📖 ZKIZ Archives

忘不了的，歲月也不會蠶食。二十 年前，民主黨明日之星吳明欽患癌去世，今天卻是民主黨最衰敗的時期，今屆立法會直選，當年這位拚命三郎以血汗換回來的新界西地盤全部失守。昔日戰友李永 達、陳樹英墮馬，張文光、李華明退下。已是銀行界高層的吳明欽弟弟吳明德為圓哥哥遺願，決以餘生力撐民主黨，協助改革，希望民主黨能重新振作。

這次立法會選舉宣傳，民主黨主席何俊仁身邊，總站著一位四眼、面善的中年男子，他駕車接送何俊仁、派單張等，記者覺得這個人好像年幼時見過的一個立法會議 員吳明欽。九月九日投票日，他正忙於替何俊仁拉票，默默幫助民主黨，記者查問，發現原來他正是吳明欽弟弟吳明德，而碰巧身旁民建聯助選團在其身邊以粗口圍 攻他。

明星早逝

吳明欽是誰？對八十後來說，印象模糊。但對民主黨來說，吳明欽是一個傳奇，亦是民主黨高峰期（民主黨前身稱為香港民主同盟，由民協及太平山學會組成，九四 年連同匯點合併成民主黨），他是當年一位政治明星，本在屯門佛教沈香林紀念中學任老師，因樣貌斯文、官仔骨骨，當年曾有人叫他做「政界梁家輝」。競選時， 即贏盡屯門、元朗紮根幾十年的鄉事派議員，成為區議會、區域市政局及立法局三料議員，更成為當年全港票王，當年懂以較激方式抗議。何俊仁憶述，吳明欽非常 實幹，常埋首地區工作，「他當時住杏花邨，經常坐最早班地鐵搭到荃灣再轉巴士，佢就喺地鐵改簿、讀書，非常勤力。每日就搭最後一班車返屋企，工作好辛勞。 有時啲街坊會叫『阿sir'留喺佢哋屋企瞓。佢瞓幾個鐘又去做嘢，六點幾企喺巴士站嗌咪。」辛勤地為弱勢社群爭取權利，反對越南難民留港；查科大超支事 件，逼到當時的行政局成員老前輩鍾士元解畫。可惜，在一九九二年，前途無限的吳明欽不幸血癌去世，當時與他是同事兼戰友的陳樹英、李永達、黨友何俊仁、張 文光、李華明、李柱銘等傷心不已，對民主黨的衝擊極大。昔日站在哥哥身邊、和他一起落區、協助拉票的吳明德，打擊更大，兄長去世後，他更抑鬱了一年。

接哥哥棒

今年剛好是吳明欽逝世二十年，吳明德說終於衝破心中障礙，決以餘生繼續走哥哥的路、爭取平反六四，希望和哥哥一起圓民主夢。「我同明欽年紀好近，只差一年 半，感情好好，佢走咗對我衝擊好大。過去二十年，我唔敢去佢俾人打嘅大興邨，亦唔敢再去辦事處。因為佢走咗，我努力肩負起四個家庭嘅經濟負擔。好似思諾兩 兄妹咁，我唔想佢哋有所缺乏。直至今年，我見佢哋都長大成人，亦係時候要做番三哥未做嘅嘢。」採訪當日，為配合記者拍照，他和吳明欽女兒吳思諾再踏進民主 黨位於大興的辦事處，看到辦事處內仍擺放著吳明欽照片，辦公室內的職員見到他們亦非常開心說：「明德真係好似阿Sir，思諾咁大個，好似媽咪！」吳家有七 兄弟姊妹，吳明欽排第三、他排第四，小時候全家偷渡來港，過著極清貧生活。大哥、二哥為了讓年幼弟妹可升學，沒有讀書便在工廠工作養家，吳明德和吳明欽由 小三起，便往工廠當童工幫補家計，「三哥個人好鍾意讀書，亦從來無脾氣，佢做得好慢，我要做埋佢嗰份，我係咁喺度鬧佢，性格剛好相反。」

