2010-12-7 AD
|
||||||
|
大行信唔過？有萬千小股民擁戴嘅股海明燈、《信報》董事曹仁超噚日話，喺過去17年，啲大行估恒指表現「冇一個估中！」即係華華之流嘅股民俾大行點足17年？ 查實見慣大場面嘅曹Sir又點會踩啲大行踩得咁盡呢，佢只不過係想話，今時今日呢個世界嘅訊息實在「瞬息萬變」，真係好難去估下一年嘅恒指，佢同朋友由80年到97年都玩過估恒指遊戲，但係都唔多估得中，結果佢喺97年開始拒絕再玩。 短期最多跌到22500 至於個世界瞬息萬變成點？曹Sir舉個例話，好似近日花旗國政府竟然有意再整多輪QE3，美元即刻應聲下跌，你話點估呢！ 唔 講恒指出年幾多點，短期走勢曹Sir就有啲把握。佢話近日港股向下調整，最多跌到22800至22500點，之後又會展開升浪，甚至有機會高過11月嘅高 位，升到26000點。至於近日hit爆嘅topic：「央視話有10萬億熱錢囤港」，曹Sir話，據佢近年成日畀內地傳媒訪問嘅心得，呢個純屬個別傳媒 記者做嘅新聞，背後唔會隱含領導人嘅意旨，大家少安毋躁！佢又話o依家內地傳媒報道已經好自由…… 講開曹Sir，但凡上過Youtube睇 片嘅人，都知道曹Sir嘅普通話，一直同古天樂叮噹馬頭，但唔知係咪近年成日操普通話操得多，佢嘅普通話真係進步唔少，噚日喺「香港經濟峰會」再露一手全 程「煲冬瓜」，冇晒以前嗰啲「SEE（勢）」、「小白two（小白兔）」呀咁，五個字講晒，曹Sir係得嘅！ 「聖誕鐘咪買滙豐」 細 個嗰陣「聖誕鐘買滙豐（005）」係每年年尾投資者嘅順口溜，甚至係習慣，但係經過時間嘅洗禮，今日曹仁超教大家「聖誕鐘千祈唔好買滙豐」！曹Sir解 釋，o依家啲銀行股明顯落後大市，但只係大陸同香港嘅銀行股投資前景較好，美國嘅銀行股喺升市中仍然跌緊，而歐洲嘅銀行仍然有壓力，所以嘛，滙豐係唔炒得 過o架……好彩佢唔係話「買咗滙豐就陰功」，都無咁驚，事關滙豐呢隻股，仲係好多少女嘅嫁妝、小朋友嘅教育基金嚟o架！所以，唔該獅子行班管理層加油，為 香港人努力喇！ 李華華 |
||||||