ZKIZ Archives


那些年劉華力捧過的女生阿徐伴舞狂收負皮

1 : GS(14)@2016-03-19 22:15:55

又到講歷史時間,主角繼續係劉德華同佢long long time ago嘅愛將,除咗久違了嘅陳少霞,想當年,劉德華其實仲有兩個愛將,唔知大家有冇印象呢?第一個--徐濠縈,冇錯,你冇睇錯,係大家所認知嘅E神嫂、肯雅徐、康堤阿媽、潮流icon……!當年,同樣係90年代,正確啲嚟講,係92年,18歲卜卜脆嘅徐濠縈畀劉德華發掘,加盟「天幕」成為藝人。當時眼矇矇鼻唔細嘅徐濠縈,仲畀人話佢似足華仔個妹。得到老闆賞識,徐濠縈同年先後做咗華仔《謝謝你的愛》同《一生一次》嘅MV。93年劉德華喺紅館開20場演唱會,徐濠縈仲做埋劉華嘅伴舞嘉賓,風頭一時無兩,可惜當年外間對阿徐嘅反應認真麻麻,劉德華為咗顧全大局,亦要忍痛易角,臨時拉夫搵咗好友關之琳頂阿徐個位……。阿徐出道嘅第一部作品《天長地久》,就係飾演華仔個女,可惜星運一般,及後離開天幕之後,同陳少霞一樣,轉投無綫,但發展平平,徘徊喺二、三線角色之間,如《忘情闊少爺》、《天降財神》同《真命天師》,直至99年邂逅E神,扭轉命運……過去一段黑歷史,相信連E神嫂都唔多記得囉!第二個--亞視出身嘅劉錦玲當年畀華仔睇中,覺得佢有一種獨有氣質,即係o依家所講嘅「仙氣」。當年華仔更大膽起用劉錦玲做當時投資嘅電影《天長地久》擔正做女主角——係喇,即係徐濠縈做華仔個女嗰部,結果票房同口碑得出一個字--差。事後劉華亦承認呢套戲令天幕蝕得好甘,唔單止蝕錢,外界仲批評劉德華,唔應該搵一個藉藉無聞嘅新人去襯自己。錢銀事少,面子事大,自此,劉錦玲再冇出現喺華仔投資嘅電影。失落大銀幕,劉錦玲95年加盟無綫,拍過幾齣電視劇,最有印象都係《天龍八部》入面做深愛喬峰嘅阿朱。10年前約滿無綫息影,轉行賣保險,從此消失於幕前。





來源: http://hk.apple.nextmedia.com/entertainment/art/20160319/19536473
PermaLink: https://articles.zkiz.com/?id=298501

Next Page

ZKIZ Archives @ 2019