中環在線：華爾街大佬點只愛做Spa 李華華
2008-10-23 AppleDaily
全球股市動盪不安，海嘯源頭花旗國班華爾街高層，更係晚晚瞓唔安、食唔樂，擔心自己間寶號會唔會成為下一間爆煲企業。咁大壓力，好容易做出錯誤決策，公司分分鐘冇事變有事，就係因為咁，點樣減壓，成為華爾街高層呢排最熱嘅話題之一。
高盛高層鍾意靜坐
要 減壓，唔一定好似AIG班高層咁，喺華府拍板注資拯救後幾日，就花一大筆錢去加州海灘度假做Spa。據彭博資訊報道，華爾街近排流行靜坐減壓，身兼高盛同 埃克森美孚監事會委員嘅William George，更係忠實擁躉，佢仲向身邊嘅老友力sell。今年66歲嘅George最鍾意喺飛機度靜坐，尤其係搭長程機飛去歐洲，當飛機引擎一撻着，佢 就會合埋眼深呼吸，開始靜坐進入冥想世界，等自己冷靜頭腦，幫助思考。
香港代表有四叔
唔只佢，聽講，福特汽車主席 William Ford都係同道中人。靜坐呢家嘢，當然唔係老外專利，香港富豪都鍾意打坐冷靜思考，甚至當係養生之道，好似四叔李兆基一得閒就盤膝靜坐，每次打坐超過1 個鐘，佢老人家大讚打坐幫助養生，個人冇咁容易緊張，心平氣靜，人都零舍健康啲。