ZKIZ Archives


中環在線:彤叔撐楊受成純官話睇定先 李華華

2008-07-22  AppleDaily

英皇鐘錶(887)噚日上市,夜晚就喺君悅搞慶祝晚宴,華置(127)大劉劉鑾雄、賭王何鴻燊、有線(1097)吳天海同黃玉郎都有到場,不過最畀面係新世界(017)彤叔鄭裕彤同純官鄭家純兩父子,佢哋先後腳到。

純官一早到場,有記者問純官有冇抽英皇鐘錶,佢回應話冇,因為諗住多人抽,佢唔會抽中。華華心諗,純官要貨,英皇鐘錶大股東楊受成點會唔畀,使乜同街外人爭?當記者繼續追問佢會唔會喺市場掃貨時,佢就話要睇定啲先,要睇大圍經濟先諗入唔入,純官買嘢明顯冇老父彤叔咁爽手。

後 尾到場嘅彤叔,華華問佢有冇入股英皇鐘錶,佢好爽快咁話「有。」咁入咗幾多呢?「有幾多入幾多囉。」賺得多唔多呀?「未賺夠,諗住長揸。」問佢點睇個市? 佢答話:「今日個市升,都係因為英皇鐘錶上市。」仲話:「你哋問英皇鐘錶好唔好,我實話好o架。」得喺佢身邊嘅楊受成鬼咁開心。不過英皇鐘錶招股書冇講 到彤叔係策略性股東,咁即係彤叔揸住英皇鐘錶唔夠5%股權,唔使披露確實股數,可以隨時沽貨。問到點睇後市?彤叔只係話會一路平平穩穩,至於睇幾多點?佢 話:「呢啲問四叔啦。」彤叔同楊受成不嬲老友鬼鬼,好似彤叔嘅周大福,06年尾就曾經以1億銀入股英皇國際(163)。

電郵:[email protected]
PermaLink: https://articles.zkiz.com/?id=1448

要股票唔要人工 中環在線:彤叔掌櫃算盤打得響 李華華

2008-07-30  HKEJ



蒙 古能源(276)主席魯連城,一向有彤叔鄭裕彤掌櫃嘅稱號,做得彤叔掌櫃,數口梗係精,就睇佢點樣將前身係新世界數碼嘅蒙能,轉型成為基金愛股就知。噚日 蒙能刊發最新年報,魯連城08年薪酬急升近兩倍,咪以為佢加自己人工,其實佢呢三年都冇收董事袍金同薪金,只係攞福利收入,而呢兩年福利收入都冇變,只收 64.8萬銀,至於佢今年人工大增,係因為以股份為基礎嘅收入多咗127.9萬銀。據年報顯示,今年蒙能向魯連城授出嘅認股權,可以每股7.284蚊行使 價換購69萬股蒙能。

持有股份市值92億

收股份唔收cash,魯連城嘅算盤當然打得響。舊年食正潮流喺蒙古開煤礦,由科網股 變身煤礦股,股價短短幾個月急升三四十倍,其間雖然有傳媒質疑佢嘅煤礦,令股價急跌,但無損蒙能氣勢,今年5月,蒙能仲俾大摩睇中,納入MSCI香港指數 成份股,刺激股價急飆,PE一度高逾2000倍,雖然家吓市況唔就,但PE仍有341倍,神話依然未滅。華華仲記得,舊年散戶愛股阿里巴巴 (1688),PE都曾經去過300幾倍,成為一時佳話,但家陣得番43倍,神話早就幻滅。家吓魯連城揸住19.44%蒙能股權,以噚日收市價7.86銀 計,市值92億銀,計埋若行使認股權有嘅69萬股蒙能,市值542萬銀,人工多少唔重要,最緊要係蒙能股價掂。電 郵:[email protected]
PermaLink: https://articles.zkiz.com/?id=1549

中環在線: 蒙能跌兩成彤叔掌櫃告急 李華華

2008-09-02 AppleDaily

彤叔鄭裕彤持有嘅蒙古能源(276)再度告急,噚日蒙能股價急跌22%,仲攞埋20大股份跌幅之冠。計埋上個禮拜四、五嘅跌勢,蒙能股價短短三個交易日急挫37%,市值蒸發近200億。

