ZKIZ Archives


打內戰:閂埋門玩《巨聲4》蕭正楠梁烈唯內定入圍

2013-04-18  NM  
 

 

無線已停辦兩年的《超級巨聲》,今年再度復活!三屆《巨聲》只得林欣彤及許廷鏗彈得起,與其嘥力捧新人,無線變招,索性閂埋門搵藝員參加比賽。自己友玩曬,據知備受力捧的蕭正楠、梁烈唯,已坐定粒六入圍。捧番自己友

內地電視台搞歌唱比賽節目,收視高,廣告財源滾滾,無線決定有樣學樣,抄最近被轟賽果造馬的《我是歌手》條橋,搵藝員參加比賽。近日藝員科已經開始廣派表格,日內將會舉行試音。

「之前公司簽落大班巨聲幫,結果搞到唔少三、四線藝員無嘢做,早排班阿頭開會,藝員科高層提議捧番自己友,仲講到明參加過巨聲嘅唔可以再參加,留番啲機會俾其他藝員。大家都覺得work,話曬啲藝員熟口熟面,佢哋比賽唱歌,隨時有驚喜,會幫到收視。」無線內部人士說。

據知藝員科已廣發短訊,通知有興趣的藝員攞參加表格,日內舉行試音,由藝員科和綜藝科的高層負責,挑選十五名藝員參賽。

「做哨牙仔出曬位嘅蕭正楠,成日想揸番咪做番歌星,佢一早內定有份入圍;有高層話梁烈唯唱歌似陳小春,演得玩得,亦預咗佢一份。」除了高層心水人選,有太陽娛樂黃栢高撐腰的沈震軒和唱家班出身的胡定欣及港男羅天宇等亦會參賽。

庾澄慶做導師

藝員比賽,之前的巨星評判陳潔靈、趙增熹、陳奐仁全部冇得留低;無線有意邀請《中國好聲音》的庾澄慶及陳奕迅做星級導師,並繼續玩全民投票,由觀眾做評判。「哈林(庾澄慶)嘅身價比起幾年前做《味分天下》貴咗好幾倍,不過老細肯俾錢,依家睇佢個期得唔得!」無線內部人員透露。記者致電音樂組監製麥鎮東求證,他承認正在招募藝員參加,日內將進行試音,但比賽形式仍在商議中,未全盤確定。

唱 出 財 路

近年內地電視頻道盛行歌唱比賽騷,當中包括《中國好聲音》、《我是歌手》等,均以超高價向歌手招手,出賽費抵如黃貫中,亦十萬起跳,逐round計,十分和味。庾澄慶、那英做星級導師的《中國好聲音》,節目收視高之外,還拉隊到各地開騷,豬籠入水。

PermaLink: https://articles.zkiz.com/?id=54620

「巨聲幫」撈過界搞真人實景game

2013-09-05  NM
 
 

 

「為咗夢想,你可以去到幾盡?」

「巨聲幫」劉威煌、周志文(大孖)及周志康(細孖),於○九年參加TVB舉辦的歌唱比賽《超級巨聲》,希望憑歌聲變巨星,最後雖落敗,但都叫薄有名氣。

上月他們再下一城,與TVB音樂監製葉肇中(阿中)

及填詞人宋沛言(阿言)共十一位拍檔,在油塘一座工廈內開設「異類教育」,客人要玩迷宮、密室逃脫等

真人實景game,過五關、斬六將,猶如TVB的遊戲節目。

不過「夢想」歸「夢想」,現實問題不少。

本刊找來海洋公園董事局主席盛智文

及真人game行家等,組成

「星級裁判團」,替「異類教育」評分;會唔會out,一睇就知!

