ZKIZ Archives


最溫柔的男人徐榮

1 : GS(14)@2016-10-05 05:23:21

2016-09-28 EW

徐榮其實很有型,梳個all back頭,留一臉欷歔的鬍鬚,chok一個不羈浪子樣,甚至有點竹野內豐feel,也極符合《巨輪2》中,黑幫老大馬文泰應有的氣勢。

從跑龍套到成為男配角、主角,入行十六年,同屆藝訓班的楊怡和林峯,早就上了枝頭變鳳凰,展翅翱翔飛出去了,只有徐榮還在。

還幸也算是大器晚成吧?

「我覺得我所有嘢都嚟得好遲,但嚟得早其實未必係好事,可能一鋪撻死咗,慢慢磨利把刀, 家畀咩角色我都有信心可以做到。」徐榮聳一聳肩說。

相對於好型的徐榮,其實他更是極度《愛•回家》,好老公、好爸爸的印象實在太深入人心,以至連演黑社會大佬,都被網民笑評:「見到佢個惡樣就想笑,太慈祥,淨係會諗起佢抱住個女!」

是的,徐榮女兒包包(徐心怡),甚至可能出名過爸爸。

「係就好呀!我想佢搵錢多過我,開心死啦!」更笑言絕不介意被指父憑女貴。

甚麼男人最溫柔?他的名字,是父親。

輸在起跑線

徐榮的名字,其實是近年才為人所識,與他同期九九年入訓練班的,楊怡、林峯和楊明等早已成名。

「我廿四歲才入訓練班,比他們大五、六年,其實早就輸在起跑線。

「中五畢業之後一直做運輸,但九七年公司執笠,廿二歲,老闆話之後想搞餐廳,叫我哋幾個夥計去學廚,咁咪去學囉,點知學咗一年佢都冇開,嘥咗一年喺廚房。

「之後諗住考懲教署打政府工,但報完名到interview要等八個月,中間卡住個藝訓班招生,咪去試下囉,諗住玩吓,點知咁就入咗行,懲教都冇去見啦。」面對一班上位快過火箭的同學,做極都是路人甲、乙、丙的徐榮,坦言曾經眼紅過他們。

「見到楊怡同阿峯佢哋咁成功,自己開始會比較,但我明機會唔係人人都有,況且佢哋其實都有捱過,楊怡同我曾飾演一對浸豬籠嘅奸夫淫婦,浸咗落水,佢哋就放食飯個個走晒,我哋兩個喺豬籠入面你眼望我眼,大家互相打氣話『頂住呀!』、『頂住呀!』,諗番起都幾過癮。」

過癮還過癮,始終跑龍套搵極有限,他每個月只能靠着微薄的收入,甚至借錢度日,經常連日常自理都有問題。

「最窮試過銀行張卡得番八十蚊,撳唔到錢,唯有打畀朋友問有冇廿蚊過住嚟,幾乎成日都係咁,尤其月尾最手緊。

「直到有次拍完《酒是故鄉醇》,一撳錢望到,竟然出『爆騷錢』二萬九,我當時在櫃員機數數字,直頭唔敢相信,跟住即刻撳咗兩百蚊出嚟食嘢。」為生活,他也曾到處做兼職,開電單車做速遞、代客泊車等。

「最緊要搵到餐飯食!」

面對生活的壓力,說沒有想過放棄也是假,徐榮回憶說,曾經有位前輩這樣說:「只要一日唔退出呢個圈,梗會有機會!」捱足八年,終於等到機會。

《同事三分親》中的裘俊一角,開啟了他的處境劇之路,從《同事三分親》、《畢打自己人》、《天天天晴》到《愛•回家》都見到他的身影,成了處境劇的鐵膽。

「裘俊對於我嚟講,無疑係我事業嘅轉捩點,當時本來角色唔重,只係office入面嘅一個擦鞋仔,但多得關詠荷,拍到中段佢突然話想生多個B,跟住就辭演咗!但係套劇點都要有個主線繼續行,上面開完會覺得我同欣欣(江欣燕)條線都幾好睇,於是決定畀次機會我哋。」

慈父與嚴爸

處境劇讓徐榮嶄露頭角,但他的女兒徐心怡只在《愛•回家》客串了數個月,即時人氣爆登,紅遍港九新界。

「好多人話個女紅過我,喂!你睇吓先啦,雜誌本本都話佢係徐榮個女,唔係話我係徐心怡個老竇,應該仲係我紅啲呀嘛?哈哈!」拍完《愛•回家》後,徐榮幫女兒推卻所有劇組的邀約,令心怡被迫暫時收山息影,他解釋是不想麻煩到其他演員。

