| |
||||||
2011-3-24 AD
|
||||||
|
有朋友嫌左丁山 久久唔寫吓馬圈，亦有讀者來函話日日睇「G G細語」，寫馬之日除外，正是順得哥情失嫂意，不過今日唔講打吡就手痕，一於寫馬又寫人。贏打吡，係馬主都想，左丁山都發過贏打吡之夢，頭馬獎金雖然無人 嫌多（九百二十八萬元），但最緊要嘅係榮譽，香港咁多富豪大馬主，冇邊個會恨嗰九百零萬，捧盃先至係最緊要，譬如南華足球班主羅傑承今年有兩隻馬參加打 吡，其中一隻「軍事行動」去年三歲贏紐西蘭打吡，另一隻「軍事攻略」在愛爾蘭贏過級際賽，兩隻馬講價錢嘅話，二千萬元怕走唔甩。又如「何方神聖」馬主蕭劍 平，佢與爸爸蕭百君及妹妹、弟弟等加加埋埋有成十隻八隻馬，隻隻幾百萬，邊會着眼於頭馬獎金吖。 記得好耐以前馬恩賜唔講東講西而係寫馬嗰 陣，提過有「無產階級馬」，意思係指血統一般，無人留意嘅低價馬。今年就係疑似「無產階級馬」贏打吡！賽前，左丁山在馬場七樓露台與一位大馬主閒談，佢養 過好幾隻高班靚馬o架，佢話贏打吡要講命、講運，每每人算不如天算，曾眼見不少朋友動腦筋，晨早準備，用過千萬元買隻靚馬，誓要贏打吡，但最後總係事與願 違，因無法解釋嘅因素而敗陣。故此事前佢對左丁山講：「羅生隻馬真係好靚，但未必贏到『雄心威龍』。」
據馬主N考證，呢隻 「雄心威龍」出自紐西蘭次一級嘅拍賣會，賣價未夠五萬紐元（未夠三十萬港紙），馬主林培雄養過好多隻馬，係資深馬主，買馬視作等閒，買呢隻馬來港，本來不 寄以厚望，上季在第四班表現平平無奇，今季估唔到贏完又贏，打吡之前贏五場輸一場，因贏到打吡預賽先至趕及入圍，可以參加打吡，點知厲害得咁緊要，與「軍 事攻略」硬拼之下，跑二千米而末段可以跑二十二秒六，餘駒唯有食塵，來價港元三十萬不到嘅馬可以輕取千萬金元巨製！賽馬世界就係咁奇妙。如果錢多就贏晒嘅 話，麥通酋長嘅馬應該橫掃全球啦，可惜唔係呢！引伸到現實世界，唔好以為出身貴族，加上牛劍哈佛教育就一定掂晒，可能會唔夠無產階級小子鬥o架。 |
||||||