ZKIZ Archives


債仔被捕 麥基:佢要洗pat 我好矛盾

2013-02-14  NM
 
 

 

上期本刊報導「金融老蠱惑 息誘麥基」,話前上市公司主席陳英鳴,以高息吸咗粵語殘片影星麥基嘅錢無還。文章一出,警方即刻做嘢,上週四喺灣仔拘捕一名五十七歲陳姓男子。小宗即刻打去搵陳英鳴,佢電話已飛去call台。而麥基則話自己開心又矛盾:「佢要洗pat pat(小宗按:大前提係被判罪成兼坐監),其實我都好矛盾,咁我嗰六十萬仲收得番嗎?」佢話搵緊律師商討對策。原來陳英鳴過去一直信誓旦旦還錢,但麥基每次同佢傾,佢都態度輕佻咁話:「我有二、三千蚊,要唔要吖?」有次麥基喺銀行門口等佢「還住十萬」,點知陳英鳴來到話:「哎呀,我只籌到一萬咋!」仲話:「你態度唔好,我又唔還住喇!」麥基次次被激到扎扎跳;債仔惡過債主,又一例證。本週圖片

白花油王子年年都喺維園擺檔賣吓白花油,今年仲喺攤位賣個人專輯,睇吓王子,揸住咁cute嘅福仔,都一副「唧」極唔笑嘅樣,似乎唔係好滿意銷量噃。(嚴寶權攝)

本週對峙

日方大波挑釁

東瀛防護相小野寺五典透露,一月十九日下午中國054型導彈護衞艦「溫州號」以火控雷達瞄準日本

驅逐艦「大波號」,雖然未有開火,但事不尋常云云。

以「大波號」出迎「溫州號」,究竟邊個挑釁邊個先?

即使開火,都唔怪得人嘅噃。

Give me a break平鑽充靚鑽

新年流流,最多春茗飯局,大家互相恭賀之餘,OL仲可以將身上嘅行頭,互相較勁,咁點樣可以平買靚鑽石?批發鑽石予Cartier、Dior、Tiffany的批發商LAZARE KAPLAN東南亞區董事兼副總裁李清輝,就教路話,同為最高級嘅D色,佢哋牌子嘅一卡價錢十八萬,零點九卡只九萬元,價錢差成倍!但肉眼點睇?佢自言做咗呢行幾十年,都分唔到。仲有,原來鑽石並非大粒淨色就叫靚,重點係夠閃。鑽石中D色為最貴,但揀到粒「cut得靚」嘅H色,望落分分鐘閃過同卡嘅D色,價錢又係平一截!要keep住鑽石夠閃,李清輝攞住隻五卡鑽戒話,用最普通的洗潔精加暖水浸,用牙刷擦吓啲罅,望落就閃閃令啦!

金管局出重炮

金管局去年尾話Hibor報價機制無問題,轉頭就被境外監管機構「溫馨提示」,指UBS就Hibor報價可能涉及不當行為。被人笑係無牙老虎,金管局就喺呢個星期、RBS被指操控Libor有結果前做嘢,並引用《銀行業條例》,首次將業界制定的操守準則作為法定指引;違規者,「釘牌」都有之。而Hibor日常運作及監管亦由銀行公會交俾財資會,讓金管局成Hibor的新管理人,「搣銀公柴」。銀行界人士話,金管局過去買大行怕,尤其獅子號,不但係發鈔銀行,細行嘅P(最優惠利率)都唯佢馬首是瞻,影響力大。金管局不時要派班職員巡查銀行,獅子號例以「資料機密」為由,指明非阿head級數嚴禁內進。今鋪金管局揸緊《銀行業條例》呢碌「重炮」,對銀行同新成立嘅金發局來說,絕對係下馬威!

樓市招「愈變愈辣」

市場一直流傳,政府會在上週五再出招打壓樓市,不過事實證明,流料歸於流料。咁究竟流言是如何形成的呢?前星期小宗從地產代理口中收到風,話政府有意效法星洲,對炒賣工廈徵稅。兩日後,facebook就傳出係對第二套住宅徵特別印花稅。再過多幾日,小宗收到whatsapp,話會加重買家印花稅、第三套房停造按揭、及第一季推一萬伙超長樓花期居屋等等,到上週五連改圖創作嘅假政府公告都出埋。呢單嘢,明顯係經紀想谷旺市之舉;但喺度奉勸行會成員,呢排別做物業買賣,免得政府突然出招,就步林奮強後塵矣。

