ZKIZ Archives


又一福建幫 小炒王 梁心欣

來源: http://hkcitizensmedia.com/2014/10/29/%E5%8F%88%E4%B8%80%E7%A6%8F%E5%BB%BA%E5%B9%AB/

沒有滬港通,股仔照炒。

相信睇題都知,炒樓有溫州幫,炒股點少得福建幫﹗

主角係百德國際(2668),無聲無息成功易主,新主人係張誌猛。何許人? 46歲,出身農村家庭,自細唔鍾意返學兼且撩事鬥非,打架打輸的話返屋企仲要俾爸爸鬧,養成不愛輸的性格。讀書唔得,12歲走去學人生意,做到上咗軌道就交俾個妹。之後輾轉開過布料廠、塑膠廠,到25歲,已經成為村內富翁,到廈門發展。

講到呢度,咁後生搵到第一桶金,最終咪敗咗佢。NONONO, 佢係好大機會俾人呃咗筆錢先真。試過兩次人生低谷,一,係買咗一隻貨船咁大的紙張,點知一場雷雨攪掂佢,冇咗6000萬。二,金融海嘯,輸股票輸咗成億,其中一隻係中石油。

故事講完,佢衰過,但現時仲係屹立不倒,肯定有過人之處。他係廈信資本、廈門廈信投資集團董事長及香港投資董事長,兼且是福建省政協委員會委員等,證明投資係佢個辦。香港股票之中,佢摣咗隻半新股宏太(1400)及美麗家園(1237),兩隻都係上市前入股,持股唔夠10%。而唯獨百德(2668)做埋主席,持股26.86%。咁其餘七成幾去咗邊﹖披露權益冇講,即係話逆手仲未完,但貨就入咗喺10位強者之手。現時,張生手貨係喺詹培忠手中以1.01元攞咗兩億股,再以1.09元接多1億股。簡單講,未上曬手,批貨一度爆過一倍。

睇返通告,百德早前同獨立第三方訂立意向書,可能收購溫斯頓能源集團全部股權,溫斯頓主要從事製造及銷售清潔能源等業務,獨家期6個月。代價預期包括1000萬元按金,以及發行代價股或可換股債支付,發行價及轉換價都係1蚊。以此推斷,張生係想做大間公司,註嘢入去係始早嘅事,如果唔係都用不著要做主席,現時公司市值廿幾億,係要有返咁大SIZE先可以做big tea rice! 照張生手貨計,兩蚊目標係幾可肯定(內地人炒股沒有賺一倍不會心息。)此欄目標係長遠要翻一個翻。

小炒王梁心欣

PermaLink: https://articles.zkiz.com/?id=117345

踩鋼線梁心欣

2014-12-10  NM

 

人稱小炒王,最鍾意短炒,日日唔炒股唔安樂。樹仁新聞系畢業,曾任電視台、電台財經節目主持,最近與拍檔踩入紙媒出財經雜誌《策略王》。上週二初流出市面,港股即跌逾五百點。她最怕江湖魔咒──每逢財經雜誌創刊,就係股市見頂之日。

我哋唔想做《iMoney》呀!(編按:○七年十月《iMoney》面世,三日後股市見頂,金融海嘯來臨。)不過我哋都無咁大影響力啦!呢個時候出書,其實係之前諗住滬港通後個市會旺,坊間又比較少財經雜誌,想食住個勢啫。全公司得四個人。我係主編,但其實身兼記者、校對同sales,廣告一腳踢!好彩之前做嘢識落唔少朋友,第一期都到新地、福臨門呢啲廣告。但我哋連定價都未諗好,見其他財經雜誌通常賣廿蚊,我哋平兩蚊啦!點知「薄切切」賣十八蚊,連我朋友買完都問,係咪漏咗本呀?我哋知錯o架啦,下期開始會減價到八蚊!好意頭吖嘛!

我哋想走小眾路線,介紹一啲唔係太多人留意嘅股票。係人都知做雜誌燒錢,我同拍檔總共投資咗五十萬,一本書成本都唔使五蚊,每期印萬幾本都係幾萬蚊,目標係賣到七成,希望有錢賺。我佔好小部分,玩完五十萬再睇拍檔頭啦!

由電子傳媒跳到紙媒,咩叫藍紙都唔知,其實都幾踩鋼線。不過,由之前做主持,到而家身兼股評人,我都係一個踩鋼線嘅人,炒股風格更加係,係好易跌死o架,小心啲囉。我讀大學已經買股票,因為抽開新股嘅阿媽要我自己學費自己負責,我邊有咁多錢?佢叫我抽新股,第一隻抽中銀香港(2388),由八蚊升到十六蚊。但賺得最多,係玩細價股,幾危o架。一二年去美國旅行,見到玩具反斗城擺滿好多忍者龜,原來香港唔興,美國仍然大熱,於是開始留意生產商彩星玩具(869)。一三年九毫買入,今年初最高升到四蚊,我就賺咗超過五十萬!同年我行759,見到好多飲品由入口變成自家品牌,嘩,自己生產毛利高好多o架,嗰時股價由五毫升到最多五蚊,但我兩蚊就走咗,賺咗幾十萬。我都試過輸鑊甘,○七年用十四蚊買入中鋁(2600),點知撞正金融海嘯,跌到得一個四,蝕咗幾十萬。投資股票又好,今次出雜誌又好,我已經學識止蝕。

炒股咁多年,都賺到過百萬……又未到五百萬嘅!最近我就睇好高誠資本(8088),因為最近佢哋想收購一間內地非上市電影音樂娛樂公司,想發展內地市場,我睇好內地娛樂公司發展潛力。

PermaLink: https://articles.zkiz.com/?id=124203

Next Page

ZKIZ Archives @ 2019