28年前分手 各自離婚後翻撻舞王麥德羅 娶Big Echo老闆娘
1 :
GS(14)@2016-12-18 11:04:22■身在大馬開工的麥德羅與Apple姐，昨日攬攬合照宣佈婚訊。
Big Echo老闆娘劉麗萍（Apple姐）今年東山再起重開卡拉OK，更宣佈與28年前分手的香港一代舞王麥德羅拉埋天窗！麥德羅與Apple姐同樣經歷過失敗的婚姻，如今再婚，Apple姐昨表示：「始終大家都年紀大，有乜嘢都可以互相照顧。」
現年58歲的香港舞王麥德羅，經歷過婚姻失敗，與前妻育有一子的他，32年前曾與劉麗萍拍拖4年，分手後兩人各走各路。Apple姐之後將日本Big Echo引入香港，被喻為一代K后。54歲的Apple姐亦經歷兩段失敗婚姻，育有兩女一子，她曾於高峯期擁18間卡拉OK，更一手發掘容祖兒，亦因為03年沙士一鋪清袋而破產，近日她東山再起於旺角重開Big Echo i-box，事業得意同時感情亦有着落，宣佈後年與麥德羅拉埋天窗。
■麥德羅於1980年曾與林子祥合作拍《摩登土佬》。劇照
■麥德羅32年前跟Apple姐拍拖4年，二人曾於活動上跟秦燕、張南雁和蔡濟文合照。
三喜臨門
昨日有周刊報道，Apple姐在22歲時曾跟麥德羅拍拖，當時認為對方花弗多女埋身及工作忙碌，最終跟麥德羅分手，並各自組織家庭。直至05年，Apple姐擔任企業顧問推出一款水機，邀請肥媽擔任代言人，肥媽在宣傳活動邀請了麥德羅做嘉賓，這對舊情人才再次重遇，Apple姐與同樣已離婚的麥德羅接觸多次後，重拾當年拍拖感覺，二人並於07年復合。訪問中，Apple姐表示從沒再婚打算，反正大家結過婚及離過婚，一紙婚書不再重要，但直到自己一次入院，麥德羅全心照顧，最終打動了Apple姐，兩人決定在後年、麥德羅60歲大壽兼入行40年舉行婚禮，實行三喜臨門。
■麥德羅於今年6月與王維德開騷，58歲的他表演一字馬。資料圖片
■上月28日，容祖兒現身撐伯樂Apple姐重開卡拉OK。
多次求婚
麥德羅現為Apple姐娛樂公司旗下藝人，二人正於馬來西亞做騷，Apple姐昨接受本報電話訪問時多謝大家祝福和關心，並說：「其實我同Robert（麥德羅）都一齊好耐，佢平時成個大細路，成日激嬲我都會買隻戒指畀我，借啲意求婚，不過次次我都當佢講笑，仲鬧佢唔正經，叫佢乖啲先講喇。」問到麥德羅最終打動她是甚麼原因？Apple姐說：「一個月前我胃痛入急症室，其中一欄要填緊急聯絡人，嗰一刻諗好似冇喎，啲仔女又唔喺身邊，嗰陣又嬲佢哋，所以咪答冇喎。但靜咗落嚟諗，如果真係有乜嘢事，好似冇親人幫手安排，當然我冇同佢（麥德羅）講過，點知佢突然有呢個安排。」至於婚禮細節，Apple姐說：「仲未有時間去諗，到時真係有個儀式，始終大家都年紀大，有乜嘢都可以互相照顧同安排。」麥德羅昨在電話則說：「會同60歲生日一齊搞，希望可以畀個求婚驚喜，唔講咁多住！」採訪：何慧斯
來源:
http://hk.apple.nextmedia.com/entertainment/art/20161218/19868803