ZKIZ Archives


洪永城半山搬到地面住黎姿谷底反彈成闊太

1 : GS(14)@2017-08-02 05:59:39

好多藝人表面風光,但其實背後分分鐘孭起頭家,真係有苦自己知。好似近年愛情方面唔多得意嘅洪永城,亦係家道中落嘅人之一,話說洪母係台灣人,早年營商,家境殷實,家中排行第二嘅洪永城10歲起就被送去新西蘭留學,可惜經濟差,生意失敗,家道中落,佢屋企更越搬越落,由住半山搬到尖沙嘴同天后等地方,物業賣得嘅都賣。後來洪永城回港工作,由有線轉NowTV再轉去無綫,先叫做撈番起身價。而最勵志嘅例子,應該係生於電影世家嘅黎姿(現名馬黎珈而),佢係香港電影之父黎民偉嘅孫女,家中有唔少電影明星,原本家境不俗,可惜自黎姿嫲嫲過身後,其因患腦膜炎失聰嘅父親因不擅爭家產,導致家境變差,黎姿一家四口更由豪宅搬到東頭邨居住。黎姿年紀小小就已經出去做嘢兼職幫補家計,更因一次到父親工作地方探班,被許冠傑睇中,介紹佢去試鏡入行,亦因此踏上星途。黎姿入行以來,做齊歌影視三棲藝人,代表作更有《金枝慾孽》及《珠光寶氣》等。到2008年宣佈全面退出娛樂圈,同年嫁商人馬廷強,婚後專心相夫教女,並抽時間幫其胞弟打理醫學美容公司生意,今年初更成功喺創業板掛牌。




來源: http://hk.apple.nextmedia.com/entertainment/art/20170802/20108718
PermaLink: https://articles.zkiz.com/?id=339262

Next Page

ZKIZ Archives @ 2019