ZKIZ Archives


暗中作樂 黃德斌

1 : GS(14)@2016-01-20 23:54:50

2016-01-13 EW

螢光幕上的黃德斌,角色不是嚴嚴肅肅、不苟言笑,就是陰暗深沉,單是《刀下留人》中的那個劊子手「常綠」,便已經夠晒沉重。

「係囉!劊子手不嬲畀人嘅印象都係好肥、成面鬍鬚、心口有執毛㗎嘛,但我又唔係咁,可能編審見我成日都黑口黑面啩—呢句我自己講嘅,哈哈哈!」

正如很多笑匠私底下為人,通常都比較認真肅穆一樣,向來演慣cool爆角色的他,查實只要啱嘴型、熟絡了,他本來就是個這樣輕鬆生鬼、說話語氣招招積積的人。

所以,跟他相隔兩年沒見,我會問候一下他那六嚿腹肌是否仍健在。「佢哋好團結!成日都六嚿變一嚿!哈哈哈!其實都仲有啲嘅,爛船都有三分釘嘅!」

所以,這個訪問,我們傾談得更多的,反而是踩單車和跑步。

「我啲單車友之前成到團去台灣踩,咁啱套劇(《刀下留人》)就話出街;最近佢哋又會去澳洲,我又啱啱要開工(新劇《致命復活》),真係慘到呢!」

所以,我終於明白,為甚麼德斌最想演的角色,會是這個—各位請掃描QR Code上東周網睇片吧。

人氣德斌從來都不是個愛博見報的人,我發覺尤其在兩年前《金枝慾孽2》之後,他更見低調。「不如你講得坦白啲啦:點解呢兩年好似冇乜人氣嘅呢?哈哈哈!

「你問我點解咁低調,就要問吓公司嘞!哈哈哈!咁冇劇出街,咪冇乜人氣囉,呢啲嘢冇得介意㗎喎。其實我不嬲都冇刻意高調㗎,有時只係配合套劇出街,先出嚟做吓宣傳咁囉,好似上年咁,我都只係得套《風雲天地》同呢套《刀下留人》(出街)咋嘛,好彩係之後接住落仲有套《鐵馬戰車》——我咁多影迷,我都驚你哋會掛住我嘅,一陣喺TVB見唔到我就話喊晒呀,哈哈哈!」

沒有公開露面,當然並不代表冇工開的。「上年年頭,我拍完《鐵馬》就拍《刀下留人》,停咗兩個月,又拍咗套大陸劇咁囉。」那電影呢?「都有嘅,啱啱咪拍完套《寒戰2》咁囉!哈哈哈哈!」他一臉得戚地說。據悉在《寒》片中,他是飾演梁家輝的拍檔。「係囉,冇乜特別呀,咁叫我點可以高調啫?唔通大鑼大鼓周圍同人講:『我拍《寒戰2》呀!』咁呀?哈哈哈!一陣人哋問番我:『咁你做乜嘢角色呀?』『嗯……』喂!點答呀你叫我?係咪先?哈哈哈!」

痛苦

《刀下留人》口碑載道,黃德斌說,「常綠」這個角色確實不易做。

「編審最初寫呢個古仔,已經諗住由我同邵美琪做,我諗佢係想搵啲感覺有經歷嘅演員啦,因為呢個人(『常綠』)背負住太多嘢啦!由佢做劊子手開始,佢嘅一生都已經係悲劇!最慘係佢唔係天生殺人狂,又唔可以有感情——但人唔可能冇感情㗎嘛!跟住佢仲要對Maggie(邵美琪飾演的穩婆『花蕊紅』)動咗情,你諗吓,佢最後要親自斬Maggie嗰吓有幾痛苦?斬完之後又有幾痛苦?佢又冇得自殺!簡直生不如死呀!所以佢日常舉止同反應都好唔尋常,係我演過咁多角色之中,痛苦到最極致嘅一個!好大挑戰!」

角色悲慘沉鬱之餘,又要經常拍攝行刑場面,令他對此劇印象深刻。「最記得有場戲講凌遲,即係要逐忽肉割落嚟,例如判三千刀,咁個劊子手就要割到個犯第三千刀先死得,如果之前嗰二千九百九十九刀個犯死咗,個劊子手都要死,所以個劊子手仲慘過個犯!好大鑊!你話咁樣嘅一個角色、一套戲,點樣會唔記得呀?拍緊嗰段時間,搞到我自己都想屎(死)呀!

