ZKIZ Archives


明年底嫁陳山聰賭王送超雲四億大屋

2012-10-04 NM




賭王何鴻燊嫁女,最緊要豪!當年何超瓊出嫁,擺足四日豪門宴,超儀則至少二千萬現金加澳洲豪宅揸手;與陳山聰愛得痴纏的超雲,計劃明年底拉埋天窗,賭王出手更闊綽,送四億豪宅給超雲做嫁妝。被未來外父稱做「皇帝」的陳山聰,好命到呢!

中秋BBQ

中秋節(九月三十日),何家三房女超雲超蓮在微博曬月餅,當晚三太一家和賭王在屋企玩BBQ過中秋,何家準女婿陳山聰,亦有出席。「呢一年,山聰已經入曬屋,同三房好似一家人咁,超雲啲細佬妹都好鍾意呢個未來姐夫,覺得佢容易相處,唔似得超雲個前男友王大業咁cool。」超雲身邊人說。陳山聰EQ高,冧掂三太不再反對兩人拍拖,連賭王也接納他做女婿;之前賭王養病追電視劇,見陳山聰在《洪武三十二》中飾演「皇帝」,之後開口埋口都叫他「皇帝」,可見兩人相處無問題。

潮味裝修

拍拖一年,何超雲和陳山聰不但夾份發展時裝生意,更計劃好明年底拉埋天窗。今年二月,賭王更以海外註冊公司「Beyond Best」名義,以四億三千五百萬購入香島道三十七號獨立屋,送給何超雲做嫁妝。「淨係裝修都使咗成千萬,設計時尚為主,完全符合超雲同山聰嘅品味。本來九月頭完曬裝修工程,但因為屋苑管理公司發現間屋有僭建,要求清拆,所以要搞埋啲手尾先可以入夥。」知情者說。

生意靠自己

一對「佳偶」早前到英國度假個多月慶祝拍拖一週年,上週四(二十七日)二人才返抵香港。據知,陳山聰今次在英國添置了十幾萬攝影器材,日日幫女朋友影相,再上載到instagram,玩「每日一Look」,營造Fashion Icon形象。「佢哋搞時裝生意,仲會出埋自己品牌,Mix & Match嘅衫有貴有平,啱番佢哋盤生意嘅未來方向。」

我要做model

為了建立屬於自己的fashion icon,超雲愛將每日一look上載instagram與眾同享,男友陳山聰買齊專業用的攝影器材,充當女友御用攝影師,非常合拍!

何超雲貴為三房長女,外界理所當然認為是賭王開喉支持她搞生意。「佢哋冇咁嘅打算,陳山聰做咗藝人咁多年,都儲落一筆本錢,夠搞呢盤生意。」超雲身邊人說。靠自己搵食,賭王對這個未來女婿亦愈睇愈順眼,連帶之前不睇好兩人的超雲密友,亦逐漸改變曬態度。「自從同山聰拍拖之後,超雲變咗好多,又開始鍾意煮嘢食,佢班朋友都接受曬,仲催佢哋早啲拉埋。」

國慶陪飲茶

十月一日(週一)中午,三太一家到灣仔福臨門飲茶,陳山聰當然陪到實。之後,再陪超雲到銅鑼灣整指甲,離開時,記者上前問何超雲是否計劃明年底結婚,露出甜笑的超雲略帶猶豫連「哎」了三聲,笑笑口說:「唔好催我喇!」之後與男友上車離去。大時大節,陳山聰陪實女友屋企人,做足二十四孝男友,「何家女婿何家妻」應該都十拿九穩。

趕回港與家人共度中秋節的超雲,在中秋當晚與男友及家人在大宅內BBQ兼賞月,妹妹超蓮更拿出十二個黃蓮蓉月餅出來共享。

何家嫁妝

做得賭王仔女,每年生日,都會收到老豆送大禮,滿十八歲更加送樓揸手。

何超瓊與許晉亨

於91年1月19日結婚,由於雙方均是有頭有面的大家族,喜宴在君悅酒店連擺四日,單是場地佈置已用了三百萬元。許晉亨與何超瓊離婚後,迎娶李嘉欣時婚宴更用上一億港元,其時有傳媒問賭王當年超瓊的嫁妝有幾多,他說︰「Pansy(何超瓊)那個時候是十倍!」

何超儀與陳子聰

在澳洲舉行一連三晚婚宴,新娘婚紗用古董lace以人手縫製,花了近二百萬港元。而賭王給何超儀至少兩千萬現金外,再加送澳洲黃金海岸大屋做嫁妝。

賭王長孫女何家華

於03年下嫁美籍IT才俊Michael Anthony Lesu,賭王包辦婚禮全部開支,並送上位於紐約的一幢豪宅作嫁妝。

PermaLink: https://articles.zkiz.com/?id=38243

Next Page

ZKIZ Archives @ 2019