ZKIZ Archives


網民新招抵制王晶+TVB高登怒爆《使徒行者》結局

1 : GS(14)@2016-08-16 06:11:23

如題,本文有劇透。但唔會現在就開……睇多幾行字,知道埋件事嘅前文後理先。邊個係第6個臥底?基本上電影版《使徒行者》成部戲嘅大橋。可能性得兩個,一個係古天樂,一個係張家輝。兩個都係黑幫,你覺得係邊個?之前大台劇集《使徒行者》鋪咗32集,搵5個臥底(其實加埋覃歡喜,應該係6個),大台為求谷自家投資嘅電影版票房,即急急再次重播全劇,希望喚起集體回憶增加入場意欲,無奈電影版只係得尋人大橋一樣,但冇咗爆seed哥,冇咗Kobe,換來的是「TVB電影御用卡士」:吳鎮宇X古天樂,即使保留咗釘姐同歡喜哥,味道已經變質。釘姐喺電影版嘅作用,只係穿針引線,帶出兩位型男;而吳鎮宇嘅角色,其實又有啲似三哥苗橋偉(卓Sir)嘅變奏。尷尬位嚟喇:觀眾一方面覺得換湯不換藥(大橋、吳鎮宇、古天樂),一方面又覺得變咗。電影上映之前已經陸續有負皮,例如:「又係張家輝又係古天樂又係毒品,差咁個劉青雲就可以叫《掃毒2》」「都唔係用原本班底,次次電影就飛起原本個啲,搵埋啲影帝嚟做。」「TVB難得一套劇成功好睇,搞一搞電影版又唔係原班人馬拍,成套戲《掃毒2》咁。」「其實《使徒行者》冇咗林峯就已經唔係《使徒行者》」「你哋換晒原作班底,不如改名叫《爆醬瀨尿蝦牛丸》啦笨!」《使徒行者》開畫日票房收$1,086,505,前日收$1,037,086。留意番,《使徒行者》導演係文偉鴻,監製係王晶,無綫投資,兼夾係合拍片,會喺大陸上映。高登仔同王晶/TVB關係咁「好」,所以部戲上映兩日,已經有巴打開PO,條題就係劇透,想知就拉落去:↓↓↓↓↓↓↓↓↓↓↓↓↓「張家輝係臥底古仔係扮臥底震乳死左。」高登呢個po,正評224,負皮20。巴絲打對於有人劇透反應竟然咁正面,原因,不難明。有巴打留言補充:「點解Black Jack(第6個臥底)為咗古仔而死得咁慘」「有冇完整劇透想貼去ua個fanspage」「套嘢好似掃毒」「支持打擊爛片」「扮高科技場面令人失笑,用直白對話交代劇情,又有傻的嗎假死情節,燈光、攝影、剪接都係電視級數。」唔止咁,仲有網民發動「廣傳」運動,請大家響應高登一齊share結局出去,理由係「TVB同王晶合作搞嘅《使徒行者》太垃圾喇,呢個兩個單位合作嘅電影太令人眼前一亮喇,所以垃圾一定要劇透!」、「愛香港支持本土嘅你一定要參與下!一齊劇透劇透劇透劇透劇透!睇佢點玩局中局!垃圾反間計!」大家點睇?




來源: http://hk.apple.nextmedia.com/entertainment/art/20160815/19736756
PermaLink: https://articles.zkiz.com/?id=305949

Next Page

ZKIZ Archives @ 2019