金牙大狀講嘢練乙錚誹謗七百萬人

689出律師信指控練乙錚登喺《信報》篇鴻文誹謗佢。細閱全文,練教授其實係誹謗緊七百萬人。大家睇吓佢點講:堂堂一個香港特別行政長官候選人,得到「江氏紅」中聯辦的點頭去馬之後,是怎樣「斥之乞來」、「呼之不去」,怎樣誠惶誠恐,怎樣卑躬屈膝打哈哈擺和頭酒、最後得到黑道的百分百支持,神一樣替他撐住了比唐氏高的「民意」,讓當時的中聯辦領導得以「名正言順」抬他上位。各位,「民意」係乜呢?此又豈非七百萬人之意向乎?然而在練教授筆下,七百萬人原來並無陳寅恪所講「獨立之精神,自由之思想」,而是聽任黑道扯線擺布者,咁對七百萬人嚟講,又豈非絕大之侮辱?若然689要出律師信,都理應唔係以佢私人名義出,而係代表七百萬市民向練教授討回公道。不過,如果佢都識得咁做,佢又仲係689乎?

PermaLink: https://articles.zkiz.com/?id=44029

阿信屋林偉駿:我好驚衰!

2013-11-28  NM
 
 

 

近日,日本電影﹑新版《阿信的故事》,在香港上畫,勾起港人不少回憶。另一邊廂,名字取材自這套電影的零食店759阿信屋,亦在股市上演了一齣好戲。持有一百七十多間阿信屋的CEC國際(759),宣布進軍化妝品業,店還未開,觀眾,即散戶,已蜂擁入場,股價十日內爆升一倍,市盈率抽高至七十五倍。野心暴露,以對抗霸權口號起家的阿信屋,如今被斥是新的「阿信屋霸權」。一切吹捧﹑攻擊同時直指向主席林偉駿。這一次。鏡頭下的他,招牌笑容仍在,手心卻捏了一把冷汗。戲碼進入高潮,劇本卻開始失控,林偉駿和散戶一樣,最怕爛尾收場。

上週五晚上,林偉駿原定要出席電影《阿信的故事》首映禮,卻臨時甩底。記者再三提他,這次活動宣傳噱頭十足。「無辦法啦,做生意緊要。」他略帶無奈道,原來有兩個韓國供應商,當晚就要離港,他趕着和他們開會。自從宣布開設化妝品店Kawaii Land,林偉駿的壓力與公司的股價一同颷升。鏡頭外,他收起笑容道:「依家我同班同事都捱到胃痛,每日都睇住啲貨,今個星期又派多六個女同事去日本掃貨,加埋有九個人做緊採購,真係全民皆兵!」林偉駿擔心不無道理。由工業股變零售股再變炒股,七十五倍市盈率(P/E),較持有零食物語的四洲(374),以及化妝品股龍頭莎莎(178),分別高出四點七倍及一點四倍。負面消息接踵而來。有美資分析員指阿信屋利潤率只得百分之一點五,萬一供應鏈出現問題,隨時蝕錢,「阿信屋債務成四億幾,一年利息都要千四萬,比零食嘅利潤仲要高,如果將來加息,佢又唔加價,咁點算?」他強調,阿信屋的估值沒有實質的業務數據支持,股價隨時會坐過山車。面對種種質疑,林偉駿不再推銷員上身,反而自潑冷水,同時幫散戶降溫。

炒股

記:記者林:CEC國際主席林偉駿記:股價十日內爆升一倍,變成炒股,你開心還是擔心?林:(合起雙眼,神情凝重)平時好少睇公司股價,因為我揸住就唔會放。(註:林持股約七成)自從話搞化妝品,外界反應咁大,炒到咁高,我真係好大壓力。啲供應商見我賣零食賣到有啲成績,咪俾我賣吓凍肉,見凍肉賣到,咪俾我賣吓家品,再到化妝品。如果賣唔掂,人哋會以為阿信屋冇料到,以前累積嘅優良記錄會冇晒,仲邊有供應商肯俾貨我?邊有業主肯租鋪俾我?記:根據現時P/E,公司一三至一四年的盈利起碼要倍增,投資者才收貨。對此,你有沒有信心?林:(想也不想)阿信屋依家要賺嘅唔係錢,而係規模,目標係三百間分店。冇規模嘅話,供應商點會俾面?日本仔仲會「冧(林)生」咁叫你咩?當你有親呀?純粹因為我有一百七十間分店,仲唔使上架費。今年九到十二月,達到每月一億一千萬嘅營業額目標,明年第一季希望每月做到一億三千萬。日後規模再大啲,物流採購成本平啲,希望將利潤率提升到百分之二點五。

