ZKIZ Archives


傲兒伴舞 許冠文放笑彈阿Sam送肉嘴 歌迷狂呼

1 : GS(14)@2016-10-29 13:20:33

■歌神許冠傑前晚在紅館開騷,何傲兒晒美腿伴舞。



現年68歲歌神許冠傑(Sam)一連三場紅館個唱前晚開鑼,唱盡《印象》、《梨渦淺笑》等經典金曲,其中不少歌更是與糖妹、J.Arie和陳凱彤合唱,而何傲兒為《十個女仔》及《先敬羅衣後敬人》伴舞外,更大顯身手為《滄海一聲笑》彈古箏。阿Sam一向愛與歌迷互動,前晚個唱上他不停圍住舞台與粉絲握手甚至咀嘴,令粉絲high爆。每次阿Sam開騷,其兒子懷欣、懷谷及胞兄許冠文例必上台力撐,前晚阿Sam跟兩子演唱《摩登保鑣》和《賣身契》等電影歌曲後,許冠文便上台棟篤笑。許冠文指手機的發明令人與人之間變得冷漠,他說:「而家出到街個個都耷低頭,就算出到去同朋友食飯,個個都係一樣,淨係喺度睇facebook同WhatsApp,同啲唔喺度嘅人傾偈,反而唔同身邊嘅人講……真係似足死鬼老竇,佢未行之前,阿媽唔同佢講嘢,到老竇走咗,阿媽去拜山就鬼咁多嘢講。」最後,許冠文大彈過去十年情歌水準下降,並以《江南Style》為例,他邊跳馬舞邊說:「歌詞話『性感的女人呀,你着咗衫好睇過你唔着衫,性感的女人呀,快啲過嚟同我騎馬』,都唔知係乜嘢情歌嚟!」全場拍手大笑。


阿倫唯一偶像

阿倫譚詠麟前晚為阿Sam個唱擔任嘉賓,二人合唱《沉默是金》,將整晚氣氛推至高潮,阿倫說:「可能我係好多人嘅偶像,但係我嘅偶像只得阿Sam一個!」阿倫指他的《雨絲情愁》與阿Sam的《是雨?是淚?》很夾,希望將來可以合作將兩首歌crossover。安哥時,Sam最後以一曲《浪子心聲》結束演唱會。採訪:曹家誠攝影:沈健程


■阿倫(左)與許冠傑過往鮮有合作,前晚合唱《沉默是金》絕對是難能可貴。

■阿Sam前晚不停與粉絲嘴咀,前亞視藝人兼BabyJohn經理人黃美芬也有份。

■許冠文短短15分鐘棟篤笑令觀眾爆笑。



來源: http://hk.apple.nextmedia.com/entertainment/art/20161029/19815479
PermaLink: https://articles.zkiz.com/?id=313999

Next Page

ZKIZ Archives @ 2019