呢種生活方式好難繼續,都仲係做番孤家寡人好啲,可能基於呢個顧慮,英雄哥最後對莊姐之提議婉而拒之。
英雄哥結過婚,早與太太離異,個仔都廿幾歲,或者曾經滄海難為水,唔想重複不快經歷,所以對結婚有保留。對莊姐嚟講,女仔到呢個年紀想settle,亦是人之常情,奈何對方另有想法,冇計啦!
雖然感情遇挫折,莊姐近日未見低沉,依然忙到隻狗咁埋首議員工作,睇嚟唔算係重傷。佢私下同好友講,暫時放下心情,唔想即刻搵另一男友替代,反正緣去緣來,緣份要嚟就嚟,毋須強求。
人生如戲,戲如人生,想不到愛做戲的陳淑莊,在現實中成為「情變」的主角。
2 : 龍生(798)@2010-11-07 15:04:59

狠角色!
坐艇8年, 毅然止蝕!
PermaLink: https://articles.zkiz.com/?id=271448

Next Page

ZKIZ Archives @ 2019