彤叔掌櫃、蒙能主席魯連城一停止公佈增持蒙能,股價即刻腳軟,所以佢即時做嘢,噚日用咗1130萬銀,再度增持200萬股蒙能,仲嗱嗱臨公告天下。

主僕齊出手

話 說8月27號嗰次入市,佢都第二日先出通告,噚日佢即日入市,即日出通告,仲係黃昏六點零五分就上到港交所個網站,咁趕,唔知係咪驚今日再跌過,所以早啲 提醒大家,有掌櫃撐住,大家今日唔好亂掟貨呢。魯連城由上個月19號至噚日,多次入市掃蒙能,合共增持1629.6萬股,使咗差唔多9000萬銀。掌櫃力 托都咪話冇用,話說蒙能喺8月中慘遭洗倉,8月18號股價急跌28%,得番3.5蚊,19號嗰日再跌,淨番3.1銀,當時市場傳出彤叔為撐蒙能,急 call好友入市,當然彤叔自己亦有親自出手,佢喺19號就以635萬銀,掃入200萬股蒙能,而魯掌櫃更連續幾日增持蒙能,將蒙能股價由低位三個幾,托 起反彈超過一倍,到上個禮拜三嘅8.95蚊。

賬面唔使輸

魯掌櫃入市撐蒙能,雖然使咗唔少錢,但由19號到家,蒙能由3.1蚊,升返到噚日5.65蚊,魯掌櫃賬面暫時睇落未使輸住,仲有大把本錢繼續再托股價!李華華電郵:[email protected]
PermaLink: https://articles.zkiz.com/?id=1996

中環在線:彤叔乖孫米蘭「獵艷」 李華華

彤叔乖孫、新世界百貨(825)執董鄭志剛(Adrian)下個禮拜會飛去意大利睇名牌。金牌運動員啱啱先嚟香港掃名牌,華華心諗,做得香港富豪第三代,要掃名牌梗係去米蘭啦,吓嘩!

香港頭炮唔衰得

不 過問多句,原來Adrian飛意大利係為檔生意。因為尖沙嘴河內道發展項目個商場K11由Adrian擔大旗,雖然佢喺內地負責過一啲項目,但呢個 project話晒係佢喺香港嘅處男作,自然想有好表現。Adrian噚日向傳媒介紹佢呢個項目嘅發展大計,記招之後,呢位水造嘅男人連灌兩杯水,跟住先 同大家講嘢。原來佢諗頭多多,話要搵啲有生活品味嘅租戶,又話宣傳要搞藝術提高文化,目的都係希望將個場打造成「精品式商場」,所以下個禮拜咪親自飛去意 大利同潛在租客斟生意囉。咁親力親為,可以話係2字頭嘅人辦,難怪阿爺咁錫佢!之但係,精品式酒店就聽得多啫,精品式商場即係點?Adrian解釋,就係 商場嘅品牌要有「lifestyle concept」(生活品味概念)、要有生活態度,佢最希望搵到啲有創造力兼領導市場嘅品牌,仲要係香港未出現過嘅新品牌,咁先畀到人新鮮感,所以佢會同 嚟自意大利及法國嘅品牌代表傾吓……果然有要求噃!

精品商場要揀客

除咗租戶要有態度、宣傳活動亦要有品味,一向鍾意藝術嘅 Adrian話,會安排本土藝術團體,喺個場度搞活動,實行將藝術融入購物文化咁話。咁高格調,怕唔怕同附近舊建築、購物點格格不入呢?佢就唔多擔心,話 新舊對照好吖,紐約都係咁。李華華電郵:[email protected]
PermaLink: https://articles.zkiz.com/?id=2004

中環在線:福布斯選最佳亞洲企業彤叔乖孫交足貨 李華華

2008-09-22  AppleDaily

過周末,《福布斯》公佈「200家最佳亞洲企業榜」,上榜包括自中、港、台華資上市公司,合共88家,佔個榜44%。個榜係按企業過去3年,營業額、盈利增長等選出,其中條件係過去1年營業額10億美金樓下(即78億港銀)。當中市值最大係阿里巴巴(1688),市值65.36億美元(509.8億港銀),雖然阿里巴巴股價唔生性,上個禮拜五市值得番407.7億港銀,但無損佢呢個榜市值一哥地位。至於盈利最高企業,係合景泰富(1813)。