「有個女生被殺了,嗚、嗚、嗚……」喇叭傳來女孩的哭聲。在「暗黑與想像」遊戲室內,八個玩家緊張地聽着聲音提示,在限時二十分鐘內,重組桌子上的積木,再從積木上的文字,鬥快搵出女生死亡真相。第二個遊戲,是「暴民之反擊」,玩法似Killer,玩家輪流分飾軍人及暴民,軍人通過手上的平板電腦殺人,暴民則透過閉路電視畫面觀察其他人的動靜,查出軍人是誰。

「異類教育」共有八個遊戲室,都以校園為布置主題,其他遊戲還包括密室逃脫、迷宮以及「多數決」等,當主持問到:「你是否喜歡唱歌?」假如你的答案跟其他大多數玩家不一樣,那就輸,就如電視節目《超級無敵獎門人》的遊戲。全部遊戲玩完需兩小時。「巨聲幫」老細劉威煌自信地說:「我哋花咗半年時間籌備,與同期興起嘅『密室逃脫』唔同。我哋係闖關遊戲,八位玩家要合作、亦要鬥拎高分。」另一老闆阿中滿腹大計說:「我哋遲啲會推出相關主題嘅小說,同搞虛擬樂隊。」投資額近一百四十萬,眾人雄心壯志可於半年至一年內回本。橋是過癮,但作為一盤生意,記者發現有後天不足之處。

位置:太偏僻

這類實體遊戲室,多設於旺角、尖沙咀等旺區商廈,方便客人即興組隊「挑機」。但「異類教育」位於油塘四山街工廠區,從港鐵站穿過房委會新開的商場「大本型」,再途經汽車維修場、貨倉,步行要十分鐘。記者第一次到遊戲室時,和另一群玩家同告迷路,須邊查Google Map邊致電職員求助。 在工廠開工時間,「異類教育」樓下的貨車車水馬龍,沙塵滾滾,唯一的客用升降機十分繁忙,玩家來到都無「玩」的心情;晚間卻又渺無人煙,只有剛收工剝了上衣的工人行過,玩家又唔敢來「玩」。負責「異類教育」電腦工程的李錦輝(阿輝)解說:「遊戲室需要大地方,好難搵,我哋一直主力搵工廈,咁啱識呢度業主,肯俾個好價。」「異類教育」佔地近三千五百呎,月租三萬,呎租八元多。事實上,觀塘、牛頭角一帶工廈,平均呎租較貴,約十三元,即同面積的地方,月租要四萬五千多元。一分錢一分貨,但阿輝堅持地點無錯:「如果真係一隊八位玩家都係女性,夜晚都會安排員工陪同來往港鐵站!」

遊戲玩法:多限制

「異類教育」遊戲設定需八位玩家同玩,股東之一,填詞人宋沛言(阿言)說:「一開始已經係諗八個,咁踢波都要十一個啦!」但問題是,七個不成,九個亦不行,人數限制「無得傾」!開業後,他們發現客人往往湊不夠八個,負責日常營運的郭富榮(阿榮)說:「唔夠人數,會詢問訂咗差不多時段嘅玩家頂上。如搵唔到人,客人又唔介意,唯有搵員工頂上。」記者認為上述方法未能彈性處理問題,負責市場策劃的張宏熙(阿熙)再補充:「我哋嚟緊會喺網上設立『約戰區』,等啲人自己湊夠人數,希望解決到問題。」另外,記者在遊戲室拍照期間,清楚聽到隔籬房另一批玩家的尖叫、玩樂聲,明顯牆壁未有加裝隔音設備。「喺裝修過程中,我哋已加厚咗啲牆同選用實心門。當初無預咁多隊人一齊玩,估唔到隔音咁重要,去到中段已好難修正。」負責舞台設計的李正綱(阿呆)說。「其實最傳聲係冷氣機槽,我哋已鋪咗隔音物料。有時玩家太興奮大叫,隔籬聽到咪當俾人感受吓氣氛囉!」記者後來隨另一隊玩家入遊戲室拍攝,一行人士氣高漲,但玩到「多數決」時,用作投票的平板電腦居然hang機,系統須重新啟動,令人相當無癮。開業一個月,平板電腦原來已「督」壞了三部,「可能玩家太投入。雖然唔係貴嘢,但都係成本。」阿輝呻道。