轉型

記:新開分店主攻千呎以上大鋪,街坊式零食店已無得做?林:(指着一枱零食)阿信屋賣貨靠量多及快,四、五百呎嘅鋪,擺得三、四百款貨,啲客入嚟買幾包薯片,買支汽水就走啦,生意唔會多。依家我哋每日都有十一個貨櫃嘅貨,要大鋪先夠位擺,市場焗住你去做大。來緊會執咗部分細鋪,新開嘅分店,起碼要兩千呎。明年主力做整合,唔會開新店,後年會主攻開微型超市,目標係三十間。記:由賣零食,到微型超市,甚至化妝品。做得太濫,風險大增?林:我都要為租金去諗,先踩過界,賣吓呢樣嗰樣。有人幫我哋改名,叫「佳寶阿信版」﹑「日本城冇電器嘅阿信版」﹑「家興阿信版」。呵呵,但我唔係「萬寧」,冇藥賣吖嘛!我希望以一間微型超市做中心,帶住幾間細鋪嚟做。根據該區需求,某啲鋪會做特色店,如凍肉鋪。係北角至灣仔嘅街鋪,未來一年會轉做廿四小時營業。

記:明年將有三十間鋪約滿,如何應付加租問題?為何不買鋪?林:大部分新租約都傾得七七八八,加得唔算多。係商場嘅分店,租金係用營業額分成計算,部分好生意嘅,交緊嘅租金基本已多過底租兩成。如果要加租,我會叫業主俾我賣多啲產品,之前佢受到超市或日本城嘅壓力,唔俾我賣咁多嘢,好似日用品只可佔鋪頭整體產品約百分之五。我有時都係偷雞,擺多兩個衣架,咁樣慢慢變。阿信屋依家有六間自己鋪,都係四、五百呎嘅細鋪,唔再買係因為太貴啦,唔想冒險!記:阿信屋貨種急增,如何控制入貨及存貨?林:我每日都揸住部iPad睇即時銷情,每個月只會入七千萬左右嘅貨,種類可以變,但金額一定唔變。如果今個月生意額達標,毛利率不低過兩成七,就會七折減價清貨。所以無定時,有時係月頭,或第三個星期又會有。

霸權

記:你當年斥責超市霸權時,有本地大型供應商不肯供貨給你,如何解決本地貨源?林:(電話響起,掛線後笑說)大昌行朋友打來話:『四洲十二月會召開武林大會(採購會),實係針對你啦!』佢(四洲)搞咪搞囉,我試咁多新嘢,對人哋嚟講係敵意,但我都要交租o架。現時主要搵外國供應商,日本佔六成半、韓國佔一成半、歐洲佔一成。至於本地貨,我會搵啲細供應商。佢哋通常入唔到大場(連鎖超市),我唔收佢哋上架費,賣得幾多得幾多。

記:坊間有人批評你創造咗新的「阿信屋霸權」,與當年維護小店權益的形象相去甚遠。林:(攤開雙手,語帶無奈)阿信屋唔係霸權。如果有霸權,我就會同領匯(823)講:『喂!唔准嗰間士多賣呢啲嘢!咁到時你就寫(衰)我啦!而且,我冇㩒到供應商價,日本仔話賣幾錢,我就俾幾錢,保持到百分之一點四至一點六嘅利潤就繼續拿貨。規模上,人哋(百佳及惠康)超市加埋便利店,計埋華潤啦,有成二千間分店,我得百幾間分店,濕濕碎啦!人哋生意額幾百億,我得十億八億。佢哋仲係控制好大嘅銷售渠道,我哋未影響到任何嘢。氣氛上,我搞風搞雨,實際上我哋影響好微o架咋,得話題囉!我仔女將來唔會入公司幫手,阿信屋交俾手下打理,佢哋知我性格,即使我退休,公司都唔會變成賺錢機器。

PermaLink: https://articles.zkiz.com/?id=83450

【性格執着】「我知我好難頂」

1 : GS(14)@2016-09-29 08:05:36

胡杏兒日前與老公Philip當眾吵大鑊,誰是誰非只有當事人知。其實性格執着的杏兒,在感情及工作上一向有要求、認真及要安全感,早年她與黃宗澤拍拖時,於2011年獲頒無綫雙料視后,她在台上對黃宗澤承認:「我知我好多缺點,好難頂!」近年杏兒北上發展,近日擔正的《我和春天有個約會》舞台劇在上海公演,5場過後其角色由楊怡接替做巡演,有指杏兒想專心造人,要劇組遷就在港綵排兼要求多,堅持要自己髮型師和化妝師班底等,該劇的造型師張學潤指杏兒要求合理,不過認為她不識講說話,要時間與她溝通。




來源: http://hk.apple.nextmedia.com/entertainment/art/20160929/19784813
PermaLink: https://articles.zkiz.com/?id=310575