救命恩人

「明欽對我嚟講，唔只係哥哥，仲係我嘅救命恩人。」吳明德說，縱使哥哥經常勸他讀書，但吳明德當年卻非常反叛，更做了童黨，終日流連街頭，在他十八歲那 年，因得罪其他仇家，一天突然遭人以牛肉刀追斬，「我記得當時係咁走，最後一刀斬面，我用手擋咗。結果一共中咗十三刀，當時個肺都斬穿埋。我搭的士去到 QE（伊利沙伯醫院），已經昏迷，後來啲人同我講，明欽當時即刻去醫院求醫生醫我，但啲醫生以為我係壞人就唔理。但明欽無放棄，搵外國人校長幫手出聲，先 肯推我入去做手術。我足足住咗九十六小時ICU。」吳明德說，他醒來見到吳明欽憂心忡忡地坐在他身旁，只說了句：「細佬，你乖啦。」就在這一刻，吳明德深 受哥哥感動，發奮努力讀書，升讀大學、入銀行工作，希望將來學哥哥一樣，貢獻社會。後來，吳明欽任區議員時，落區工作，明德均在旁幫手，競選時，笑言因義 工不夠便用分身術。「咁我就著西裝、戴眼鏡，同明欽分別去唔同地方拉票。遠睇好多街坊都唔覺o架！」直至今日，認識吳明欽的人，還是會覺得他們有七、八成 相似。「今年我同仁哥去屯門拉票，有個婆婆真係好驚訝咁走到我面前，望完一次又一次，跟住好驚咁走咗去。後來聽民主黨嘅助選團講番先知，個婆婆以為我係明 欽，以為見鬼。」他笑說。

爆拒收五十萬賄選被打

一九八五年十月，吳明欽任屯門大興邨區議員時，曾經在辦公室被數名大漢毆打。事隔多年，吳明德透露，原來當年有鄉事派曾打算在屯門新墟將其中一條斑馬線改 在某酒樓門口，「當時區議會只差一票就可通過。佢哋開會前喺廁所同我哥哥講，話俾五十萬佢，叫佢投贊成。但明欽拒絕，佢同我講話想用五十萬買我？五億都唔 會買到我。」最終動議沒通過，吳明欽也和吳明德說怕被人打，結果幾天後，果然被人在辦公室毆打。今天，酒樓沒有了，斑馬線沒有了，新墟旁邊也變了過萬蚊一 呎的瓏門。

何去何從

談及民主黨，昔日匯點創辦人劉迺強、張炳良、港同盟劉江華、陳偉業，從前哥哥身邊的戰友，相繼離開，由朋友變敵人。何俊仁、吳明德非常唏噓。就連當年和明 欽一樣，在葵青區做地區工作三十多年的李永達，也緣盡立法會。吳明德在開票當日車何俊仁往點票現場途中，激動得喊起來，在這低谷時扶助民主黨，吳明德還是 希望用其商界累積的數十年經驗、專業知識，協助民主黨追上潮流及更新，樂觀相信民主黨能重振當年黨威。

何俊仁坦言，自從他和張文光、劉慧卿步入中聯辦傾政改方案後，過去兩年，民主黨不斷成為狙擊對象。不過，政改方案的妥協，何俊仁說並非民主黨自把自為，原 已和其他泛民議員傾過及有了共識，才由民主黨作代表。「當時大家認為咁爭取到多啲，我哋就去傾。不過入去中聯辦係我哋。但我哋係低估咗大家嘅情緒，而且喺 過去兩年都揮之不去。」

這次選舉，民主黨已非昔日泛民龍頭大哥。「我哋可以變回中黨、細黨，呢個世界可以一夜變大黨，亦可以一夜變細黨，只要大家依然相信（理念）就去做，無得 驚！如果廣場式談判，一傾就係出賣，好似吾爾開希咁一傾就被炒，只會有更多衝突。」民主黨不再做龍頭？何俊仁說：「民主黨都做咗二十幾年啦，無話次次係你 話事o架。我哋得六席，公民黨都六席，可以由其他黨試嚇去傾囉，俾其他黨去做囉。」

二十年來的人事變遷，將來怎樣走下去？泛民可否整合？他無奈地說：「我嘅年代已經過去。泛民整合，相信好困難，但大家應該係時候坐低傾傾……我哋要反思， 佢哋（較激民主派）好有創意，識得用新媒體，好似放飛機都係一種方法。學民思潮也會壯大，可能將來有乜事，要用廣場式政治去傾解決，變成一種浪漫式政治， 要十萬人坐喺度。」

記者上週執衣櫃找到一件爭取二○○七○八年雙普選的T恤，今天是二○一二年，香港人爭取二○一七年普選，可以點傾？「試過一次，推前一步咁傾，社會覺得唔 重要，甚至有啲負面。之後點傾，真的要重新評估。我哋唔會再引起high conflict。泛民要好小心咁去談判，民主黨已經無咗能力主動去談判……」要傾普選，就連何俊仁都說：「而家社會轉變成咁，嚇嚇要involve曬所 有人咁傾。都可能要用廣場政治去解決。每次十萬人坐在政總門外say no。」