星級裁判團

「迷之密失」老闆吳子匡(Eugene)呢幾日好多客同我講玩過異類教育,佢哋都話好玩。其實概念都係抄《賭博默示錄》。我之前諗過做,但turnover rate(翻枱率)太低,玩晒要兩小時,我哋搞『迷之密失』,玩完只需四十五分鐘。而且佢哋位置喺咁遠,啲客都話難搵,對我哋未係威脅。成功指數:50/100

香港海洋公園董事局主席盛智文二百六十八蚊(正價)嘅價錢,喺香港標準嚟講,唔係平。尤其佢哋針對嘅係消費力唔高嘅年輕人。如果要俾呢個價錢去玩,一定要好玩到令人難以置信!成功指數:50/100

玩家陳小姐呢度比逃出密室有多啲唔同嘅遊戲玩,而且唔似密室咁困住咗,解唔到謎就無得郁。遊戲中用到平板電腦幾新鮮,不過如果中間有機會拎一次貼士、易啲過關會更好!成功指數:80/100

香港城市大學商學院市場營銷學系副教授梁偉強呢類遊戲係俾機會玩家去歷險,學習點去同一批同時係隊友、又係對手嘅人相處。好多公司願意俾呢啲錢讓員工參與,如team building,一定有市場。但個市場競爭咁激烈,如果只係俾到人一剎那刺激而無咩得着,就好快會被淘汰。成功指數:50/100

宣傳:錯估形勢

「異類教育」與近期流行的「逃出密室」系列,都屬於室內實境遊戲。雖然玩法上有出入,但都是針對同一群玩家,而後者早已開到成行成市。加上,「異類教育」現時收費每位二百二十八元,較「逃出密室」貴約一百元,價錢競爭相當輸蝕。而玩家亦偏向玩過就算,玩家黎先生說:「好玩啊,但除非有second attempt discount,否則唔會再玩。」「巨聲幫」原來未詳細計劃「轉遊戲吸客」的安排,只粗略預算平均三個月轉一次,但熟客容易玩厭。為搶客,「巨聲幫」碌盡友情卡,製造「明星效應」。阿中說:「咁多partner,個個有自己network。」他們於上月開幕禮,請來張敬軒免費擔任嘉賓,又有其他「巨聲幫」成員,如林欣彤等試玩。同期又舉辦「222宣傳」,「就係俾二百二十二人試玩。一來當宣傳,二來當壓力測試同收集玩家數據。」不過,劉威煌承認,宣傳上錯估了形勢,「原計劃於七月開張,食盡暑假檔期,但因為太多設備未準備好,最後延至八月中先開幕。」他們希望保持神秘感,故只靠網頁及facebook宣傳,而網站上亦完全沒有透露遊戲內容。採訪初期,更禁止攝影師以近鏡拍攝遊戲房的情況,希望吸引客人揭開「神秘面紗」:「點知咩都唔講,反而吸引唔到客,係要講啲唔講啲先最好。所以我哋製作緊廣告,遲啲會出。我哋仲會喺facebook同網站透露更多遊戲細節,等玩家有多啲了解。」他說。

延續夢想

劉威煌、大孖及細孖○九年參加《超級巨聲》,劉威煌更是當屆隊長,但未能勝出,現在只間中在TVB大型節目中過鏡演唱一、兩首歌。而孖仔更少唱歌機會,主要在TVB拍劇。不過由於樣貌太相似,即使記者和同事每晚追看《衝上雲霄2》,至今仍未能分辨到飾演飛機維修員的是周志文還是周志康。劉威煌坦言巨聲夢碎,要「搵定後路」,故近年積極創業,除了開辦「異類教育」,亦有和朋友開音樂中心,「比起頭兩年,近年的確少咗演出機會。但我唔會放棄演藝事業,亦唔會淨係坐喺屋企等機會,我寧願試多啲唔同嘢。」先有《超級巨聲》,後有《星夢傳奇》,演藝界長江後浪推前浪;食住名氣搵真銀,才是現實中的上策。

開業成本(07/13)

租金*$90,000 器材$300,000 軟件開發$200,000 宣傳$100,000 裝修$500,000 雜費#$180,000 總投資$1,370,000 *兩個月按金一個月上期#連儲備資金

營業資料(08/13)

