ZKIZ Archives


強訂配額 左丁山

2012-03-13  AD

未必位位女士都鍾意日日對住啲數字,個個星期計 ROE、 IRR呢啲咁悶嘅投資評估準則,就算做咗會計師、 CFA之後,到咗三十零歲,結婚生子生女,唔少女士就唔係想繼續拼搏做女強人嘅嘞,此乃人之常情,或者係天生出嚟嘅人性。金融 B話歐洲女性未必羨慕 IMF總裁拉嘉德女士嘅(前法國財政部長,前 Baker& McKenzie主席),佢地可能更鍾意做藝術家,時裝設計師,教師等等職業,如歐盟硬性規定企業董事局有起碼四成係女性,未免強人所難。
歐美政 府就係喜歡規定這,規定那,美國大學收生有種族配額,取錄非洲裔、拉丁裔學生有一定數量,不純睇成績,反之白人及亞裔即使考 SAT或中學 GPA高於黑人,都未必有機會入學,唔信就可以試吓加州大學柏克來與 UCLA。點解會咁,就因為美國有 affirmative action(平權)保護黑人,州立大學與私立大學都以達到學生種族多元化為目標及藉口,錄收考試成績稍遜嘅黑人。
幾年前密芝根大學被亞裔及白人 學生控告歧視,佢地成績好都不獲取錄,單官司打到上最高法院,大學勝訴。最近最高法院放出消息話要重新處理同樣事件,令啲大學招生辦公室大為緊張。剛於去 年十二月,奧巴馬政府先至發出指引,要求大學設法增加學生種族多元化,背景多元化(如多收清貧學生)及來源多元化(如不要集中於著名中學學生),如果大學 按指引做,他日被成績優異之白人或華裔學生控告歧視,最高法院又受理嘅話,好多美國大學嘅收生政策會一片混亂。
加州大學柏克來分校有一啲屬於共和 黨或保守派嘅學生在去年九月發起賣曲奇,價錢視乎族群而定,同樣一袋曲奇賣俾白人學生價錢要高啲,賣俾黑人、拉丁裔、印第安人就便宜啲,引起非議及投訴, 話價格歧異含種族歧視成份。但共和黨籍學生回應話:「同平權行為有乜分別呀?學校收生以種族性別列入考慮標準,咪即係一樣?」呢批學生反對歧視嘅方法有啲 創意,以價格帶出爭議點,人人都明白。

PermaLink: https://articles.zkiz.com/?id=31907

Next Page

ZKIZ Archives @ 2019