「其實只要舒服之餘唔影響到其他人,我都會畀個女出嚟。私心啲講,可以搵吓奶粉錢;唔私心咁講,的確有好多觀眾同網民都想見到佢,我都想將佢嘅成長過程同大家分享,因為我覺得佢係屬於香港嘅BB,全香港人睇住佢成長,啲片日後又可以畀佢睇番。」

對女兒關懷備至,相反對九歲的囝囝徐朗卻嚴厲得多,自小已訓練他獨立,更不時給予熱愛足球的他當頭棒喝。

「佢學基本功時,我鬧得好犀利,因為佢成日分心,就算贏波我都會同佢講有咩做得唔好,我係畀最多挫折佢嘅人。」但其實最想兒子做足球員的,正是徐榮,因他小時候也同樣有過「足球夢」。

「我唔否認有將自己嘅心願加在兒子身上,我細細個都想做足球員,但踢嚟踢去都仲係上環足球場。仔仔由六歲開始已經決志做足球員,到 家九歲都冇轉到,我就覺得我要幫佢實現呢個夢想, 家佢都喺正統嘅香港球隊訓練緊,要成為職業足球員。

踏實的浪子

一講起仔女,徐榮自然是滔滔不絕,眼神還不時流露出一絲笑意,真的很難想像這位「炫女魔人」原來曾是個「不育主義者」。

「結婚時完全冇諗過生小朋友,因為我一向都唔鍾意細路,不過太太話,既然結得婚,生小朋友都應該,於是畀咗一個限期去試,就在限期內有咗。好奇怪,生了仔仔之後,就開始鍾意細路喇!

生完仔,原來就連樣子都改變了。

「我以前個樣冇咁善良,是因為要照顧仔仔,個人EQ高了,忍耐力又大了,我以前不論外型或內心都是一個浪子,結婚有了家庭,男人就會變得有擔帶。」

不過,徐太Pinky就踢爆,原來這位浪子為人十分踏實,更可說是全不浪漫。

「我們○六年結婚,當時他連求婚也沒有,有日大家一齊坐在沙發度睇電視,突然就話我們拍了兩年拖,不如結婚囉?就係咁就結咗喇!」

徐榮並沒說話,只笑笑望着太太。

笑著吃苦也餓不死

最溫柔的男人名字,除了父親,還有老公。

徐榮與太太結婚十年,平淡中充滿幸福。

訪問當日徐太做「跟得夫人」,幫徐榮換衫化妝,執頭執尾打點一切,又拿着手機在旁拍攝做記錄。

望着一身西裝,官仔骨骨的丈夫,她更說出一句:「佢未試過呢個style,又幾型喎!」語氣中帶點崇拜傾慕之情,十足十小粉絲一般。

兩人結婚時,徐榮仍未「紅」,搵錢不多,前途更是頗為渺茫,但徐太說,這從來都不是她的考慮因素。

「冇 ,公一份婆一份,點都唔會餓親啩!」

還打趣笑說:

「又或者係求其執一件囉!哈哈!」

徐榮即時插嘴:

「其實係因為我夠有型,當時佢阿媽即係我外母,話我似木村拓哉呀!個髮型!」挽你手,就只因想挽手,誰要計算過能安享晚福才一起?

更何況,人生哪有得計?

撰文☆梁文威、羅琬恩 攝影☆梁比利 設計☆美術組
PermaLink: https://articles.zkiz.com/?id=311023

【馮仁昭四圍超】徐榮心痛細女撞傷

1 : GS(14)@2016-11-10 07:39:57

徐榮噚日喺灣仔出席活動,擔任關心謹腎大使,佢話自年過三十五歲年年驗身,只係間中有胃酸倒流,而家有一仔一女嘅佢,大仔徐朗得九歲,細女徐心怡就一歲,佢話:「哥哥暫時可以自己照顧自己,心怡仲細,睇少眼就出事,之前撼親眼角瘀咗,好彩冇大礙,我感覺好『揦』住呀。」今日張達倫結婚,徐榮話自己會做兄弟,會幫手接新娘,中間返公司開工,夜晚再去婚宴。撰文:馮仁昭




來源: http://hk.apple.nextmedia.com/entertainment/art/20161109/19827161
PermaLink: https://articles.zkiz.com/?id=314747

徐榮下廚囡囡興奮

1 : GS(14)@2016-11-27 14:27:49

徐榮昨日一家四口在鯉魚門廣場出席食品活動,他和囝囝徐朗父子檔上陣炮製美食,愛女徐心怡(包包)超級可愛,見到爸爸下廚興奮拍掌。廚藝表現熟練的徐榮說:「未入行前想同朋友開餐廳,索性喺跑馬地啲小廚自己學廚兩年,最終因經濟唔好而入咗行讀訓練班,而家好少下廚,只係過年幫手包餃子。」不過徐榮做生意團火仍然未熄,一直與好友計劃開飲食店。




