| ||||||
農曆年,電視收視慣性偏低,但「創意無限」的無綫非戲劇製作總監余詠珊,卻一於少理,學習強國大台,於年廿九(二月九日)搞春節晚會《新春黃金慶典》,並且玩埋港、台、韓三地聯播。自知資源牙力有限,未必請得郁一班早已被國內春晚活動落釘mark實的阿哥阿姐,余詠珊於是氹掂月底返港做賀歲電影宣傳的葉玉卿,捱義氣預錄,為她一手策劃的山寨版春晚打定底!高層撐華姐讓路 以往慣例,無綫一年一度的《國際中華小姐競選》例必在農曆新年前搞掂,但今年則延期至二月二十四日舉行,雖然外傳是搵唔夠贊助商有關,但其實另有原因。原來余詠珊執意要在年廿九(二月九日)舉行一個香港、台灣、韓國三地聯播的春節晚會,要《華姐》讓路,空出人手及資源。「農曆年香港人鍾意出埠避年,rating(收視)一向都唔好,Sandy(余詠珊)氹掂公司推遲做《華姐》,又爭取到一大嚿錢做預算,部分環節仲要飛外地做,好落本。」一名無綫幕後人員透露。 卿卿俾面志偉 港姐公投成為笑柄,在無綫受到「特別保護」的余詠珊,地位絲毫不受影響,繼續搞作多多。雖然未全面落實春晚節目的內容,但她已預先氹掂今個月底返港、為賀歲電影做宣傳的葉玉卿,為春晚錄定一part節目。「咪又係志偉出面搞掂,佢一句幫幫手,卿卿就一口應承,連價都冇講,剩係收封利是仔!」即使官非纏身,但據知有份孭重飛的曾志偉,未有叫停飛往外地做春晚錄影的計劃,至於飛韓國定台灣,稍後才有最後決定。「志偉星期一(一月十四日)已經去咗警署做續保手續,下次再報到都係農曆年之後嘅事,呢段時間佢會專心搞春晚同賀歲片宣傳。」知情者說。 經理人部唔配合 高層拍板搞春晚,變相截斷了公司一班阿哥阿姐藝員大時大節搵快錢財路。據了解,由於樂易玲揸旗的經理人部門企硬不肯全面配合,令春晚節目有大部分內容至今仍未落實。「失驚無神話搞,啲客早半年前已經mark晒啲期做街外騷,都唔知去邊度唧啲期出嚟?有啲未有job嘅,一樣唔想做,大家都搏吓喺外面或者大陸有人搵,唔想錯過農曆年搵錢機會!」一名經理人部門的職員說。自己友同外援一樣難度期,已定名為《新春黃金慶典》的春晚決定放棄直播,改為錄影,由汪阿姐及鄭裕玲主持,葉玉卿外,暫時落實的演出只有阿叻同狄易達在西九長廊跳熱舞,陣容果然「鼎盛」! 屢試屢敗 余詠珊加入無綫後,為鞏固勢力,不斷招攬舊公司同事,又積極獻計推出「破格」節目,可惜全軍覆沒,收視和口碑都差強人意。 《爆足一周》 接收被商台炒魷的查小欣,推出節目《爆足一周》,節目出街被網民鬧爆翻炒舊料,最終播了四集便腰斬收場,成為史上最短命節目。 《港姐》普選爛尾 港姐40周年,余詠珊搞一人一票普選,但選舉當日,因電腦系統負荷唔到,臨時改由評判選出三甲,爛尾收場,結果無綫共收到477宗投訴,破晒紀錄。 《玩轉三周1/2》 余詠珊入無綫後的頭炮節目《玩轉三周1/2》,動用全台藝員停廠拍攝,但反應奇差,更被網民批評照抄足美國趣劇《MDDtv》和日本劇集《志村劇場》。 《走過烽火大地》 節目的預告片打鑼打鼓指攝製隊深入伊拉克、阿富汗及伊朗等地區拍攝,但節目播出後,被觀眾投訴貨不對辦,其中一集話去阿富汗,但大隊攞唔到簽證,最後只到了土耳其郊外的難民營,另外一集計劃去敍利亞,又因為太危險,返轉頭。 |
| ||||||
