稱前妻法拉係「朋友」薛世恆想搵個伴生仔
1 :
GS(14)@2016-11-16 05:47:56陳法拉大前年同Neway太子爺薛世恆離婚，仲離開埋大台，今年喺事業同愛情都有新發展，好似之前佢就同黃子華合演咗舞台劇《前度》，今年8月仲傳佢有新戀情，話佢同法國駐日外交官Emmanuel Straschnov拍拖。法拉發展如意，薛世恆亦唔輸蝕，先後同梁雨恩、廖碧兒同朱璇傳緋聞，而一直唔願回應嘅薛家大少爺，最近接受周刊訪問，講到前妻，佢依然冇正面回應二人嘅關係，只話唔想影響到朋友，佢用朋友來形容陳法拉。薛世恆同陳法拉一直都冇釐清過二人嘅關係，但外界一般都會話佢哋係離婚，專訪中，薛世恆依然冇正面回應，只係一笑置之，仲話唔想提及，因為唔想影響朋友，口中嘅朋友就係法拉。但係薛家大少爺就講到，一段感情去到呢個地步，佢自己都有反省過自己，覺得自己唔識溝通，同埋太自我，當中佢學會揀對象時，係唔好要求人哋點點點，而係要求咗先。但薛世恆就話新戀情，就要隨緣，佢坦言經常一支公出席活動，都希望有個伴陪吓自己，亦都好想有小朋友，仔女都冇所謂。至於緋聞同爭產，薛世恆先後同梁雨恩、廖碧兒同朱璇傳緋聞，薛世恆解釋好多都係朋友，佢舉例，有次報道話佢同六十個女仔一齊過生日，但其實當時仲有六十個男仔，但報道就唔提；有次同女教友傾偈，就話佢媾中女，搞到佢好唔好意思。緋聞冇個真，咁爭產佢又點解畫呢？薛世恆重申自己同細佬薛嘉麟感情好，由細玩到大，仲話老竇係在生，點會爭產。至於失勢，佢自己13歲就移民去咗澳洲，讀完中學返香港，喺香港科技大學修讀電腦系學士及碩士課程，之後再取後特許金融分析師(CFA)資格，03年就開漿到爸爸嘅印刷廠同Neway工作，之後爸爸就話想到澳洲深造，所以就由佢暫幫手睇住間公司，08年，爸爸話有啲時間睇番盤生意，所以佢就發展自己嘅事業，創立咗一間投資公司，專做投資、股票同物業生意。佢仲笑話，唔知細佬做緊乜，咁講又好似真係如報道講，好不和咁，哈哈！
來源:
http://hk.apple.nextmedia.com/entertainment/art/20161116/19834952