一路一帶:噚晚Kelly鬧得我好啱……

1 : GS(14)@2017-01-26 18:18:29

噚晚Kelly鬧得我好啱,文化差異係唔應該共融,要保持獨特性,唔係點支煙,飲啖酒就解決到。利申,女主角Kelly,香港人,今年32歲。Kelly自梁振英當選特首後,四年多以來都處單身狀態,親朋戚友怕Kelly成為單身剩女,於是喺馬家村嘅親戚介紹咗個男人畀佢識,叫阿Jack。
Jack係港漂一名,以前喺北京做英文老師,兩人加咗WeChat後好好傾,好快約咗出嚟食飯。Kelly隆重其事,化行妝,襯好衫出門口,去咗事先約好嘅餐廳見面,兩人年紀相近,Jack說得一口流利英語,仲有宏大理想,希望打拼一番事業,Kelly本以為Jack係筍盤,芳心暗許,覺得同內地人拍拖都冇問題啫。食完飯後,兩人埋單,都話有時間再約。但自從見面後,Jack就好似「404 not found」咁,消失於Kelly嘅WeChat,連朋友圈都冇埋。Kelly大惑不解,明明無講錯半句傷害兩地同胞嘅說話,食飯又爭住埋單。過幾日後,親戚來電,大數Kelly不是:「個男仔筍盤嚟,點解你唔好好把握機會?你淨係叫貴嘢食,又着名牌靚衫,化行個妝,人哋會覺得你係大使唔識慳家嘅港女!」
Kelly當堂嚇一跳,然後得啖笑;原來親戚問番個筍盤男點睇,男仔認為女方太貪慕虛榮:「佢又化妝,又滿身名牌,只會點貴菜,完全不懂得節儉,這種女仔根本不適合結婚。」「你估我好恨做馬太?阿Jack你收檔啦!」Kelly聽完覺得晴天霹靂,原來使自己着自己,忠於自己,只係冇按照Jack嘅意願去揀最平嘅嘢,買衫一向幫襯本地牌子,未試過淘寶,咁就係Jack口中不懂得節儉的女人。
Kelly覺得好匪夷所思,女人天生鍾意扮靚,自己化妝都係出於禮貌,着番件靚衫都係尊重場合,至於點貴菜,間餐廳係一齊揀嘅,如果太貴,點解當初唔去食Café de Coral?「其實我都係希望未來50年不變啫!」Kelly覺得要過以往的生活,唔明白點解拍拖、結婚、做咗人老婆,就要降低自己生活,佢認為要高度自治,要財政獨立,婚姻同融合,應該創造出1+1=3,而唔係付出一倍努力,收唔到回報,仲要感恩你送水送糧。Kelly同Jack兩個價值觀不同層次,生活同家庭觀念都唔一樣,夾硬要拍拖根本冇運行。其實過去幾年,香港出現好似Kelly同Jack之間的矛盾,港人底線不斷受到挑戰,未來兩個月對香港命運好關鍵,究竟新特首能否從香港人出發,守住香港的核心價值?3月自有分曉。最後預祝各位讀者雞年行大運。斯郎
https://www.facebook.com/oneroadonebelt/本欄逢周四刊出




來源: http://hk.apple.nextmedia.com/financeestate/art/20170126/19908650
PermaLink: https://articles.zkiz.com/?id=324237

陳雅倫閃嫁吳彥祖表哥「佢迷戀咗我好耐」

1 : GS(14)@2017-02-12 13:52:32

■半百陳雅倫跟吳彥祖表哥Martin拍拖半年,男方去年底求婚成功,並打算今年閃婚。



當緣份要來時,真是擋都擋不住,半百「凍齡女神」陳雅倫出道以來,情路崎嶇,但去年中經好友劉永健介紹,在朋友聚會認識了吳彥祖的45歲表哥Martin,二人拍拖三個月即被求婚,更自爆未婚夫迷戀了她很久,會做雞年新娘。



現年50歲的「凍齡女神」陳雅倫(Ellen)被爆會做雞年新娘,未婚夫是吳彥祖的表哥Martin,Martin比她年輕5歲,在美國長大的Martin,畢業後到內地工作,兩人於去年邂逅,拍拖半年即決定閃婚。陳雅倫近年專注留在北京發展,偶然遇上Martin,女神宣佈做雞新娘,身在北京的她昨接受電話訪問時說:「仲安排緊,未有確實日期。」講到兩人相識經過,她表示去年8月在朋友聚會上邂逅男友:「Martin同我都有共同朋友劉永健,Martin一見到我就展開攻勢,好積極囉。」Martin不但跟劉永健是小學同學,也是方中信好友。