「最攞命係我拍完呢套劇之後,仲要停咗一陣先開工,個心係咁屈住屈住,咪惟有去踩單車囉,踩上去飛鵝山,一腳到尾,唔可以停喎!你話咁樣仲可以諗乜嘢呀?」

湊B

雖則說他本人不愛博見報,但最近很多報道也拍到他和拍拖十四年的女朋友黃美恩(Joyce),經常湊着一個約一歲的BB四圍去……「So?」加上之前又頻頻傳Joyce孕味濃郁,那其實是否已經秘婚、生埋仔呢?「我覺得寫嗰啲報道嘅記者編輯好好囉,驚我女朋友唔開心,唔寫佢肥,只係寫佢有孕味,哈哈哈!其實佢只係肥咗啫。」

咁個BB仔呢?「梗係唔係我㗎啦!我哋都係最近幫人湊咋嘛。講真,如果真係我嘅,唔係壞事仲乜唔認呀?要掩飾啲乜嘢呢?我都諗唔到。同埋如果真係我嘅,有乜嘢理由自己個仔都唔認先?唔係咁冇良心呀?佢第時大個睇番啲報道,真係會問㗎喎:『爹哋你做乜唔認我呀?』哈哈哈!最弊係 家有互聯網呀,以前報紙就話可以燒咗佢啫, 家互聯網,一google……哼!係咪先?大佬呀,咁都仲有得假?我都要對得住個細路先得㗎!」

但看那些相、那些片段,真係好似一家三口啊。「喂,我想問,如果有個好得意嘅BB,我畀你湊,你覺得佢好得意,你會唔會錫佢呀?呢啲係人之常情咋嘛。我知實有人會話:『冇理由㗎喎,個B唔係你嘅,你又會帶佢去公園玩,又帶去食飯嘅?』喂,咁BB唔做呢啲嘢,做乜嘢呀?哈哈哈!」

軟晒

德斌聲言,BB的父母都是圈外人,他和Joyce都只是視BB為契仔。「不過我發覺原來我對住個BB會係咁㗎喎。」即係點呢?「我以前以為我唔會寵啲小朋友㗎,但原來對住佢,我係會變㗎,我會好錫佢,好想畀最好嘅嘢佢,令到佢開心,一抱住個BB之後,嗰個感覺呢……硬漢喎?超!有幾硬呀?一個BB都搞掂晒你!真係㗎!

「其實我都想了解吓呢啲心態,因為我嚟緊套劇(《致命復活》),都要對住個小朋友,咁我 家都叫做略知一、二啦。」

那有沒有觸發起跟Joyce成家立室的念頭呢?「多謝關心,講完。」生BB喎。「未有計劃,多謝關心。」女人青春有限呀。「唔關事,如果結咗婚,對佢唔好嘅,結婚嚟做乜啫?係咪呀?喂,呢度都夠五千字啦啩?你將啲字放大少少就夠㗎啦。」

但黃爸爸總想抱孫吧!「有啦(德斌兄弟的兒子)!都唔細添!哈哈哈!」可能想要多個呢?「嘩!乜都佢想晒,咁大想頭?哈哈哈!如果佢郁吓就話想要個BB仔,咁咪有排生?係咪先?哈哈哈!

「(問)夠啦?呢度都一萬字啦!哈哈哈!」唔夠一萬字的話,麻煩黃生寫番畀我啦。

臨記黃德斌本身除了並非如螢光幕上的他那般cool爆之外,其實更是個勁風趣的人。訪問這天,我們一行人在他提議的大排檔邊吃邊傾,他甫坐下不久,一位在大排檔工作的姐姐,即時搽了口紅、補了妝,舉止如懷春少女般的走到他身旁要求合照。拍過照後,他忽然細細聲,一臉認真地跟我們說:「呢個百五蚊臨記,好抵!化晒妝,交足戲!」同枱的各位隨即笑到肚攣。

在傾談期間,再來一位美少女要求跟他拍照。美少女走後,他又再道:「呢個,三嚿!」我們再次笑到翻晒艇——我終於明白,何解「常綠」這個角色,對他來說是難演的。

撰文☆周彩霞 攝影☆梁比利 化妝☆Mi Mi Lau Make Up髮型☆Cyrus @ Hair Culture 服裝及場地提供☆WDSG設計☆吳俊彪
PermaLink: https://articles.zkiz.com/?id=294678

孖女友三人行似足一家人黃德斌抱B遊中環

1 : GS(14)@2016-03-08 16:12:49

【似爸爸】■黃德斌將熟睡的B仔抱入懷,女友在身邊看實儼如一家人。








【中環】捱足28年終於升格做無綫男一的黃德斌,雖然他話過事業有成後會迎娶女友黃美恩(Joyce)過門,但婚期未傳出,已經被指做了爹哋,事關德斌近期多次被影到與女友經常帶同一個年約一歲大的BB仔同行,他事後曾澄清只是做了契爺。



