|
||||||
|
噚日華華收到封電郵，電盈（008）小股東大聯盟就電盈有意分拆電訊業務上市，想反映吓意見，但苦無渠道，於是諗到搵東亞銀行（023）主席「寶哥哥」李國寶（圖）幫吓手。 各位一定奇怪，點解會搵寶哥哥？除咗因為佢係電盈獨立非執行董事之外，原來仲有段古嘅。 大聯盟發言人陳仲翔話，兩年前電盈私有化期間，喺立法會門外，寶哥哥好親切咁接見一班電盈小股東，仲同每個小股東握手，家陣佢仲記得寶哥哥雙手幾咁溫暖同有力。 不過，今次寶哥哥未必幫到呢班小股東，皆因大聯盟接到寶哥哥秘書回覆，話寶哥哥早前做咗手術，o依家復原緊，大聯盟都唔好意思打擾。華華收到風，寶哥哥之前去咗美國做腳部手術，o依家已經無大礙，華華都祝佢快啲康復，健步如飛。 |
||||||