家長與兒女的溝通,不在乎時間多少,而在於質素。 九十後容德如(Catherine)記得小時候,每晚都見不到母親一眼,「只能把手冊放在枱面,第二朝起身就見到簽好咗。」要見面,反而在雲南山上。 容媽媽經營中國茶業批發,每年都要到雲南採購,她會帶着Catherine一起前往。這兩個星期相處聊天,幾乎多過兩人一年內說話的總和。在母親的薰陶下,Catherine亦因此愛上中國茶,兩年前創立自己的品牌瑜茶舍,透過媽媽在馬會的人脈,她能在馬會專櫃零售茶葉。 半年前在火炭開茶室,猶如中式café,一杯中國茶、配上芝士及雪糕等小食,吸引年輕人。對於女兒嘗試,傳統的容媽媽雖然未能全部認同,但也不會給予意見,「我有我想法,但怕講咗唔合佢心意,佢會覺得有壓力。」 這句說話,如呷一口茶,嗒落有味。 記者於兩個星期前,第一次前往茶室訪問,Catherine表示我們不能訪問媽媽,因為兩人正在「鬧交」,為的是在所有媽媽眼中、比經營一盤生意更大的事,她哽咽道:「佢話我三百六十五日都唔喺屋企食飯,無時間陪佢。」她回憶說:「我細個佢要應酬時,我都成日問佢,『你喺邊度呀?同邊個一齊呀?幾時返屋企?』」母女其實像一對情人,都是互氹,「惟有當佢係小朋友。」到上週記者再去,兩人已經言歸於好,容媽媽自信地反問記者:「我哋好closeo架,你同你媽媽有無咁close?」記者見Catherine的手機wallpaper,都是母女兩人的selfie。 容媽媽在Catherine小時候已和前夫離婚,一個人湊女、又要賺錢,擔子十分大,都看在Catherine眼裡,故即使平日母親無時間陪伴,她都不會怪責。每年最期待就是放長假時,可跟母親到雲南出差,「通常會留兩個禮拜,好珍惜嗰段時間,主要行不同茶山,話題都圍繞茶,閒時會一齊上網查找茶的知識,時間好快過。」這令Catherine由細個開始,已對中國茶產生濃厚的興趣及累積了一定的認識。她在英國中央聖馬丁藝術與設計學院畢業後,已決定回港投身中國茶生意。 坦言靠阿媽 容媽媽初到雲南前知道紫外線強,醫療設備不足,故帶了些防曬太陽油與必理痛,以備不時之需,亦當作手信送給茶農,「佢哋好開心,有一次我發現食水的水源不潔,有地方甚至沒有食水到,所以花了一筆錢做扶貧,逐漸建立感情。有一次Catherine發高燒,佢哋喺酒店大堂等我哋幾個鐘,又不停想各種方法退燒。因為同茶農做咗好朋友,所以並非普通買賣關係,是以合作社形式運作。」容媽媽退休,Catherine順利接手,不過當中發生過一次小插曲。事源上年因雨量過多,茶的質素相對差,茶農先斬後奏將茶葉送出後,才致電Catherine指有幾萬元茶已經在運送途中,為保持雙方關係惟有「硬食」。為了增加茶的種類,除了去雲南買普洱,她也隻身跑到台灣茶庄,「佢哋見我咁細個,以為我買手信玩吓,見到我識睇湯色、茶渣的質地,先有心同我傾,最尾選咗木柵鐵觀音,同金山烏龍茶。」採購好茶,最初把茶葉重新包裝,在馬會寄賣,她不諱言媽媽是馬會茶顧問,靠的又是媽媽的關係。但也有靠自己,「我以前性格男仔頭,喜歡睇漫畫、彈結他、自由搏擊。」但因要出席商會飯局,認識有消費力的老闆、合作夥伴,開始扮靚,「靚都係一個優勢,因為商界大多是男性。你唔知機會幾時到,所以要show-up,好似去五金商會,有一個老闆欣賞我的茶,向我買幾萬蚊茶。」亦有老闆選用瑜茶舍作禮品包。積極的她連到餐廳用膳,都會送出茶辦,雖然機會渺茫,但嘗試千百次總會有成功機會,米芝蓮食府「廚魔」就是這樣認識,每兩星期向她購買約十斤茶葉。 