營業額$180,000 租金$30,000人工#$65,000 入貨$2,000 雜費$7,000 賺$76,000#四位長工,四位兼職,未包老闆人工。

同場加映生意跟進《逃出香港》股東內訌

本欄於今年五月,曾訪問成功掀起全港逃脫熱的《逃出香港》。當時他們氣勢如虹,不斷開分店,甚至發律師信予後來者告人抄襲。但原來該生意的多個股東已內訌,六月該公司發出聲明,指其中一位老闆尹思騰(Instant)已離職。當日自稱是Mensa天才會成員的Instant,一直負責公司發展策略等事宜。據悉,Instant是因為和《逃出香港》其餘拍檔有款項達三百萬元的金錢糾紛,而被其他股東逼走。據知《逃出香港》亦已報警,警方正進行調查中。本刊向《逃出香港》查詢,但他們未有就傳聞作出回應。《逃出香港》的擴展步伐因而放慢,現時分店有三間;行家「迷之密失」老闆說:「佢哋原本個勢好勁,幾怕追唔到佢哋!佢哋元朗同觀塘兩間分店,都遲咗開。原本仲話四、五年內上市添!」未知內裡誰是誰非,然而股東多,紛爭自然多,從來是生意人最頭痛的事。

 
PermaLink: https://articles.zkiz.com/?id=74751

巨聲幫賣珍珠奶茶開業三個月月賺八萬

2016-09-29  NM

香港唱片業式微人所共知,明星夢「發吓就算」。當港姐冠軍都要做「魚蛋妹」,不少藝人已面對現實,密鑼緊鼓開店做老闆,用盡知名度彌補娛樂圈僅餘的收入。

○九年參加大台《超級巨聲》的劉威煌(Ryan),比賽後事業曾順風順水,與許廷鏗等藝人合組「Super 4」,出商場show「搵真銀」。但成績漸被隊友追過,許廷鏗簽約做歌星出碟,坤哥更「喊到上紅館」,Ryan卻「愈唱愈霉」,被大台投閒置散,更試過半年幾乎零收入。

他深知演藝圈「有料都未必紅」的道理,早在三年前密謀創業,先後與「巨聲幫」開密室遊戲及音樂教室,全部有錢賺。今年更決定傾盡身家,與拍檔Stephen以加盟店方式在葵涌廣場蚊型鋪開珍珠奶茶店「清玉」。

由歌手轉到平民商場賣奶茶,Ryan坦言「自己喺呢度大,搵錢最實際」,幸獲老婆全力支持,開業三個月即月賺八萬,更創日賣七百杯紀錄,他揚言:「冇人保證到我演藝事業會點,但喺呢度保證到我日日有工開!」

記者在平日下午到葵涌廣場視察,發現二時多人流十分興旺,媲美不少大型商場假期時間,附近居民及上班族紛紛走進商場覓食,到下午茶時間部分食肆仍要排隊。到了三時多中學下課時間,由於附近學校極多,大量學生湧進商場,人潮到晚上七時仍未有減少跡象。

採訪當天,見Ryan由運貨到煲茶都不假手他人,之後更到前線收銀,拍檔Stephen笑指:「鋪頭無假期,佢一有時間就會落場,非常幫得手,唔會話有嘢介意就唔做,仲試過幫手通渠。」現場所見,由於附近有知名度較高、鋪位較大的歇腳亭,生意暫時以對手領先一籌。但當Ryan負責收銀,明顯吸引途人眼望望,紛紛問:「係唔係上電視嗰個?」更有不少初中生光顧後主動要求與Ryan合照,可見明星效應有一定作用。

