8月生得 老公列購物清單黃婉曼挺巨肚 急掃囡囡用品
1 :
GS(14)@2017-06-25 09:31:27■黃婉曼有二十四孝老公陪同掃嬰兒用品，兩口子非常溫馨。攝影：陳順禎
現年33歲的「天氣女郎」黃婉曼（Icy），大前年嫁給會計師兼馬主馮柏基，兩人今年初宣佈造人成功，Icy已懷孕8個月，預產期今年8月，距離生產仲有一個多月，Icy竟一直嘆慢板未買嬰兒用品，二十四孝老公馮柏基日前趁放假就陪老婆到銅鑼灣狂掃嬰兒用品。黃婉曼產前24吋纖腰，但陀B喪食，8個月身孕，肚圍已40吋。兩公婆是新手父母，明顯準爸爸馮柏基較細心，掃貨前列出購物單，到店即照執，全程有商有量，謹慎看產品物料。
■黃婉曼產前24吋纖腰，現時已有8個月身孕的她，肚圍達40吋。
準爸爸親揀奶嘴
Icy與老公首要準備「走佬袋」，因Icy擔心囡囡急不及待提早出生。而挑選嬰兒手推車，Icy則讓馮柏基負責，兩人快手執滿整車嬰兒用品，其間馮柏基又買了一個寫上「PaPa The Best」奶嘴，準備送給囡囡做見面禮。肚大如籮的Icy，行動尚算自如，她說：「日前去產檢話仲有一個月左右，我先意識到好快。呢排一直忙工作，未得閒買BB嘢，真係臨急抱佛腳，今日買咗走佬袋、奶樽同衫仔。」Icy表示現在跟時間競賽，要安頓麵包學校未來數月生意計劃。
■黃婉曼與丈夫為囡囡挑選BB車（圖）及床仔等用品。
日食8餐重20磅
非好動型的Icy，腹中囡囡卻異常活躍：「囡囡成日波浪咁踢，半夜成日喺我肚中打拳，一餓就係咁踢，可能叫我畀嘢佢食，係為食妹。」Icy自爆陀女後一日吃8餐：「呢段時間點食都得，變成一團肉，重咗20幾磅，體重有成130磅。」Icy透露產後會餵人奶，問她會分配老公掃風嗎？她說：「老公要返工，我怕半夜餵奶，爸爸冇覺好瞓，囡囡起居我搞掂，教育同學習就交畀佢。」採訪：陳杰場地提供：荷花親子中心
來源:
http://hk.apple.nextmedia.com/entertainment/art/20170624/20066555