📖 ZKIZ Archives

呉大使扮工中

#我認我無聊 #提防影射認明真身



&&&&&&&&

【我主場】毛記腦細扮工全直擊林日曦　真．心話

1 : GS(14)@2016-01-23 19:27:22

■《100毛》老細林日曦面對「網絡23條」惡法逼近，仍然大無畏籌備第二屆毛記分獎禮。攝影：仇志德


《100毛》舵手林日曦，一張蒼白撲克臉生人勿近。因一個「毛記分獎禮」，忽然響朵，以為這名80後從此不可一世，但原來世事不可盡信表面。本報記者日前由朝到晚近距離訪問他，他一時大談自己和《100毛》其餘兩位掌舵人陳強和姚家豪（阿Bu），開會日日反枱，一時又肉麻細說太太蔡明麗（the pancakes）100分package，堅貼地。撰文：勞燕萍



講工作：兩位拍檔缺一不可

工字不出頭，現年35歲的林日曦7年前離開商台天比高，和陳強、阿Bu每人夾$2,000，創立「黑紙有限公司」，由原本3丁友規模，再演變成日後的《100毛》和現時擁有50多名員工的毛記電視。林日曦，是作家、填詞人、創作人，近年加多一個「腦細」銜頭。身份多多，但生活卻異常規律，他說：「我每朝習慣5點鐘起身睇fb同新聞，喺屋企寫完專欄，8點半返到公司開門準備開會。」雖然毛記有3個老細，但每次只有林日曦浮面，拍檔隱形，林日曦抵死說：「懶囉，懶低調唔鍾意見人囉！」三個廢青步入廢中行列，又共事多年，理應少火氣多默契，但事實剛剛相反，他說：「我哋唔算好好朋友，只係啱傾嘅合作夥伴，鬧交？日日開會都鬧，但就對事唔對人，我哋唔會投票，總之拗到最後睇吓邊個最先放棄，不過阿Bu次次都係最先放棄，佢就好似一支KY（潤滑劑）咁。而我哋鬧完交就算，轉頭傾閒偈又傾得好開心。我哋三個性格一凹一凸，好似砌積木咁，缺一不可！」



■（左起）林日曦與阿Bu、陳強由《黑紙》到《100毛》，嗌交嗌出好多鬼主意。資料圖片

■俞琤在廣播界德高望重，毛記分獎禮有幸得俞琤支持，令林日曦非常感動。資料圖片



俞琤現身眼濕濕


對於《100毛》路線不時與廣告客戶期望有分歧，林日曦早已設有底線：「我份人比較衝動，見親客都幾乎反枱，所以我唔會見客，阿Bu就成日笑笑口，啲客見佢最開心。Sales詐型，由佢囉，總之好笑就會講，攞咗條命先算！」毛記分獎禮，無疑是令《100毛》由小眾網媒步入大眾主流的一次分水嶺，對於商台前話事人俞琤，沒有現身商台叱咤頒獎禮，反而出席毛記分獎禮，俞琤畀足面，林日曦難免飄飄然：「哦！咁梗係勁啦，我覺得真係勁喎，佢（俞琤）係一個傳媒界咁勁嘅人，竟然肯嚟不等止，仲肯接受個獎。其實當佢覆我message話嚟嗰一刻，我已經眼濕濕！」



分獎禮劍指紅館


林日曦受訪翌日，「網絡23條」二讀通過，靠二創、惡搞的毛記，當日在facebook聲言「殺入死亡直路……」惡法逼近，但林日曦的回覆是：「照做！」訪問時他更向記者透露開始着手籌備第二屆「毛記分獎禮」：「陣間會同同事傾研究場地嘅嘢，紅館會申請，會展Hall B、C同九展Star Hall都會諗，或者亞博館，雖然好遠，但原來大家都唔介意……不過其實一年後好多嘢都唔同，可能到時一個人都冇……而家純粹只係落定book場。」





來源: http://hk.apple.nextmedia.com/entertainment/art/20160123/19463521

---

利字當頭：香港的扮工室政治

1 : GS(14)@2017-03-22 00:46:00

林鄭說曾俊華枱頭一份文件也沒有，卻換來了一句work smart秒殺，和一整晚的facebook洗版，引證了博弈的第一守則：「沒有必勝的把握，就不要出手。」當然，這場選舉，何謂輸贏，也要看制度的設計和輸贏的定義。我是悲觀主義者，相信制度決定結果；品客叔叔贏了民望，卻在小圈子要辛苦經營，最終要是落敗，建制派仍然可以說：「誰叫你們否決八三一？」見到嗎？公就我贏，字就你輸，這就是控制遊戲規則的優勢。由政治舞台大環境，到辦公室的小氣候，其實也是一理通，百理明。管理的藝術，不在於事無大小都要過問，而是構造出一個環境，影響身在其中者的行為。Richard Thaler和Cass Sunstein合著的《Nudge》，在2008年出版時曾經引起過不少相關討論，到Daniel Kahneman的《Thinking, Fast and Slow》更加是洛陽紙貴。只可惜，在控制狂話事的香港社會，甚麼道理也只是紙上談兵，講過算數。香港打工仔經常抱怨，說「扮工室政治」令到他們就算手上沒有工作，也要滯留在公司「扮工」。究竟工時立法，對改變環境有沒有幫忙？我可以大膽說，工時立法一定會帶來某種改變，可是我很懷疑，立法最終可否為打工仔「減辛」。反之，我可以見到，當工時變得僵化，在「扮工室文化」的影響下，最有可能出現的結果是每個人枱頭上都有大量文件，而每個打工仔都會向同事說：「你睇吓我有幾多嘢要做？呢啲嘢係你嘅份內事，不如你自己搞番掂佢啦。」「扮工室文化」之下，枱頭一份文件都沒有的人，會被視為hea做。嗯，說到這裏，可能大家也聯想得到，政府總部裏某些人的價值。又或者可以這樣說：「邊個喺度扮工？睇吓佢張枱咪知囉。」利世民
http://www.fb.com/leesimon.hk本欄逢周二、四刊出




來源: http://hk.apple.nextmedia.com/financeestate/art/20170321/19964642

---