珍珠奶茶雖在港發展多年,早前更受到塑化劑事件影響,但Ryan稱不怕到「水尾」:「珍珠奶茶的確係有幾年停滯不前,我見呢個牌子講明純天然、唔落化學嘢,喺台灣有自己製茶工場,我覺得有佢嘅競爭力,所以我對前景都係樂觀。我一年最少到台灣兩、三次,咁啱拍檔嘅朋友就喺嗰度傾咗個代理返嚟,問我有冇興趣,我就特登去到台中視察,試過真係覺得好先至決定去馬!」中學生Miky就指,該店售價雖然比隔鄰五元一杯飲料貴,但仍覺得值得,「今次揀咗抹香珍珠奶綠,唔算太甜,都幾香茶味。」店鋪標榜用台灣茶葉即場煲煮,絕不使用廉價茶精,記者試過鐵觀音珍珠奶茶,發現茶味的確與其他連鎖店不同,甜度不算太高,但店鋪採用綠色紙杯,看不到喝了多少,而珍珠分量佔近半杯,感覺「愈啜愈有」,整杯喝掉難免有點「頂胃」。

得葵廣得天下

Ryan笑指商場平日時間人流已經算少,笑稱「依家簡直係小兒科」。他直言決定開店時已優先考慮該處,「呢度真係可以講係奇跡之地,我由細喺度大,知道呢度啲人嘅性質,一想掃街就到三樓先,所以二樓有鋪招租我哋都唔要,足足都等咗半年。」他透露店鋪租金比上一手貴兩成,但仍覺得值得,「基本上葵涌廣場一有放租就有人承接,仲記得嗰晚agent夜晚打俾我,依家有間鋪話唔做,嗰時要兩個鐘內覆要唔要,我哋諗都唔使諗即刻飛去搞手續!」他指甫開業就試過日賣七百杯,成績比兩間旺角店更佳,「唔夠一分鐘就賣到一杯,喺香港暫時得我哋做到!試過冬瓜茶一日就賣晒一星期嘅貨,成個禮拜都冇得賣,杯都可以用到無,呢度嘅人流真係好恐怖!」

加盟創業有掣肘

由於Ryan與拍檔均沒有做飲食的經驗,加盟方式的確令他們省去不少功夫,「個品牌喺台灣已經有十年,上年開始喺香港發展,有好多經驗上嘅嘢分享到。」但他認為加盟有利有弊,「規矩一定要跟,簡單至飲管、檸檬,講到明唔可以自己用第二樣代替。所以入貨數量一定要控制得好好,好似香港人偏少糖,同嗰邊講糖比例可唔可以少啲,佢就講一變台灣都要統一,好難就得一間,所以每次都要同客講多聲要唔要少甜。」由於台灣方面對品質要求甚高,甚至要考試,「裝修晒之後公司會嚟鋪頭試飲,唔pass就唔俾開,我哋都等咗成個月!」Ryan直指加盟及裝修費佔了大部分開業成本,「一次過要俾三年加盟費,同埋裝修都指定咗邊間,啲位點放都要跟佢哋,自己搵應該唔使咁貴!」

坐足半年冷板凳

兩年前Ryan離開TVB後,隨即跟新的唱片公司簽約,他直言五年間「愈唱愈霉」,「我嗰屆要出位嘅都出晒,我一開始又抗拒拍劇,依家諗番起都幾傻!最可惜就係之前上過內地歌唱比賽後,有唱片公司向我招手,但最後因為TVB條款關係唔可以簽,我知道未必係公司問題,但係嗰時真係好失望,就決定提前同公司解約。」他稱以前每個月有幾次「商場show」,有數萬元收入已十分滿足,但最辛苦莫過於「坐冷板凳」:「啲人問我近排做乜,要答人等緊嘢做,試過幾個月都係咁,我就好驚,所以就即刻決定做生意。」Ryan結婚近兩年,與太太都經歷過「坐冷板凳」的日子,他感激太太對他的支持,「見我有時喺屋企睇吓電視,做吓自己嘢又一日,佢都想我出多啲街。」對於有指「靠老婆開鋪」,他反駁指:「如果真係,我就唔使喺度賣珍珠奶茶啦。一早同老婆環遊世界,依家要靠自己嘛,我問心無愧就OK。」他稱雖早已做好心理準備,歌手賣奶茶會招來閒言閒語,但當真正落場售賣時,難免感到尷尬,「有人同我講,咪幾好囉,腳踏實地。」口吻似叫他「咪再發明星夢」,他坦言心裡感到難受,「我自己都想繼續演藝事業,但係好多嘢我都控制唔到,好彩依家都有唱片公司支持我,依家都習慣喇,最少都有人認得我先啦!」對於會否放棄演藝事業,他就斬釘截鐵地說:「一定唔會,依家叫做keep住有歌派台,雖然CD賣一隻蝕一隻,公司都打算幫我出,我兩邊都唔會咁易放棄!」

