ZKIZ Archives


講心唔講金 鄺美雲愛上無樓樓神

2012-10-11 NM




四十九歲Cally鄺美雲終於等到遲來的春天,近日自爆覓得有情郎,與恒基兆業地產營業部總經理林達民,蜜運兩個多月,唔介意對方離過婚有個二十歲兒子,更加唔介意人稱「樓神」的林達民無樓揸手。傳聞有五億身家的Cally,紆尊降貴同打工仔拍拖,講心唔講金!唔怕將來俾人指指點點計身家計地位,亦無諗過要結婚:「以前我好介意人哋點睇我,而家唔會,我鍾意咪得囉!」Cally說。響單身警號

拍拖僅僅度過三個月「安全期」,Cally願意大方公開,全因為另一半。「我拍拖身邊好多朋友都知,亦唔介意俾記者知,只係唔想專登講出嚟,但我見到有記者亂寫嘢(指林達民有老婆),所以想講清楚。」Cally說。回想今年五月經朋友介紹認識,Cally說當時並沒有一見鍾情的感覺。「因為佢公司想搞一個同珠寶crossover嘅活動去介紹樓盤,我哋成餐飯都係傾公事,只係覺得大家幾啱傾。」事隔半個月,Cally與林達民再次見面食飯,才漸漸有觸電感覺,為了「公還公,私還私」,兩人寧願取消生意合作,正式發展成為情侶。「咁多年嚟身邊朋友一雙一對,去佛堂見到兩公婆『同修』自己都好羨慕,其實今年年頭自己同自己響咗個警號,突然諗起年底我五十歲,仲唔拍拖,咁點算?」

唔做煮飯婆

Cally承認過去十多二十年,一直為事業拼搏,錯過不少拍拖機會。「以前成日覺得做乜要拍拖,多個人喺身邊阻住晒,除非你另一半同你一樣咁忙,會體諒到你嘅工作,而家我男朋友正正符合晒呢兩大條件!」對的時間遇上對的人,Cally說好耐未試過見完一個人,返到屋企感覺依然甜蜜回味。「我哋試過去餐廳食飯,由七點鐘坐低,傾到凌晨三點餐廳打烊,之後返到屋企仲要講電話。」男友只係打工仔,離過婚有個仔,就算Cally九七年同呂良偉有過短暫婚姻,但她是城中有名的富婆,女尊男卑,難免被人說三道四,不過Cally並未擔心。「有錢又點?都係一日三餐一張床,以前細個會好介意人哋點睇我,去大牌檔都唔敢,而家唔會,我自己鍾意咪得囉!」不斷在訪問中重複「拍拖好開心」,但對於將來再婚的可能性,Cally有少少保留。「我冇諗咁遠,冇理由要我唔做嘢留喺屋企煮飯抹地,咁會好嘥!」Cally說。

扮鬼扮馬賣樓

在恒基兆業地產營業部擔任總經理的林達民,今年五十三歲,早年從事保險業,八三年加入恒地由低做起,有超過二十八年物業銷售策劃經驗,目前是恒基物業代理有限公司董事之一。持有澳洲悉尼科技大學工程管理學碩士,以及香港理工大學管理學文憑的林達民,現時為香港地產行政師學會普通會員以及香港市務學會行政人員會士,每逢恒基新盤開售,林達民均要坐鎮,甚至要學對手「長實樓神」趙國雄,扮鬼扮馬傾力賣樓。

 
PermaLink: https://articles.zkiz.com/?id=38516

河國榮投票講心唔講金

1 : GS(14)@2016-03-06 16:12:14

河國榮、王灝兒(JW)及樂隊Kolor,昨日於荃灣出席「2016選民登記運動」啟動禮。本身已經是選民多年的河國榮說:「以前有時係冇得選擇,而家會投啲對香港市民有心嘅人,而唔係淨係對錢有興趣嘅人。」他又指剛過去的新界東補選,因他剛巧不在香港,所以沒有參與。此外,同場的JW被問到好姊妹何超蓮被傳和吳克羣復合一事,她代好友澄清:「係朋友,冇其他。」至於另一好友鄧紫棋(G.E.M.)則跟內地歌手華晨宇傳緋聞,JW表示只知道G.E.M.近日忙於瘦身,其他事就不太清楚。採訪、攝影:譚倩宜





