【唔做大律師1】林作想坐肥佬黎個位 濕身報天氣做外賣仔
1 :
GS(14)@2017-03-23 06:51:15今個禮拜《動新聞》嚟咗位新同事－－前大律師林作，踩入嚟堆填區，話想一試做動主播嘅滋味！
本星期《蘋果動新聞》嚟咗位新同事，前大律師林作踩入嚟堆填區，話想一試做動主播嘅滋味喎！林作嚟到蘋果表現謙虛，叫同事嗌佢做「作仔」，話有咩要做，即管開聲咁話！《動新聞》既同事一向都好照顧新人，所以第一份安排畀作仔嘅工作，就係做「天氣男神」！
第一份工作就係做「天氣男神」！
一切由最低層做起先，例如，幫同事買下午茶。
問到作仔如果做報館，最想做咩崗位，佢竟然話想坐肥佬黎個位，「最想做老闆！」
報天氣呢回事，有時都好睇彩數，撞啱今個星期「天氣不似預期...」，預測話呢幾日日日都有一兩陣驟雨！為咗呈現最真實一面，林作濕身報天氣就少不免，好彩佢話，「我好鍾意濕嘅，所以ok！」呢兩晚嘅【蘋民焦點】《堆填區晚間新聞》，都播出咗作仔盡力嘅濕身演出，唔夠喉？今日至星期五都一樣會見到作仔㗎！問到作仔如果做報館，最想做咩崗位，佢諗都唔諗，竟然話想坐肥佬黎個位，「最想做老闆！老闆個位係我最喜歡！」做人最緊要識得貼地，一切由最低層做起先，例如，幫同事買下午茶。佢仲大讚蘋果canteen啲嘢好食，「試咗腿蛋治，我感受到個功力，嗰個炒蛋我係用『淫賤』嚟形容，又濕、又滑、又...」cut！閘住，兒童不宜...兒童不宜...兒童不宜...作仔咁鍾意講嘢，下集「大戰」麥明詩嘅時候仲爆料話佢有「新仔」，係真唔係呀？記者：王梓嫚、懷鈺攝錄：馮峰、Neo攝影：林德雄撰稿：阿仙剪接：Roy編審：Kaman
來源:
http://hk.apple.nextmedia.com/entertainment/art/20170323/19967349