開業資料(05/2016)

租金*:$159,000裝修及器材:$600,000品牌加盟費:$245,000首月入貨:$100,000其他雜費:$51,000總投資:$1,155,000*兩個月按金,一個月上期

營業資料(08/2016)

總營業額:$280,000租金:$53,000人工*:$53,000入貨:$80,000雜費:$14,000盈利:$80,000*兩名全職及五名兼職店員,不包括兩位東主

撰文:梁延宇攝影:關永浩、鄭樹清攝錄:鄭樹清[email protected]

PermaLink: https://articles.zkiz.com/?id=217512

TVB推波助瀾搶食巨聲幫玩死二三四線

1 : GS(14)@2010-10-02 16:19:43

2010-9-30 NM
                                             
                                                       
                    
                                                                                                                                                                                                                                                                                                                                                                                                                                                                                                   
                                     巨聲二幫除了小巨肺林欣彤來勢洶洶,其餘六強亦一併簽約TVB八年,連同巨聲一幫,一年間,無綫合共簽下巨聲幫十八張經理人合約。
僧多粥少,巨聲幫不免要明搶藝員飯碗。近月有不少私人活動,均被收得平又唱得吓的巨聲幫歌手壟斷,令黃德斌、敖嘉年、黎諾懿、唐詩穎、陸詩韻等一班二三四線藝人,收入銳減,叫苦連天!年簽十八新人
效法美國《全美一叮》節目,去年無綫炮製《超級巨聲》以淘汰賽形式選出最後強者,培育樂壇新一代。可惜去年巨聲一幫彈唔起,直至二幫階段,終於爆出一個有觀眾緣,又唱得的林欣彤。
無綫怕蝕底,即使巨聲一幫無個標青,仍漁翁撒網招攬旗下,一幫亞軍得主何紫慧,還有將軍澳吳尊許廷鏗、鄧小巧、劉威煌、林師傑等最後十二強通通有殺錯無放過,全簽!
「好多都係條件一般,但無綫唔想益人,驚有其他公司簽佢哋,所以唔單只冠軍,其餘入到十二強嘅都簽晒五年約。咁簽咗大班人返嚟,點都要安排嘢俾佢哋做,又要搵人跟,經理人部門都忙咗好多。今次巨聲二幫,無綫收斂咗,唔再係又簽唔係又簽,只係簽咗最後六強;但加加埋埋都已經簽咗十八個。」一名無綫人說。
力捧林欣彤
多咗十八個新丁爭飯食,上晒岸的一線花旦小生當然不受影響,但對於一些餐搵餐清的二三四線藝員,包括黃德斌、黎諾懿、敖嘉年、唐詩詠、陳敏之、高鈞賢、陸詩韻等,就首當其衝,被蠶食得體無完膚。
「除咗拍劇搵嗰啲,藝人好多時係靠做商場騷、公開活動或者私人function賺錢,尤其係啲騷錢奀嘅二三線,通常靠兩首歌傍身,唱私人function搵外快幫補收入。但係依家多咗班巨聲幫,佢哋唔睇得都唱得吓,加上公司寧願sell班新丁,搞到好多表演活動,都唔再揀啲三四線藝人,寧願攞幾萬蚊出嚟,搵幾個巨聲幫歌手一齊做,搞到嗰班三四線收入少咗好多!」
無綫用街外錢谷新人,加上林欣彤起步唔錯,公司下令全面力捧,在無綫推波助瀾下,嚟緊的萬聖節、聖誕節等黃金賺錢檔期,巨聲幫當然全力爭食,情況等同o靚模平搶名模飯碗,班三四線,艱難!
乜都減
肯賣身簽無綫經理人合約的藝員,除獲安排出外接job賺外快,基本收入其實來自拍劇及上綜藝節目,不過,自從李寶安上場後,主張開源節流,甚至實施每星期全面停廠一日,綜藝節目大減,劇集製作費亦大縮皮,監製開劇budget要計過度過,舉例用咗一兩個大牌孭飛,其餘的二三線佔幾多集?就要計清楚,以前拍五集依家縮到三集,務求控制成本,變相令合約藝員收入大減,人人怨聲載道。
PermaLink: https://articles.zkiz.com/?id=270987

