ZKIZ Archives


【果籽影評】康城金棕櫚慘情作《我,不低頭》 過年啱睇!

1 : GS(14)@2017-01-29 10:32:09

This is Daniel.
Daniel is a citizen, nothing more,nothing less.
Daniel is a real man.
Be like Daniel.



點解要似Daniel咁?佢落難助人,雖然未必垂丹青,但時窮節乃現。有錢人為利益折腰跪低奶X,呢幾年已不是新聞。當我哋係咁歌頌「仗義每多屠狗輩」,你就知為富不仁已成常態。如果政府有份製造惡勢力,要你捱窮,奪你尊嚴,你可以點?我唔直接答你,我用片名答你。



Hayley Squires一段在食物銀行的痛哭戲令人鼻酸。

靠政府救助,不如基層間互相扶持,相當諷刺。

《我,不低頭》(I, Daniel Blake)其實唔似一套戲。我覺得某段情節好似有兩分over,即被同行觀影朋友圍攻「何不食肉糜」。我太離地,窮途末路,其實真係乜都可以犧牲。諗真佢係一套珍珠都無咁真嘅人間悲劇,有萬般無奈,千串淚水,百種荒謬,好彩仲有十級溫暖。以近80之齡,導演堅盧治(Ken Loach)拿下康城金棕櫚,是史上最年老得獎者,「堅」係老而彌堅。平凡故事得到康城嘉許,或者因為太寫實,電影有時係需要呢種真。導演接觸慈善機構及食物銀行,與領取救濟金的基層對談,取得第一手資訊,唔係隔岸觀火。電影插英國社會福利制度如何侮辱窮人。想在困難時得到暫時援助,就要同福利機構玩不平等遊戲。片中木匠Daniel幾廿年靠手藝搵兩餐,因病申請工作津貼,點知所有手續都要上網搞,你一生都未用過電腦,sorry,我唔理;你人已在我面前,你依然要返去上網填form、等電話。你山長水遠拖男帶女來申請遲咗少少?今個月援助金你一個仙都唔會有。到底民粹可怕?定僵化官僚制度可怕?你連真正有需要嘅人都罰埋,想點?花甲鰥夫,心臟病發,申領津貼,形同被玩,路見不平,好心出頭,摒諸門外,相濡以沬,人情冷暖,XXXX(唔出得街)。呢啲故事閣下左鄰右里樓上樓下可能都有三五七個,慘多幾錢重都有。電影貴在道出永遠上不了頭條的小人物悲歌,為他們吶喊。角色塑造立體,男主角Dave Johns本為棟篤笑喜劇演員,角色面對逆境時的幽默感當然難唔到佢,生活磨人的慘情,對年輕單親媽媽Katie由憐生愛,都入木三分。女演員Hayley Squires根本就係Katie,食物銀行崩潰戲搞到人好心酸,但大家見狀熱心安慰,又好鬼窩心呀嗚嗚。新年流流推介埋啲慘戲,係因為慘嘢唔會因為新年流流無咁慘。大時大節,與其睇笑唔出賀歲片,我寧願揀套喊得出嘅。《我,不低頭》(I, Daniel Blake)導演:堅盧治演員:戴維莊斯、夏莉史昆絲正式上映日期:9/2(初一至初四有優先場)記者:葉青霞




來源: http://hk.apple.nextmedia.com/su ... t/20170129/19912130
PermaLink: https://articles.zkiz.com/?id=324642

Next Page

ZKIZ Archives @ 2019