ZKIZ Archives


扮老定?

當官方媒體一致抹黑索羅斯、當所有焦點都放到香港可以力保聯匯、當大家以為不會重演97年金融風暴。

大和大淡友賴志文,今日喺開市埋位講左,其實係放錯焦點。

「不需要任何炒家狙擊、不需要索羅斯、這些錢都是有條件要走。」

無錯、Kevin同意聯匯不會撤,但代價財金官員有無同大家講清楚?

根本性既問題、唔係有無索羅斯,而係一旦資金外流,唔好話三千億美元一次過走晒,走一半、甚至一千億美元,香港都好大件事。

更大問題係內地傾向「落閘」、過去在港借的美元債點心債,多達6000億美元,如果一邊錢返唔到來,同一時間資金又流走,銀行真係會出事!

係咪危言聳聽?

值得比較下而家同97金融危機分別。其實又有幾多人真正記得、97年到底發生左咩事?

挾息?
股災?
打大鱷?
呢啲通通都係08年金融風暴其中一部分,不過對香港來講、最沉重代價,其實係負資產,同埋長達68個月、螺旋式下跌既通縮周期。

所以當樓價比高位雖然回落大約一成、但去年第四季已驚現近一百宗負資產,創四年新高時,其實已響起警號。

過去一星期、多間大行都比較、本港同九七年金融風暴期間差異。高盛就提出、區內仍然充斥不明朗,對於聯匯制度,高盛一如其他大行、指金管局捍衛聯匯毋容置疑,但香港經濟及金融情況最終亦受聯匯制肘,潛在三千億資金外流風險是繼續存在。

雖然大家都認同,以金管局強化聯匯制度、以至國家後盾實力,今時今日香港抵禦大鱷能力,何止改善千百倍,索羅斯要挾港紙? 恐怕已成絕響。

瑞信陶冬亦不斷提醒、歷史正在重演,特別是當港元回穩、股市回升,以為寒冬過去、雨過天晴之際,其實而家可能先係開始。

面對今次挑戰、若只懂得歸咎有炒家沽空港元,這種人是看不到「Big Picture」!

硬要說而家底子好、想想當日,97風暴來臨前,失業率跌至2.1%,GDP迫近6%,到底而家比當時好喺邊?

當日最致命、是樓市由高位大幅下跌65%,拖累租金急跌50%,連帶工資調整,CPI一度跌至負6.1%、賤物鬥窮人。

美林提出、現時住戶負債佔GDP比重67%,高於歷史平均50%,當中70%屬於物業按揭,香港人實在慣了低息,一旦拆息如美林預期飊升至兩厘,加上樓價真係好似預測咁跌兩、三成,風險唔可以話細。

阿爺當面提點、要你守著香港底線,防範金融風險,陳總裁四度出口術,甚至「矛到」搬市盈率8倍做擋箭牌。

老行尊話、有危機感,幾時都好過只識講「唔好自亂陣腳」,扮老定!
PermaLink: https://articles.zkiz.com/?id=184718

Next Page

ZKIZ Archives @ 2019