巨聲幫爆逃亡潮林欣彤心灰撇無綫

1 : GS(14)@2015-10-08 02:25:58

■林欣彤被指本月約滿無綫即離巢,她表示現階段要想清未來路向。


無綫近年爆小生花旦逃亡潮,連親手捧出來的一班巨聲幫都陸續離開,先有劉威煌轉會、近日連羅孝勇都打算不續約,「小巨肺」林欣彤(Mag)本月約滿都有意離開娘家,有周刊爆出她拒續約無綫,同時又被唱片公司英皇掟入雪櫃,Mag決心跳槽,她昨日在將軍澳錄影時,直認現階段要諗清楚未來方向。25歲的Mag於2010年參加歌唱節目《超級巨聲2》彈起,翌年簽約英皇,可是越撈越冇人氣,大前年壓力爆煲患上抑鬱症,近年雖病癒復工,但人氣大不如前,工作量少,有指Mag不滿遭投閒置散決定約滿無綫和英皇即向外闖,已有幾間公司密斟中,但她有意加盟周柏豪和連詩雅所屬的Starz People,趁後生再發圍。 



■羅孝勇已打算不與無綫續約,而快將約滿林欣彤也現離心。資料圖片

■Starz People老闆鄒世龍(左)成功捧紅周柏豪,有傳林欣彤想過檔。資料圖片



有其他公司接觸

Mag昨日現身時,被追問轉會傳聞,她說:「雜誌所講嘅轉會冇發生過,我而家處於整頓自己時期,我想諗清楚自己想要乜嘢方向,任何決定係冇落實過。」Mag否認有跟Starz People密斟,她卻承認有其他公司接觸,她續說:「密斟就冇,但有啲人會打聽吓,我想諗清楚自己條路方向先,都有同TVB傾緊。」可是嫌工作量低,不受重用?她說:「又唔係,我發現入咗行,先發現做藝人嘅辛苦,job未必係必然,經理人有努力同我爭取,我都有唔少嘢做,只係我個人比較懶,好少發Instagram同facebook。」Mag表示初出道時為鞏固地位不停爭取曝光,即使現在曝光率少了,但收入仍夠生活,她說:「我收入養到屋企、兩隻狗、阿爸阿媽同細佬,都OK。」有指Mag除離開無綫,同時也會跟英皇結束賓主關係,英皇高層吳雨昨在電話中回應:「Mag份約係好快完,佢經理人係無綫,佢簽唔簽番英皇,由無綫決定,不過我哋合作咁耐,關係好好。」如Mag離開無綫,英皇會加簽她經理人合約嗎?吳雨說:「等無綫方面同Mag明確啲先。」採訪:楊定





來源: http://hk.apple.nextmedia.com/entertainment/art/20151007/19323174
PermaLink: https://articles.zkiz.com/?id=292867

楊雅餘羨慕巨聲幫

1 : GS(14)@2017-03-05 09:35:14

楊雅餘(Uka左)曾屬巨聲幫,昨日與獨立歌手Circle(右)、樂隊Sugar Bro及秋紅到尖沙嘴為JOOX音樂會表演。Uka透露正籌備推出首張EP,她坦言羨慕巨聲幫的師兄師姐。與Uka私交甚篤的Circle表示會撐好友,她亦計劃明年推出EP。至於早前到日本比賽的Sugar Bro,指過程很難忘,他們說:「我哋都有喺日本出咗一場騷,可以簡單溝通到,真係好難忘。」




來源: http://hk.apple.nextmedia.com/entertainment/art/20170305/19947749
PermaLink: https://articles.zkiz.com/?id=327903

Next Page

ZKIZ Archives @ 2019