■陳雅倫大讚未婚夫Martin高大威猛及乖仔孝順。

■Martin樣貌酷似表弟吳彥祖,吳彥祖與Lisa S.(右圖)結婚六年多並育有一女,今年就輪到Martin娶老婆。



■(左起)吳君如、陳雅倫、李美鳳、邱淑貞及張曼玉88年參演電影《求愛敢死隊》,五女以泳衣上陣騷身材。資料圖片

拍拖三個月被求婚

陳雅倫形容兩人約會有puppy love的感覺:「去完街返到屋企,仲要傾四、五個鐘電話,都唔知邊有咁多嘢講。」她坦言第一眼見到Martin都有feel,但最感動到她是對方深情表白:「同佢拍咗一個月拖左右,我好認真同Martin講:『唔想玩玩吓,如果你諗住玩玩吓就唔好嘞!』佢已經第一時間講係想大家有將來,令我好感動。」她透露男友於去年11月的生日派對上求婚:「佢突然間喺佢啲朋友面前講:『好希望嚟緊呢年,Ellen可以做到黃太』,好感動,冇諗過佢當住咁多朋友講。呢個年代好少男人肯公開commitment(承諾)。」陳雅倫不打算大搞婚禮,只想與至親在一個特別的地方分享喜悅,但一對準新人要完成手頭工作才着手籌備婚禮,她暫時未收到訂婚戒指。問會否擔心相識半年便閃婚太快?她說:「冇話快,圈中好多人都識咗冇耐就結婚,梁詠琪都係好似三個月就結,夾就得。」


協議婚後定居香港

Martin身高六呎,樣子酷似表弟吳彥祖,也是運動健將,除外在條件優勝,陳雅倫再補充說:「佢都好孝順、細心同有耐性。」Martin過往在內地替Nike、adidas兩品牌推廣,但近年做老闆代理了三款高爾夫球桿。兩人婚後有共識會在香港定居,因雙方的媽咪也在港居住,至於造人她表示會順其自然,但當然希望有BB。不過陳雅倫忍不住大爆未婚夫小秘密,她說:「佢迷戀咗我好耐。」她表示在微博的朋友圈知道彼此有很多共同朋友,Martin一早已想叫身邊女性友人介紹認識,惟陳雅倫經常不在港,料不到及後便在友人聚會上遇到,更成功私有化,Martin平日會暱稱陳雅倫做「BB」。對於表哥Martin閃婚,吳彥祖昨日透過經理人回覆:「冇嘢回應。」採訪:何永寧




來源: http://hk.apple.nextmedia.com/entertainment/art/20170212/19925552
PermaLink: https://articles.zkiz.com/?id=326529

《親親我好媽》講怪獸家長引網民熱議

1 : GS(14)@2017-02-12 13:52:36

日前讀者投訴有邨巴司機邊揸車邊煲無綫劇《親親我好媽》,仲大大聲話:「呢套劇都幾好睇!」揸車煲劇絕對唔啱,但究竟係乜嘢劇種,先會吸引到人去煲呢?呢套《親親我好媽》係無綫新任揸弗人杜之克拍板開拍,最因初為劇本問題,最後要停廠四日,搞到滿城(電視城)風雨。但估唔到套劇拍出嚟,又唔錯,仲引起好多家長同學生共鳴,皆因套劇講緊嘅係已介水深火熱嘅教育問題,仲帶出家庭倫理,夠貼地。由江美儀飾演嘅「虎媽」查向善,完美演繹咩叫極品「怪獸家長」,細女數學測驗攞到98分都要鬧:「連Oscar(呂慧儀囝囝)都攞到100分,你攞唔到係咪你問題?」而大女更加為咗媽咪,放棄考古學,轉讀「易有出路」嘅理科,立志做醫生。江美儀畀兩個女咁大壓力,但都唔夠呂慧儀飾演嘅「驕媽」袁圓咁得人驚。呂慧儀個角色為人非常勢利,為咗爭取做家教會(PTA)主席而搞小圈子,又鍾意用物質獎勵囝囝。不過咁,呂慧儀同江美儀調轉,咩都係「兒子永遠是對的」,結果飾演訓導老師文嘉熙嘅陳敏之就遭殃喇,被指摘為教自己個仔而忽略其他同學而遭投訴,呂慧儀仲以PTA副主席嘅身份施壓:「冇我哋呢班家長,你有糧出咩?」呢句對白咁熟口熟面嘅?「冇我哋____,你有____咩?」呢種句式,香港人聽到笑出聲添啦。(以下劇透!)(以下劇透!)(以下劇透!)(以下劇透!)(以下劇透!)(以下劇透!)(以下劇透!)(以下劇透!)(以下劇透!)(以下劇透!)據本報收到風,《親親》劇情會講到「驕媽」呂慧儀惡完一輪,最終得到教訓,家庭出現問題、同老公關係都變差,之後慢慢先識學乖,同江美儀由敵對磨合變好朋友。而單親媽咪陳敏之,老公意外過身後獨力照顧兒子Issac同細佬Hayden,但工作同家庭都面對好多壓力,包括學校入面嘅麻煩事。而最令人敏之頭痕,係師生戀——郭子豪飾演嘅中六學生連國佳,會愛上Miss Chan Chan陳敏之,唔係地下情,而係明目張膽示愛。但同一時間,演校工嘅韋家雄,又對敏之呵護有加,並展開追求。由「師生」戀到「師工」,令陳敏之忙得不可開交。啱啱做咗人母嘅敏之,被問及劇情發展時,就回覆傳媒稱:「唔好意思唔方便答太多,但呢套劇本身好貼地,我都盡量控制自己,囝囝到o依家都未報學校,我諗我都未係怪獸家長。」至於呂慧儀老公黃文迪就讚老婆演得好,佢話:「睇完之後大家都要一齊思考吓,點樣可以對下一代好啲,因為套劇都係想帶出教育上面,家長同學校可能會遇到嘅問題。」