理文李文俊踢出榜

華華留意到,香港有個富豪新一代入榜──彤叔鄭裕彤旗下新世界百貨(825)今年上榜,呢檔百貨雖然由阿仔鄭家純做主席,但近年都由乖孫鄭志剛(Adrian)擔大旗,今次佢都算交到成績畀阿爺睇。同人唔同命,同係新一代富豪李文俊,檔理文造紙(2314)就被踢出榜。據《福布斯》講,佢市值由上年30億美金(即234億港元),跌到得番5.88億美金(即45.86億港銀)。今年踢出榜,仲有上年營業額仲係6.93億美金、市值216.95億美金港交所(388)。美國金融企業巨無霸逐一檔,睇怕當地經濟有排衰。香港勝在背後仲有大陸頂住,一靠做內地生意上市公司,受影響反而冇咁大,有更加受惠北京奧運,好似李寧(2331)同內地運動服裝品牌鴻星爾克,都齊齊入榜。

福布斯200佳企業榜部份香港上市公司

‧港上市公司:李寧(2331)07年營業額:45‧港上市公司:合景泰富(1813)07年營業額:42‧港上市公司:信義玻璃(868)07年營業額:28‧港上市公司:阿里巴巴(1688)07年營業額:24‧港上市公司:稻香(573)07年營業額:21 ‧港上市公司:新世界百貨(825)07年營業額:10‧港上市公司:味千中國(538)07年營業額:9‧港上市公司:現代美容(919)07年營業額:8‧港上市公司:安東油田服務(3337)07年營業額:5單位:億港元電郵:[email protected]
PermaLink: https://articles.zkiz.com/?id=2274

中環在線:彤叔二孫終於有嘢做 李華華

2008-10-09  AppleDaily

噚 日新創建(659)公佈業績,華華記得今年3月新世界發展(017)嘅業績記招,台下坐咗個重要人物,今次梗要金睛火眼,『目及』實呢位重要人物有冇到 場,結果冇令華華失望,見到彤叔鄭裕彤第二個孫仔,亦即係彤叔長子嫡孫鄭志剛個細佬鄭志明(洋名Brian)。Brian今次由新創建執董、彤叔外孫杜家 駒陪住,同上次一樣好靜咁坐喺台下。華華記得上次見Brian時,佢只係入咗公司冇耐,仲係觀察同學習階段,未有具體嘢做,張卡片上只係寫「特別項目」經 理,今次再見面,梗要睇吓佢有冇進展。

當華華上前問Brian有嘢做未?佢好開心答話:「有喇!」仲即刻摷張卡片畀華華,原來係新卡片,「特別項目經理」 變咗「基建經理」。不過Brian都係怕醜,未有話畀華華知負責乜嘢基建項目囉。
PermaLink: https://articles.zkiz.com/?id=2554

中環在線:彤叔乖孫撐人和逆市升 李華華

2008-10-23  AppleDaily

金 融海嘯之下,噚日再有一家公司逆境中成功上市,就係人和商業(1387)。好多人都知,新世界(017)旗下嘅新世界策略係人和第二大股東,所以噚日新世 界發展執董鄭志剛都有出席掛牌儀式,唔知係咪因為咁,隻股走勢一開始都唔錯,大跌市中股價一度逆流而上;不過第二大股東代表(即係鄭志剛囉)一走,股價就 腳軟,臨收市先再發力,最後高招股價4.4%。

人一走 股價跌

有經紀同華華講,雖然人和公開招股時只有672人認購,又喺跌 市日上市,但都冇話跌穿招股價,真係要多謝彤叔乖孫鄭志剛。噚日乖孫鄭仲當場唱好人和o忝。作為人和聯席全球協調人嘅中銀國際董事總經理凌瀚燊,就梗係唔 認同口痕經紀嘅講法啦,佢話新世界做股東對上市係有幫助,但最重要都係人和本身嘅業務夠「堅實」,而且好多機構投資者支持,雖然散戶出現公開認購不足情 況,但只係佔整個集資金額6.6%,唔太重要喎。
PermaLink: https://articles.zkiz.com/?id=2799