女友肉緊錫到啜啜聲

德斌與Joyce未有為報道而避忌,前日下午5時左右,二人在中環再次出動湊B,慈父上身的德斌抱着B仔在便利店門外等候,女友自己入店內買果汁,接着他們行到PMQ,不過行了10分鐘左右,B仔突然扭計狂哭,惹來不少途人眼望望,兩個大人輪流氹B失敗,最後選擇放棄,離開PMQ,離開前女友拿出果汁與德斌及B仔分享,情境儼如一家人一樣。



【飲橙汁】■女友拿出果汁,B仔似乎非常有興趣。

【爬樓梯】■到達PMQ後,黃德斌與女友拖實B仔上樓梯。DV圖片

【大喊包】■B仔忽然扭計狂喊,黃德斌落力


【收大禮】■玩足一日收到「牛肉乾」做禮物,黃德斌未有介意。


後來一行三人去到擺花街買有機食品,德斌與女友拖着小朋友,接着又輪流抱B,其間Joyce更肉緊地錫契仔額頭錫到啜啜聲,他們先將戰利品放上車,然後再去「來佬餐館」開餐,用膳約一個鐘才離開。離開時由德斌負責抱着熟睡的B仔,雖然整日行程換來一張牛肉乾,不過他亦一於懶理,先安頓B仔和女友上車,他才施施然拿起牛肉乾開車離去,記者還發現德斌的座駕後貼有一張類似「baby in car」的貼紙,果然細心。採訪、攝影:徐錦池、畢紹基





來源: http://hk.apple.nextmedia.com/entertainment/art/20160308/19520280
PermaLink: https://articles.zkiz.com/?id=297260

黃德斌被偷過千美元

1 : GS(14)@2016-04-23 18:37:50

黃德斌和萬綺雯前晚在越南拍外景返港,萬綺雯不慎中暑,她說:「40幾度真係隨時會中暑㗎!老公都有擔心,我同佢講黃德斌都有中暑!」除了中暑,德斌還遇上另一件傷心事,他說:「去到第三日,個背囊放劇組車入面嘅紅白藍膠袋收埋,但係轉頭就唔見咗,好彩攞咗個電話。」德斌被偷去千幾蚊美金、相機及一些珍貴相片,而證件及銀包則放在酒店未有丟失。





來源: http://hk.apple.nextmedia.com/entertainment/art/20160423/19582457
PermaLink: https://articles.zkiz.com/?id=299595

《致命復活》終極大佬係邊個?蚊蚊 黃德斌最大嫌疑

1 : GS(14)@2016-11-26 13:51:07

《致命復活》播咗一個禮拜,網民已經係咁估究竟邊個係big boss——即係,究竟邊個策劃郭晉安呢宗綁架案?又係邊個同越南黑警勾結,令民間搜救同警方呢十年嚟都搵唔到安仔下落。其實故事一開始已經有鋪排,劇中第一個犧牲者,可算係安仔被囚嘅關鍵人物——即係陳庭欣。已為人夫嘅安仔,背妻萬綺雯偷食同事陳庭欣。陳庭欣出場未幾即遭「一秒輪姦」致死,但稍後會有倒敘式回帶講番佢同安仔嘅姦情,陳庭欣仲影埋相,向萬綺雯挑機!咦,如果真係咁樣樣,咁今次綁架案,係咪萬綺雯………係喇,網民又拎番萬綺雯披頭散髮成個野人咁樣嗰張劇照——嗰part喺星期三出咗,係安仔嘅夢境。咁萬綺雯係咪奸?以下含劇透…萬綺雯係今次綁架案關鍵,而佢背後,仲有另一個big boss——黃德斌。黃德斌同萬綺雯喺越南青梅竹馬,男方一早有意,但萬綺雯當時愛上安仔。一直妒忌安仔嘅黃德斌,為求奪回所愛不惜做錯事;但同時,黃德斌亦係深愛萬綺雯,甚至可以為對方做所有事。睇番第一集黃德斌救萬綺雯嗰場,黃德斌將綁匪全部滅口,用意不言而喻。咁黃德斌係咪final big boss?唔好忘記,仲有一個面善心惡嘅張國強——最終Big Boss相信暫時都需賣個關子。萬綺雯前日接受傳媒訪問時,亦都唔肯講Big Boss係邊個,佢話﹕「老實講保險金就唔係呀喬呃嘅!到底係邊個好快就會揭曉。(黃德斌係咪終極big boss?)慢慢追落去咪知囉。」萬綺雯話同安仔已經係第三次合作,所以好有火花,佢話﹕「好多時唔需要講已經feel到大家想法,好有默契!咁當然同每位對手都好有火花,包括阿仔、德斌、奶奶、大哥、大嫂.....一埋位大家已經入晒戲。」