來源: http://hk.apple.nextmedia.com/entertainment/art/20170212/19925890
PermaLink: https://articles.zkiz.com/?id=326540

《親親我好媽》女神江嘉敏地獄式操走包面

1 : GS(14)@2017-03-05 23:02:22

2017-02-22 EW
在無綫新劇集《親親我好媽》,飾演江美儀大女的江嘉敏,雖然初登電視,但其實她十七歲已被發掘入行;而且能歌善舞,十二歲已經考獲鋼琴演奏級,二胡、打鼓一樣精。今年二十二歲的她,在劇中的學生造型,清新脫俗,獲得不少網民讚賞兼封為「仙氣女神」;不過亦有網友彈她,有塊包包面且身形未夠fit,令她倍感失落。

日前,本刊發現身穿背心、短褲的江嘉敏,到九龍灣一間健身室跟教練狂操;而為極速減磅致瘦面,教練更施展地獄式特訓,令女神叫苦連天。

狂操兩小時

近年,無綫鬧演員荒,單立文、陳山聰、何廣沛及傅嘉莉一晚出兩套劇集,看到觀眾有點膩。幸好,大台懂得請外援,等觀眾可以唞唞氣。最近,貼地劇集《親親我好媽》,劇中「虎媽」江美儀的怪獸家長惡行,令觀眾哭笑不得;而飾演江美儀大女的江嘉敏,亦成為全劇焦點。

現年二十二歲的江嘉敏(Kaman),畢業於名校嘉諾撒聖心,生於小康之家的她,家有兩個妹妹,爸爸是的士司機、媽媽則是家庭主婦。六歲開始學習鋼琴的她,十二歲時已達演奏級,她還精通二胡與打鼓,音樂天份奇高。

在十六歲時,她開始做私影模特兒,十七歲被發掘主演《野犬與貓咪》,而此片就獲得「香港鮮浪潮國際短片競賽」的「最佳創意獎」(學院組)。去年,她更在黃國輝執導的電影《此情此刻》中擔綱女主角,飾演孫耀威的女兒。在《親》劇中,江嘉敏則飾演一名中六學生,由於樣子甜美,外形清新兼有仙氣,故不少網民對她讚不絕口;不過,亦有一些觀眾覺得素顏上陣的她,有塊包包面,且身形未夠fit,令她大為沮喪。

日前,記者就發現身穿背心、短褲的江嘉敏,趁不用開工,便到健身室跟教練狂操。為了極速減磅,教練對她施展地獄式訓練,只是做了十五分鐘的戰繩,已令她叫苦連天。期間,她雖然曾經多次氣餒,要求休息;但嚴厲的教練絕不心軟,勒令她做完凌空掌上壓,再做引體上升,項目一個緊接一個,操足兩小時,她頓時成個人散晒,兼且大汗疊細汗。據密友透露,江嘉敏一星期每天兩小時的操練,已經減去了八磅肥肉,身形fit爆之餘,包包面亦隨之而消失。

江嘉敏接受本刊電話訪問時表示,她第一次拍劇,見到有人話自己肥,當然不開心,所以要努力keep好自己,下一套戲一定令大家耳目一新,她還向記者作了些劇透。「喺劇中,我同何廣沛有幾場咀嘴戲;而佢拍之前,竟然同人講話今日要同一個醜女拍咀戲,搞到佢成晚瞓唔着喎。佢咁樣講,我梗係唔蝕底啦!我咪周圍同人講,一開始知道要同佢合作,就已經開始發噩夢囉。」怪獸媽媽江美儀,最後會逼到個女離家出走,第一次拍劇,江嘉敏就要爆喊連場,絕對是新手的極級挑戰。

傳無綫雪藏

近日,有指江嘉敏早已簽約無綫,可是在劇集宣傳時,惟獨沒她出現,原因是她擅自接拍其他電視台的劇集,所以遭「雪藏」。不過,據密友透露,江嘉敏聲稱自己並非無綫「親生女」,所以可以接出面工作,如ViuTV的劇集《三一如三》,「早前無綫邀請Kaman喺《深宮計》做宮女,由於要性感,角色又冇乜發揮,所以佢推咗,唔知係味咁觸怒咗大台。」記者嘗試找江嘉敏回應,但她截稿前未有回覆。

