| 2015-08-13 MM |
||
|
洪婉婷，五十二歲，去年十二月與拍檔開設招聘網「散工易」，主要請飲食業侍應和洗碗臨時工，結果發現當今愛自由的九十後，寧炒散都不會做長工以免被束縛。 我 開咗「散工易」已經半年多，有一千八百人透過我哋搵到工，當中三分之二係九十後。佢哋炒散目標好明確，就係想即時搵到錢。而家最低工資時薪三十二個半，但 呢個價好難請人，食肆洗碗要出到五十蚊。有個九十後電車男，話自己唔鍾意同人講嘢所以想做洗碗，佢一日返九個鐘就有四百五十蚊，一個月廿六日就有一萬一千 七百蚊，同剛畢業嘅大學生差唔多。 我呢個女蛇頭，有時怕啲妹妹仔辛苦，諗住醒份做四、五個鐘嘅散工俾佢哋，點知有個蛇女嫌工時少，叫我搵份有得做十個鐘嘅，做咩咁進取？原來佢要趕住還卡數。 有啲九十後成日講理想，我有個蛇仔係音樂人，開班教結他，但學生人數少，佢唔夠錢開飯又唔想放棄，所以要炒吓散幫補。呢啲後生仔知道自己做乜，我最欣賞，但唔係個個九十後都係咁。 為自由打散 有 個蛇仔經我轉介做過幾份散工，以往表現正常，最近叫佢去佐敦一間酒樓開工，我恐防佢唔識去，事先用Google Map教路，仲影埋酒樓門口相，等佢容易認。點知嗰日我收到酒樓經理電話，話無人返工，我即刻打鑼咁搵個蛇仔，佢竟然話搵唔到間酒樓，於是返屋企大覺瞓。 大佬呀，你搵唔到都打個電話通知我吖。騎呢九十後又點只佢一個，有啲高級西餐廳、酒店、酒樓都會要求散工，著黑色西褲同皮鞋返工，但班蛇仔蛇女覺得，自己 只係炒散，無必要花錢買衫買鞋，最多就唔做，所以我哋有時要借鞋借褲，做到好似阿媽咁。你問我點解唔鬧爆佢哋，傻啦，鬧？咪唔撈囉。時代唔同啦，我呢個六 十後，讀到中五之後做採購。細個嗰陣轉工期間都炒過散，喺酒樓做樓面，試過做錯嘢俾人用粗口問候全家，仲指住你個頭嚟鬧，嗰陣難頂都要頂，唔係邊有錢開 飯，但我會反省吓自己做錯乜，而家諗番轉頭覺得，人哋鬧我係塞錢入我袋。
以前，香港人覺得炒散係不務正業，我阿爸阿媽成日 話要好好哋搵份長工先至係正路。而家班九十後因為無養家負擔，炒散方便佢哋隨時唔撈去做自己嘢。佢哋由細到大歎慣唔受得氣，容易覺得做長工壓力大，又唔見 得有好多晉升機會，寧願炒散自由自在。加上佢哋睇唔到將來，反正買唔到樓，不如今朝有酒今朝醉。新世代奔放又自我，不過我想講：責任和誠信，係做人處世嘅 基本態度，無世代之分，也無長工散工之分。
撰文：陳雅欣 攝影：胡智堅 | ||