峇里預支蜜月吳若希拖男友示威
1 :
GS(14)@2016-08-03 02:44:062016-07-28 NM
吳若希（Jinny）被拍得同30歲澳門有米商人何兆鴻（Alex）同遊泰國後，當時人「放閃」公開戀情，不過隨即引爆男友Alex拍拖期間同前度Toby仍保持肉體關係，吳若希反變小三！戀事變成是非，但二人繼續愛得高調，密密出埠，甚至大方於公眾地方十指緊扣。拍拖睇《寒戰2》
因為長駐澳門，揚言只想與吳若希牽手到白頭的Alex，惟有密密赴港，向女友交人。早個星期六（七月十六日）晚十點，著上白色連身裙加一件粉紅色外套的吳若希做柴可夫，車男友去數碼港拍拖睇《寒戰2》；入場前，先到小食部排隊買嘢食，其間吳若希挨住男友，旁若無人，無論Alex講乜，她都心心眼，交足反應，甚至將扣住的兩手，齊放到小食部櫃位上，十分寃氣！
歎完糖水返屋企
月初被踢爆拖手遊泰國後，拍拖只有五個月的吳若希大方承認戀情，公開宣示正印身份。上個星期，二人又飛到峇里島同陽光玩遊戲，Alex更在IG貼二人拖手仔相，大晒恩愛預支蜜月。上週六（二十三日），「蜜月之旅」結束，明顯叉足電的吳若希同男友十指緊扣行出閘口，之後直落去元朗B仔涼粉食埋糖水，才雙雙返回吳若希香閨。「Alex喺澳門的確有唔少生意，以前乜都自己落手落腳搞，但同Jinny（吳若希）拍拖後，佢先肯放手俾其他人幫，自己就幾乎晚晚人肉速遞過香港瘟女，而家只要Jinny唔使開工，Alex就會陪佢出埠，話要等女友多啲機會relax喎！」身邊人說。
去年，Alex購入無綫藝員莫家淦的太陽眼鏡品牌「Hachill」澳門經銷權，一早睇中吳若希的他，周圍託朋友搭路，指定要搵女神吳若希做眼鏡店剪綵嘉賓。第一次見面，Alex已表現進取，把握機會同他的女神交換埋電話。「Alex一心想溝Jinny，但當時他同Toby啲手尾未搞清楚，所以Jinny對Alex嘅追求都有啲十五十六，後來打聽過知道對方家底唔錯，加上又真係啱傾，所以最後都開晒綠燈！」
唔會點蝕底俾人
可以短短幾年間成為圈中小富婆，二十四歲的吳若希一度盛傳被地產猛人林棣權（十哥）照顧，才可以住豪宅，揸靚車，但當事人堅持否認，直至遇到新歡Alex，才罕有認愛。「Jinny一向都多人追，追佢嘅都係年紀比較大，做得佢老豆嘅！雖然講出嚟未必有人信，但佢就係有咁嘅本事，只有佢着數人哋，自己冇乜蝕底。「係女仔都想搵個養得起自己，外形又襯嘅男朋友啦！Alex合晒佢條件，Jinny搵過相士夾時辰八字，又真係批佢兩個好大機會結婚，咁Jinny真係想做多兩年，等滿約就疊埋心水嫁人，所以佢都好緊張，mark實Alex。」吳若希身邊人說。
女殺手
入行六年，吳若希收過不少觀音兵，甚至有年紀大到可以做佢老豆的有米uncle，都唔放過。
溫家偉去年初，與溫家偉（大隻仔）於旺角拍拖，當街親熱又攬又摸，其後吳母遇車禍，男方更陪伴左右。
鄭俊弘合作《星夢傳奇》期間，二人朝夕相對撻着，更被斷正甜蜜放狗，對此，當時名草有主的鄭俊弘竟大方表示：「Yeah！開心！」
周志文14年，搭上巨聲幫大孖周志文，但二人好快分手，去年初又一度翻撻，孖住去環球嘉年華，其間態度親暱。
十哥（林棣權）盛傳搭上有米地產商十哥（林棣權），得金主特別照顧，即時由屋邨進駐何文田豪宅，出入揸百萬波子，生活十級跳。
黃子恒去年合作無綫劇《實習天使》一撻即着，吳若希主動做司機接男方收工到赤柱撐枱腳，漫步碼頭吹風談心。
撰文、攝影、攝錄：娛樂組