來源: http://hk.apple.nextmedia.com/entertainment/art/20161127/19846599
PermaLink: https://articles.zkiz.com/?id=317233

徐榮怕囡囡阻進度

1 : GS(14)@2017-02-05 10:55:44

徐榮與太太昨日帶同兒子徐朗(Karson),以及女兒徐心怡(包包)到清水灣出席赤腳步行籌款活動,包包全程表現興奮。徐榮表示首次與包包做慈善活動:「頭先起步禮之後,要赤腳行少少,佢都有行,仲扭計想行多啲,不過我費事佢阻住大家進度。」徐榮希望與Karson到偏遠地區探訪感受生活,屆時不能打機、沒電視及冷氣,身旁的Karson即望住爸爸笑言:「你對我都好衰喎,我講笑咋。」徐榮坦言囝囝可以打機的日子,寧願不外出:「我都係長假、周末先畀佢打,所以佢特別珍惜。」採訪:盧妹攝影:陳俊強




來源: http://hk.apple.nextmedia.com/entertainment/art/20170205/19918124
PermaLink: https://articles.zkiz.com/?id=325551

【馮仁昭四圍超】徐榮陪女嘆粥光晚餐

1 : GS(14)@2017-02-18 00:51:24

徐榮嘅囡囡徐心怡(包包)可愛爆燈,自然成為活動同廣告商嘅新寵兒,日前佢哋為嬰兒用品拍廣告,包包仲連續兩年擔任代言人,簡直係BB界嘅廣告天后。包包當日正式拍攝時表情多多,伸脷瞇眼兼放電,?得工作人員好開心。問到徐榮點同小情人過情人節?佢話:「『粥』光晚餐,同包包梗係食粥!」撰文:馮仁昭




來源: http://hk.apple.nextmedia.com/entertainment/art/20170217/19930450
PermaLink: https://articles.zkiz.com/?id=326749

徐榮變暖男「馬子妮」「木偶哥」真名你知唔知?

1 : GS(14)@2017-04-28 00:54:35

大台時裝處境喜劇《愛.回家》係繼《真情》後第二長青電視劇,總共有995集,真係唔講得笑。《愛.回家》除咗創造出「做完愛回家做咩?」嘅金句之外,仲有不少藝人係因為呢套劇而多人記得。第一個要數嘅就緊係徐榮啦!佢喺《愛.回家》入面飾演馬強,同林漪娸演夫妻檔,而且角色個性格正氣,有承擔,簡直係「暖男」呀!其實徐榮都可以做叫處境喜劇界男神,由《同事三分親》、《畢打自己人》、《天天天晴》、《誰家灶頭無煙火》等等再去到《愛.回家》每一套都有佢嘅身影,而且印象都好突出。第二個要講嘅係「馬子妮」,其實人哋原名係蔣家旻,其實早喺《天與地》佢飾演年少版佘詩曼,大家都唔會對佢陌生。不過,唯獨「馬子妮」呢個角色最多人記得。不過,喺13年蔣家旻接咗葉念琛執導嘅電影《第一次不是你》,仲獲提名金像獎最佳新人獎;但係戲中有大量床戲而且尺度太激,搞到大台嬲豬,將佢放逐咗幾個月,好彩最後都可以返馬家「一家團聚」咋。第三個要數由林師傑飾演嘅「木偶哥」,睇過《愛.回家》邊個唔識木偶哥呀?林師傑戲裏戲外都係音樂人,先後為劇集創作多首歌曲:《騙徒》,《小木偶的話》,《逃出地球》,《小天使的話》,《不再說謊》,《木偶歌》。經過千辛萬苦終於同湯洛雯飾演嘅李思思一齊。第四個就係湯洛雯喇,劇中飾演李思思,其實佢不嬲有個朵叫「靚湯」,12年港姐出身嘅佢又喺《學是學非》入面做「是非精」,而且仲喺網民心中嘅女神,真係不得了。



難得生性暴龍哥創科眾籌夢,遭隱世肥報販秒殺! https://goo.gl/hnEB7D「蘋果VR」App
App store下載:https://goo.gl/0kW2cK
Google Play下載:https://goo.gl/4K7EHw




來源: http://hk.apple.nextmedia.com/entertainment/art/20170427/20002906
PermaLink: https://articles.zkiz.com/?id=331566

Next Page

ZKIZ Archives @ 2019