來源: http://hk.apple.nextmedia.com/entertainment/art/20161126/19845940
PermaLink: https://articles.zkiz.com/?id=317093

阿偉唔敢向德斌騷肌

1 : GS(14)@2017-01-14 12:25:44

音樂劇《尋找快樂時代》宣佈重演,原班人馬再加入新成員黃德斌,今次德斌做RubberBand阿偉的成年版,阿偉都覺得好笑,他還自爆被老婆狂寸:「佢話究竟黃德斌有冇考慮清楚㗎,黃德斌咁樣係年少無知!」阿偉表示今次仍然好緊張,要由頭到尾排過,會否在黃德斌面前騷肌?他即時嚇一嚇說:「唔使,咁後生版係瘦,年紀大先會變佬。」樂隊Mr.成員布志綸(Alan)囝囝就快一歲,農曆新年Alan派利是之餘又有得收:「小朋友第一次過年,盡量都想同佢一齊過,不過過年都冇咁多工作。」歐陽妙芝對重演表示好開心:「見到佢哋成個人精神晒,好似要出嚟唞一唞氣咁。2016最開心嘅時間就係同佢哋一齊過,3月重演希望都帶畀大家快樂。」採訪、攝影:曹家誠


黃德斌 資料圖片

■歐陽妙芝希望重演能帶給大家歡樂。



來源: http://hk.apple.nextmedia.com/entertainment/art/20170114/19896111
PermaLink: https://articles.zkiz.com/?id=322658

阿偉冇肌演少年德斌

1 : GS(14)@2017-02-18 00:51:27

以八十年代香港Band壇發展的音樂劇《尋找快樂時代》,去年於理大公演後反應不俗,劇團決定於下月底以原班人馬添食,並且加入新演員黃德斌。日前三位演員RubberBand的阿偉、Kolor的Sammy及KB受訪,負責演少年版黃德斌的阿偉表示完全不用操肌:「角色係講後生時好窮,飯都冇得開,點會操到肌肉呀,係大個咗有錢先得,所以啱晒,完全唔使操。」演員名單中有唱主音的布志綸、結他手Sammy、低音結他和鼓手就有阿偉和KB,完全是一隊Band的配搭,三人透露之後有計劃一齊做歌,希望可以在今年推出。採訪、攝影:曹家誠場地提供:The Stadium




來源: http://hk.apple.nextmedia.com/entertainment/art/20170217/19930502
PermaLink: https://articles.zkiz.com/?id=326760

【馮仁昭四圍超】黃德斌8號波拍拖

1 : GS(14)@2017-06-16 01:47:56

前日苗柏襲港打8號風球,黃德斌同女友Joyce約埋一班朋友去咗西環堅尼地城海旁,佢哋剛好食完飯,嗰頭有好多酒吧,一班人沿住酒吧街行,邊行邊吹水,之後風雨冇咁大,一班人就去咗海旁打卡。黃德斌同女友仲好甜蜜咁攬住影,打風都打唔甩,影完相就拖手仔返歸。事後德斌短訊回覆傳媒:「同朋友食完飯,經過感受吓強風,一陣就離開咗。」撰文:馮仁昭




來源: http://hk.apple.nextmedia.com/entertainment/art/20170614/20054851
PermaLink: https://articles.zkiz.com/?id=335473

黃德斌做大佬教訓KB

1 : GS(14)@2017-06-22 07:42:37

李健宏(Kevin Boy)最近推出新歌《我最喜愛的YouTube節目》MV,找來黃德斌做江湖大佬。MV一開始KB便被黃德斌手下捉住狂揼,原來黃德斌是為了幫過往在KB主持的網上節目《玩爆你個腎》中被整蠱過的薛凱琪等出氣。
MV用航拍一take過拍攝,KB於fb說:「爆腎踏入第七個年頭,我家KB就用佢嘅一首新歌《我最喜愛的YouTube節目》,去記錄一個對我哋好重要嘅節目,希望玩爆你個腎唔止係節目,而係一種精神,一種大無畏嘅進擊精神。」撰文:魯吉




來源: http://hk.apple.nextmedia.com/entertainment/art/20170621/20062712
PermaLink: https://articles.zkiz.com/?id=336229

Next Page

ZKIZ Archives @ 2019