ZKIZ Archives


戥腳戥到變「首富」


2015-10-08  NM

富豪埋堆講級數嘅;八十年代,李嘉誠、李兆基同鄭裕彤大家咁高咁大,好似細路仔咁,未夠班唔「侵」你玩o架,除咗係打「哥乎」嘅腳,仲一齊去到溫哥華世博會址發展地產,嗰度萬博豪園住宅群有另一個更親切名叫「李鄭屋邨」;呢班大孖沙衝出海外之際,仲開緊安達臣石礦嘅呂志和,旗下嘉華國際才上市無耐,即使十多年前,李嘉誠同呂志和清早到深水灣高爾夫球會打波,球會啲口痕友都話係陪誠哥打波「戥」腳咋。戥吓戥吓,時至今日,大陸媒體謂呂志和正在取代李嘉誠,成為香港政商新精神領袖喎,莫非真係十年人事幾番新?金融逍遙客:評估「17」價值

游走於中港台併購、私募投資的金融多棲動物,現為多間上市公司主要股東及董事

這個星期的八卦圈,較引人注目的項目非「17」直播莫屬。這個三個月前才由台灣娛樂界知名搞手創立的app,短短日子已吸引幾十萬用戶。逍遙客雖然早已接觸過中國YY、在直播、美麗約、暢聊,和鬼佬的tinder、Ashley Madison等等,此類專吸引宅男癡女的網上社交平台,但「17」就聽都未聽過。Stay curious是任何專業投資者必備的態度。草草翻了幾頁介紹「17」的PPT,與大部分曾接觸的創投項目比較,印象真是平平無奇。製作PPT之人不太專業,但一問估值,開價卻是「專業中之專業」:6千萬美金!近年聽慣不少項目都動輒數十億美金估值,普通投資者發夢都想着何時能投中一個諸如WhatsApp、Instagram、滴滴或小米的項目。聽上去6千萬,尚算是「相識於微時」的潛力項目,心中盤算着他日變成Instagram的春秋大夢。

但逍遙客本能地拿出計算機:報稱30萬用戶,每週增加5萬,先不論有水分與否,每個用戶叫價$200美元。比起facebook是天價,較Instagram的每個用戶$30也高出6至7倍。再慣性做個dual diligence,隨機找了個在「17」與Instagram都甚活躍的一個用戶,其在「17」上的followers及like數目,竟然是Instagram的十倍。這個簡單的比較已令逍遙客心中有了答案,原來整容已不再是醜小鴨的專利,在投資界更被發揚光大。能找到一個識於微時的投資項目不僅靠緣分,可能首先要懂得如何避開地雷,就如三萬元一呎去買天水圍的樓,能賺到錢是一種僥幸。

中環寸嘴:龍脷當方利

工廈大王楊耀松長子,是各大有名食肆之VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。

去澳門本來想幫襯吓福臨門,點知個廚返咗香港,去番Ritz Carlton入面嘅麗軒咯;嘩,打開個餐牌睇到方利英文譯做Macau Sole,即刻捉住個部長問,Macau Sole即係咩呀?吓,龍脷?大佬方利同龍脷差兩至三倍價錢喎,唔好兩條魚扁撻撻就以為一樣吖,搏大陸同胞唔識英文呀?呢度個廚喺香港做阿二,過咗大海就升做總廚,不過都係差啲,諗住澳門鹹魚出名,點咗份梅香鹹魚蒸上肉,試咗一啖彈番轉頭叫佢煎煎佢,啲鹹魚香味先出!唔係個侍應話呢度每個餸都有古講,呢個古我講番俾你聽喇!中秋前收到我聖貞德舊同學仔蔡冠琛兩盒月餅,用冬瓜蓉同藍莓、cranberry整,算係有啲同學仔心,咁健康值得表揚,不過佢非常低調,可能呢啲只係生意仔,細到費事理,唔似得我另一個同學仔美記個太子爺,啲月餅廣告鋪天蓋地喺地鐵站,呢啲就係有麝自然香咯!

有死雞執?

坐開勞斯萊斯的有錢佬,近日收到sales推銷問有冇興趣換車,可能有平貨執喎!話說舊年路易十三(577)呢間上市公司位主席史提芬洪(洪永時)向勞斯萊斯訂咗三十部車,為澳門路易十三酒店組建車隊,呢單交易稱之為勞斯萊斯汽車有史以來最大之單一訂單,預期出年交付;不過澳門賭業遇冷鋒,香港半島酒店都只係有十四部勞斯萊斯,sales恐防路易十三能否如期啃晒三十部,於是四出搵定客仔準備執死雞;不過小宗去馬交見到路易十三酒店個地盤依然興建得如火如荼;路易十三回覆話錢已俾晒,明年有車到,照睇死雞就冇啦,二手都有機。

本週熱話

本週一前特首曾蔭權被起訴,曾任行政會議成員的葉維義,本週二按捺不住向小宗話:「有嘢講!」他在曾出事後,和政商界朋友就此熱烈討論。「單嘢煲咗好耐,出消息(本週一)時我好震驚!第一條罪我唔方便評論。但第二條罪,話曾蔭權提議一個建築師授勳時,無申報曾幫佢做室內設計。呢條罪有幾嚴重呢?係咪好疏忽呢?當一個指控係好牽強嘅時候,我會覺得好莫名其妙!」他意有所指:「做人唔好咁刻薄。佢對香港都有貢獻,而家卻可能連長俸都無埋!咁樣社會上真係有才幹嘅人,係唔敢出來擔任公職。」


PermaLink: https://articles.zkiz.com/?id=166148

Next Page

ZKIZ Archives @ 2019