|
||||||
|
巴菲特與蓋茨到 北京，與一小撮中國富豪吃晚飯，講慈善。因內容保密，唔知佢地講乜。講到捐身家，各地民情不同，不可一概而論，更不可以美帝國主義一套方法嚟中國硬銷。美 國人經常以為佢地嗰套既然運作良好，就可以放諸四海而皆準，實則係大大錯誤。譬如巴菲特、蓋茨係貨真價實嘅大富豪，三四十年來如何發達，累積財富，交咗幾 多稅，美國政府瞭如指掌，美國公眾亦知道好多，冇得呃人；但中國富豪喎，真正有幾多錢，如何發達，背後有無國家或貪官資本支持（即係富豪其實只係一名收租 佬），負債如何，資產值扣去負債之後，還剩低幾多，以上種種，還是一個謎，要佢地捐一半、全部，或三分一身家，咪打開肚皮俾人睇，或者係慷他人（背後支持 者）之慨？巴、蓋兩人應在北京上番幾課「中國國情」，唔好懶天真咁以為人人都似佢地兩位咁透明。 一位香港富豪在星期六打電話俾左丁山，講出 另一個中國富豪不願捐大錢之理由。呢位慈善富豪C先生說：「Jet Li（李連杰）好想在中國成立一個慈善基金，以美國基金模式運作，回饋社會。但係中國至今堅決拒絕發牌，不批准任何私人基金會成立；在中國要成立一個『蓋 茨基金會』、『巴菲特基金會』、『李連杰基金會』之類，唔會攞到正式牌照嘅，一啲小型低調基金，其實係冇牌嘅，中國政府可以隨時冚檔。如果要在中國捐款做 善事，就係（一）直接捐俾受惠機構，例如學校；（二）捐俾甚麼官辦黨辦基金會，呢類基金會嘅幹部，照道理係在清水衙門辦事，但不少幹部竟然帶金勞見人，你 都知係乜嘢一回事啦。可以話俾你聽，中國一日不准私人基金會攞牌，中國一日唔會出現蓋茨基金會呢類慈善機構，中國富豪亦唔會好熱心捐錢。」 中國政府點解唔發牌俾私人基金會，道理好簡單，普天之下，莫非「黨土」，怎可以容許私人組織在中國萌芽，以至泛濫！有此背景，蓋茨巴菲特到中國宣揚美帝國主義色彩嘅慈善捐獻，理應驅逐出境，不過佢兩位係資本主義嘅頭號資本家，中國俾番幾分薄面啫。 |
||||||