ZKIZ Archives

李治廷范冰冰姊弟戀甩拖邊個先係「老婆」？

1 : GS(14)@2016-10-24 06:12:21

99%同另一個人似樣係咩感受呢？呢條問題，可以問下李治廷，因為佢由09年出道到o依家，都俾人覺得同台灣歌手王力宏好相似，明明兩人無關係，但就有班大陸人以為佢係王力宏表弟。29歲嘅李治廷無論係面型定身型，都同40歲嘅王力宏似到十足，拼埋一齊睇，連五官都好相似，所以佢又有個「小王力宏」嘅稱號。除咗外型，佢哋嘅背景都差唔多，精通音樂又係唱作人，唱、作一手包辦。天生擁有一副靚仔樣，才藝滿分，呢個package當然就煞食啦。李治廷就拎住啲咁好嘅條件拍拖，唔係媾妹妹，反而愛好認識姊姊。13年李治廷同大佢6年嘅范冰冰，合作咗套電影《一夜驚喜》，好快就擦出愛火花，除咗俾人見過前後腳上機，又有大陸網民話見到佢哋喺布吉撐枱腳，李治廷仲錫咗范冰冰額頭一啖。當時佢受訪講起姊弟戀呢個話題，答案好精采：「現實接受，愛情唔好受規限，有愛情嚟到要珍惜。」可惜范冰冰最後情歸內地男星李晨。直到今年初，李治廷「搭上」另一位姊姊－－台灣第一名模林志玲。佢哋今年初喺大陸節目《花漾姐姐》好親密，李治廷唔只喺機場接機，仲向途人介紹林志玲做「我老婆」，不過事後林志玲話唔過電，請李治廷食檸檬。




來源: http://hk.apple.nextmedia.com/entertainment/art/20161024/19810710

---