新一代女神

這個年代「 模」二字來得俗氣,已經沒有人願意接受這個稱呼,而各界靚女最渴望成為網友心目中的「女神」;可是,網民要求多多,既要面孔夠新鮮,又要夠pure,還要帶點仙氣,才會冠以「女神」之名。

周子瑜

來自台南的十八歲周子瑜,四年前被「Wonder Girls」人氣女團所屬的經理人公司「JYP娛樂」的星探發掘,並遠赴韓國受訓,其後以九人女團「TWICE」出道,甜美出眾的五官,被韓國「10 asia」新聞網讚「比韓國小姐還美」,成為首位台灣土生土長的韓團偶像。

袁澧林

憑美心廣告成功彈出的二十二歲模特兒袁澧林(Angela),因她的清新面孔和簡約衣着服飾,而火速被網民封為「文青女神」,其後因為拍了ViuTV劇集,所以又多了個「ViuTV女神」的封號。

鄧月平

十八歲的鄧月平曾參加過ViuTV選美節目,有巨咪黃翠如之稱,選美期間,鄧月平獲鄭丹瑞(阿旦)賞識,拍攝《小男人週記3之吾家有喜》,飾演旦哥女兒,樣靚身材好,成全戲焦點,亦成為新一代宅男女神。

撰文☆武儀 攝影☆楊北鉅 設計☆李浩然
PermaLink: https://articles.zkiz.com/?id=327922

鍾嘉欣擔遮變大妗姐王君馨榮升章太「我好幸福」

1 : GS(14)@2017-06-16 01:47:46

【依足傳統】■王君馨於香港時間前日與Daniel在紐約舉行婚禮,除穿上裙褂出嫁外,更有鍾嘉欣(左)擔遮兼任大妗姐。



現年31歲的「處女黨」成員王君馨(Grace),去年11月與圈外男友Daniel申請註冊結婚,至香港時間前日,二人終在紐約舉行婚禮,正式升呢做章太。身為王君馨好姊妹的鍾嘉欣、李亞男、衛蘭和裕美等均有親到紐約分享好友喜悅。



【透視晒腿】■換上婚紗禮服的王君馨與老公在婚宴上切蛋糕。互聯網圖片

■王君馨與Daniel在教堂宣誓,正式成為夫婦。互聯網圖片

【星級姊妹】■獲一班圈中好姊妹陪伴出嫁的王君馨,笑到見牙不見眼。

姊妹團Rap歌

新娘子Grace於昨日凌晨時分,向傳媒分享出嫁心情及婚禮場面的靚相,她除穿上傳統裙褂出嫁外,更由好姊妹鍾嘉欣做大妗姐擔遮陪出嫁,甚至向父母斟茶,一切跟足傳統。另外,王君馨又穿婚紗跟老公錫錫,認真甜蜜。忙到一頭煙的Grace昨日興奮地說:「我喺噚日6月11日喺紐約同Daniel結咗婚啦,好嘢,哈哈哈。噚日係非常開心啦,一朝早起身,啲姊妹幫我着褂啦,我哋又有斟茶畀我哋嘅父母,總之成件事都非常之開心嘅,嘉欣變咗我嘅大妗姐,因為我哋冇一個大妗姐。」
Grace透露她與老公現身婚禮場地時,衛蘭帶領裕美和李亞男等唱詩歌和rap歌,眾人並準備了十分甜蜜的歌詞送給她和老公,她說:「我哋都好感動,我係章太啦,我好幸福呀!」開心爆燈的Grace其後更於微博和Ig分享婚照,正式宣佈「Hi!I'm章太。」Grace在紐約舉行婚禮後,將於下月11日在香港的美國會補擺喜酒大宴親朋。


香香送祝福

原來Grace所揀的婚紗為本地設計師Marco M Chan設計,食正今年的短袖嫁衣熱潮,而她之前已穿過他多套婚紗影pre-wedding相,可見她對Marco情有獨鍾。此外,岑麗香雖然未有出席好友Grace在美國的婚禮,但透露將會出席好友在香港的喜酒,屆時她還會擔任姊妹,香香於Ig留言向一對新人送上祝福說:「你們結婚啦!」撰文:魯吉




來源: http://hk.apple.nextmedia.com/entertainment/art/20170614/20054799
PermaLink: https://articles.zkiz.com/?id=335451