來源: http://hk.apple.nextmedia.com/entertainment/art/20160306/19518186
PermaLink: https://articles.zkiz.com/?id=297031

圍堵校委案 李國章稱當晚是「暴動」 指受外科醫生訓練 鏡頭前鎮定但心唔定

1 : GS(14)@2016-12-17 23:49:35

■李國章昨稱並非憎恨馮敬恩,而是因馮人格有問題而看不起他。朱永倫攝



【本報訊】港大學生今年1月在沙宣道校園圍堵校委,時任學生會會長馮敬恩涉恐嚇校委會主席李國章案,昨在東區法院續審。李續作供時首次直指「嗰晚係暴動」,其他人「針唔拮到肉唔知痛」故不覺是暴動。他指中學、大學雖打過交,但都是一對一,惟當晚人多「可以成班人毆打你」。記者:勞東來 楊思雅



李國章昨指當晚「班人喺度暴動」,令傳媒不關心會議結果,估計是馮安排學生抗議。辯方指是由港大罷課委員會安排,李說:「唔知係咪佢哋搞呢個暴動出嚟,或者當初唔係計劃咁樣,但係失控。」辯方聞言指暴動是嚴重指控,李則指港大校長馬斐森亦曾斥當晚示威者是Mob(暴民),「有Mob先有暴動,Gentlemen(紳士)點暴動?」辯方質疑有暴民不必然有暴動,李斬釘截鐵回應:「嗰晚係暴動。」李最後承認他是第一個以暴動形容事件的人,他解釋:「針唔拮到肉唔知痛,我俾人打、俾人拉有感受,其他人可能唔覺得係個暴動。」


指以往打架一對一

李一再提到被人攻擊故受驚,辯方盤問他有否試過打架,李稱讀大學時打欖球曾打架,讀中學亦曾打架,辯方遂指「你嗰日唔使咁驚㗎喎,對打過交嘅人呢啲小兒科嚟喎」。李則說以往打架是一對一,但當晚人數眾多,假如被拉出保安人鏈外,「就可以成班人毆打你,或者拉跌你之後過嚟踩你」。辯方指有人拉住李的手,可能是因為失平衡,李認為不可能。李憶述去年7月學生衝入校委會會議室,他在鏡頭前雖表現鎮定,但「心入面梗係唔定」,不過他受外科醫生訓練,面對病人情況危急也要鎮定。他指案發當晚情況相似,分別是今次涉及暴力。李又認為拉他手臂的人不是記者,因對方「成口粗口」,又指當晚很多人講粗口。辯方認為李有代溝,因時下年輕人講粗口十分尋常。李則指視乎教育程度,不善表達的人才會用粗口。辯方續指因記者近距離追訪他,可能有份阻礙他離開大樓,李則說:「佢哋冇用粗口媽你……佢哋嘅專業工作唔係暴動、阻住你,唔可以將啲罪嫁咗落記者身上。」李供稱清楚聽到馮大叫「唔好畀佢走!唔好畀李國章走!隊冧佢!隊冧佢!」他形容「好似三合會嘅人想攞你命」。辯方稱馮沒有說過,質疑李說謊,李反問:「點解要講大話?有咩好處?」辯方指因為李憎恨馮,李否認。港大保安經理張憲君昨供稱,他當晚保護李和其他校委離開大樓,聽到馮大叫段首的話,之後示威者湧向李,馮猶如司令。案件下周一續審。案件編號:ESCC2357、ESS27186/16




來源: http://hk.apple.nextmedia.com/news/art/20161217/19868342
PermaLink: https://articles.zkiz.com/?id=319284

Next Page

ZKIZ Archives @ 2019