將茶葉飛甩老土 半年前於火炭設立瑜茶舍門市,只有二十多歲的她,坦言全靠媽媽資助,故一切都「慳住使」,瑜茶舍選址火炭一幢舊工廈,要穿過破舊的走廊,才能進入茶室,「選擇工廈因為租平,作為起步點唔錯,除水電以外,牆壁髹漆、購買家具並裝嵌,全都一手一腳落手做。」為顧着媽媽荷包,買個洗手盆Catherine都比較過三十多間公司,最終以三百元成交,整筆裝修以超低價八萬元完成。這裡就如中式café,walk-in客order一壺茶葉,視乎品種,由六十八至一百二十元不等,可以無限加水,坐多久都可以,要配上合襯的茶點另加大概四十元,Catherine坦言比起賣咖啡毛利更高。Catherine運用其年輕,了解潮流的優勢,把生意打入年輕人的世界,「近年流行文青路線,好多人上嚟影相打卡,因為鄰近中大,所以有一批中大師生經常捧場。」另外作為樓上鋪,需要有綽頭招徠。Catherine從媽媽身上承傳了各種茶的知識,對茶的特色瞭如指掌,認為飲茶亦不一定配蝦餃、燒賣,芝士、煙肉等亦能與茶相配。上星期六工程師學會包場,一行十八人學一次tea pairing,「我哋先試普洱,通常品茶分三口飲,感受不同溫度的味道。飲完可以拎一件芝士食,因為黑茶普洱去油,所以配油分高的芝士。另外紅茶滇紅味澀,可以配甜的雪糕;白茶白牡丹清香,可以配藍莓乾;綠茶龍井蔬果味明顯,可以配乾秋葵;青茶大紅袍以炭焙,可以配煙肉。」收費每人三百元,既能賺錢又能宣傳,很多客人之後會再買散裝茶葉離去。 與大企業合作 一個廿五歲的女孩,能夠毫無怯場於商會中游走,Catherine指全因媽媽小時候間中會帶她一同應酬,「那些經驗幫我好多,嗰時開始習慣同大過我嘅人相處,中一嗰時我都係同中六生玩。」去年十二月透過商會的朋友穿針引線,介紹她為騰訊擔任茶顧問,「第一次去睇真係嚇一跳!為讓高層感覺備受尊重,騰訊有員工服侍管理層,但員工對沖茶完全無概念,竟然係用咖啡壺沖茶,外行人都知道有問題啦。玻璃比用茶壺散熱速度快好多,焗唔出味。」Catherine收約七萬元顧問費,教授茶的基本知識,以及六大茶類的沖法,「例如黑茶普洱重發酵,需要用沸水;綠茶水溫可以低啲,但泡的時間長啲。泡茶要視乎茶壺的大小、茶葉的分量、水的溫度、泡的時間,要慢慢掌握,所以一個月先會上一堂。」為了令高層們養生有道,她亦教員工泡的茶應該隨季節轉變,春天鳥語花香飲花茶;夏天飲綠茶清熱降火;秋天飲烏龍茶暖身;冬天飲紅茶驅寒。目前Catherine忙於與不同品牌洽談crossover,希望建立知名度,曾接觸Log-On、誠品、Page-One這類主打生活品味的品牌,希望對方讓她擺檔,加強她的零售網絡。生意上軌道,Catherine心中最大的憂慮是:「我唔係擔心瑜茶舍,而係我太忙無時間同佢相處,媽媽會唔開心。以前我喺屋企等媽媽,依家佢等番我。佢都會扭計,惟有多啲報告行蹤,又影相俾佢睇。」 開業成本(10/15)租金(2按1上)$30,000 裝修$80,000 入貨$10,000 總投資$120,000 每月收支(02/16)營業額$150,000 人工$20,000(Catherine、一位長工)租金$10,000 入貨$55,000 雜費$3,000 盈利$62,000 撰文:孫樂祈攝影:鄭樹清攝錄:廖健昌[email protected] |