眾星盡訴父親情雷宇揚推Job陪仔玩「我好珍惜呢幾年」

1 : GS(14)@2017-06-18 11:18:11

■過往工作忙碌的雷宇揚,今年首度與囝囝雷庭慶祝父親節,開心玩波波池。



【父親節嚟喇】今日父親節,一眾爸爸紛紛出動與子女們慶祝。長居廣州的雷宇揚日前與3歲囝囝及太太到兒童樂園耍樂,原來早兩年他因工作少陪囝囝,於是去年減少工作享受親子樂,他說:「想彌補番,我每日張開眼就諗起佢。」而Dear Jane主音黃天翱和太太楊洛婷、胡子彤和爸爸,以及林俊賢和女兒林鈺洧,亦各自慶祝父親節。現年52歲的「鬼王」雷宇揚,2012年與內地女主播馬荔結婚後長居廣州,3年前他榮升爹哋。日前雷宇揚一家三口在廣州接受本報專訪,提早慶祝父親節。原來囝囝雷庭出世首兩年,雷宇揚因要兼顧工作四圍飛,未有時間陪伴,照顧囝囝的責任交由停薪留職的太太負責,今年是首次一家齊齊整整過父親節,雷宇揚說:「出世之後兩年我陪得佢少,想彌補番,我每日張開眼就諗起佢。」雷宇揚自言沒有節日觀念,總之囝囝開心他便開心,覺得日日都是父親節。



■雷宇揚減少工作,一家三口盡情享受親子樂。

■雷宇揚2012年與太太馬荔結婚後,3年前誕下囝囝雷庭。

■雷庭錫錫爹哋,令雷宇揚冧到爆。

■雷宇揚(右)早前為電影宣傳,結束工作後馬上返家陪囝囝。微博圖片

減少應酬戒酒

過去一年,雷宇揚已減少公幹,他說:「近一年我比較飛少啲,多啲時間留喺佢哋身邊,小朋友生活好簡單,早上6點幾起身,晏晝3點幾放學返屋企,去公園踩單車、去波波池玩吓,一般小朋友同父親做嘅嘢我都做晒,食完飯之後就瞓,我哋嘅親子活動一般平民百姓都會做,一齊瞓、送佢返學,發神經同佢一齊瀡滑梯,已經係好開心,仲有陪佢睇電視,佢逼我睇卡通片。」自有小朋友後,雷宇揚已絕少應酬,往往工作完畢便飛撲返歸。他說:「佢?家3歲半,去到8、9歲就唔跟我哋,我好珍惜呢幾年,所以?家多啲返屋企,少啲應酬,有啲工作太遠太辛苦,或者去好多日就唔接。?家好少見朋友,唔會好似以前單身咁,冇嘢做出去飲酒,?家出去飲酒係零。」


香港教育變態

當了父親3年多,雷宇揚指兒子對他影響不少:「以前覺得自己最重要,?家係個仔,以前喺國內坐車唔扣安全帶,?家會扣,我有乜事佢點算?」虎媽虎爸現今社會十分普遍,但雷宇揚堅拒做虎爸,他說:「我覺得最緊要佢開心,如果佢唔開心,強迫佢做一樣嘢都冇意思。」囝囝現於廣州一所國際學校就讀,雷宇揚認為小朋友讀書無需太緊張,只要成績不太差便可以,他說:「我揀啲冇乜功課嘅學校,香港啲教育真係變態,我朋友個女朝早6點幾返學,夜晚返到屋企做埋功課12點半,人生係咁點得?細路仔應該係玩,識字就得,呢方面我唔會畀壓力。」問會否生多個時?雷宇揚說:「我抱開放態度,我老婆就話夠,照顧一個都好花時間,如果兩個好辛苦,同佢去一日迪士尼,我散足三日,同佢玩一陣波波池,我底褲都濕埋,我太太重新投入工作都好忙,佢好鍾意份工,又唔想放棄。」採訪、攝影:曾小嘉




來源: http://hk.apple.nextmedia.com/entertainment/art/20170618/20059441
PermaLink: https://articles.zkiz.com/?id=335768

吳日言灑淚:我好錫爸爸

1 : GS(14)@2017-06-18 22:07:11

吳日言(Yan)去年跟拍拖17年男友Barry拉埋天窗,單親家庭長大的她,當日由爸爸陪住出嫁。她自爆以前和爸爸較生疏,直至今年15歲愛犬Win Win出現,父女關係才有改善。
Yan說她兩歲時父母離異,感覺父親經常眉頭深鎖,吳父即說:「佢細個已經好硬頸,好難溝通。自己成日要做嘢,返屋企就係煮飯,返到屋企都好少傾偈。」



■吳日言長大後,才明白因為爸爸一直在為她着想。

訪問期間,Yan提到爸爸一直好節儉,才有能力為她準備安樂窩,感動到流下淚來,她說:「結咗婚有家庭,先知我真係好錫我爸爸,見到佢退咗休好開心,爸爸又成日見到我笑,以前一路唔明嘅原來係我,爸爸作風就一向都係咁。」吳父則說見到女兒事業起伏會感到心噏,只想她開心快樂。採訪:鄉奈仁場地提供:美樂士多




來源: http://hk.apple.nextmedia.com/entertainment/art/20170617/20058685
PermaLink: https://articles.zkiz.com/?id=336002

Next Page

ZKIZ Archives @ 2019