中環在線:彤叔外孫加薪1.6倍 李華華

2008-10-28  AppleDaily



鄭 裕彤外孫杜家駒都係新創建執董,08年加薪1.6倍,839萬銀;購股權福利佔一半,達420萬。但人工仲未追到老竇杜惠愷嘅1017萬銀,身兼副主席 兼執董嘅杜惠愷,今年薪酬升兩倍。杜家駒律師出身,03年主動提出,加入新創建幫外公彤叔同老竇手,05年12月晉升為執董。06年杜家駒收289萬銀人 工,第二年加薪11%至321萬銀;唔計420萬購股權福利,今年佢嘅實際人工係419萬,升幅三成,絕對跑贏通脹。家吓杜家駒主力負責新創建嘅港口、物 流同水務業務。
PermaLink: https://articles.zkiz.com/?id=2883

中環在線:彤叔攞獎鮑威爾、董建華撐場 李華華

2008-11-06  AppleDaily

噚 日中環金融圈熱門話題,梗離唔開花旗總統「變色」,奧巴馬當選新一任總統,不過,花旗前國務卿鮑威爾,竟然連總統大選都唔理,山長水遠飛嚟香港,出席灣仔 君悅酒店一個頒獎禮,究竟乜嘢事咁緊要?咪係為咗頒獎畀鄭裕彤囉,彤叔獲加拿大西安大略大學(University of Western Ontario)頒發傑出商界領袖獎。

長孫唔跟家族傳統

加拿大西安大略大學嘅Richard Ivey School of Business商學院香港分校,噚晚慶祝成立10周年晚會,仲頒咗個商業領袖獎畀彤叔,又專登搵嚟鮑威爾親自見證,都咪話唔巴閉。唔單止咁,大公子純官 鄭家純好識做,見老竇同前特首董建華老友鬼鬼,專登搵老董嚟幫老竇打氣,有個咁有心嘅公子,彤叔唔止攞晒彩,仲好窩心o忝。呢間西安大略大學因乜無端端畀 個獎彤叔呢?查實彤叔家族同呢間大學有深厚淵源,唔少鄭家成員都喺呢間大學畢業,純官同三妹鄭秀霞當年就係讀Richard Ivey商學院,二妹鄭麗霞同第三代接班人鄭志恒,即彤叔細仔鄭家成嘅大公子,亦係呢間大學嘅畢業生。不過,純官大仔鄭志剛就冇跟隨家族傳統,而係走咗去 花旗哈佛讀東亞研究文學。10年前西安大略大學喺香港開設分校,向校友籌募捐款,聽講當時彤叔都出咗唔少力,大開水喉射住幫助分校成立。彤叔家族上下咁撐 母校,母校又試問點會唔醒水回報,送個傑出商界領袖獎畀彤叔。李華華[email protected]
PermaLink: https://articles.zkiz.com/?id=3098

中環在線:彤叔潮look波鞋會股東 李華華


2008-12-03  AppleDaily


潮人配潮鞋,唔少後生仔屋企梗有一兩對潮款波鞋傍身,新世界發展(017)主席鄭裕彤噚日出席一年一度股東會,除咗西裝打呔配西褲呢個正常過正常嘅Look之外,佢仲腳踏花旗國一剔牌波鞋,黑身、黃邊配白底,非常搶眼。

自己買定有人送?

彤叔一到股東會場,行路健步如飛,進出開會場地加埋去廁所都非常敏捷,唔講都估唔到佢老人家已經年過80。睇番一剔牌嘅香港網頁,對鞋原來公開發售都未夠3 個禮拜,公價承惠港紙699銀,價錢相宜。據介紹,對鞋嘅特點係鞋身輕巧,加強前掌推進力,可以提升速度表現。啲網上討論區仲話,呢個系列嘅鞋舒適好着,鞋身透氣,唔怪得彤叔行得特別快,又特別開心啦。華華最想知道係,呢對新款波鞋究竟係彤叔自己買,定係邊位有心人送贈o架呢?

代言運動股有市場

國務院總理溫家寶喺四川地震災後,着住一對灰色NEW記波鞋跑遍災區山頭,宣傳效果仲好過畀幾億真銀簽個代言人。華華認為,祖國波鞋商再嚟香港上市,不如直接搵大孖沙入股兼做埋代言人,着住對波鞋走嚟走去,認購反應應該唔錯。

新年快到,問彤叔有乜新年願望,佢話希望股票起番晒,唔好咁多人失業,個個平平安安啦!大老闆咁講,新世界員工可以安心過年啦!
PermaLink: https://articles.zkiz.com/?id=4331

Next Page

ZKIZ Archives @ 2019