七級偽術：如果我幫政府做公關
1 :
GS(14)@2018-01-22 05:52:42事件發酵已逾兩周，似乎「雙鄭」此刻淨係諗住扮時運高，睇唔到仍然海量湧出的負面評論，同時爭取時間清理僭建遺痕，博負評早日die down，然後鄭若驊可以漸漸「進入角色」，唔覺唔覺就做番為香港維持法治的律政司司長。有冇咁順利？有冇咁簡單？就算劇情如願發展，揹住件蝕本貨，係咪對政府最好？首先，我會問林鄭當唔當自己係政治家，定係仲把自己定位為能吏。如屬前者，諗都唔使諗，應九秒九糾正之前盲撐鄭女士的重大政治錯誤，下手且要快狠準，出盡八寶，不惜親自下令找出鄭女士事前知情或事後隱瞞的鐵證，使橫手交予傳媒，並以之作為轉軚的下台階，以便盡快合情合理一腳把負資產送走，重拾所謂「開局好」的良好感覺。錯就梗係要認啦，記住，止蝕總好過越踩越泥足深陷。其實真係唔係講笑，邊個話你知反對勢力並不掌握上述黑材料，你唔採取主動，人哋先出你就會變被動。今天人家忍手，可能只是引蛇出洞，可能只係時辰未到，我係敵人都會等到關鍵一刻才出原子彈啦，此時此刻的寧靜，只可視作暴風雨前夕。何況即使目前鐵證並未出現，並不代表不會隨時出現。上手業主任何一個前員工、任何一個有份裝修的工人、屋苑的物管伙計……you name it，總之個個都隨時可正義上身站出來指證你。你的防線有幾穩，會否一朝露底，自己應心知肚明。難搵人補上，我知，但真係難唔過要市民相信這僅是「因公忘私」的無心之失，更加難唔過說服公眾知法犯法（仲要死口唔認）的人適合當律政司司長。個個特首都話要迎難而上，你今次何不身體力行。鄭女士個人仕途最低priority，林鄭作為特首的功過，香港人會否從此對特區管治死心，你不是無動於衷吧？彭瑪莉
來源:
https://hk.finance.appledaily.co ... e/20180118/20277806