ZKIZ Archives


星展撇「仔」 唯高達大逃亡

2013-08-29  NM  
 

 

最近星展銀行靜雞雞重組旗下星展唯高達證券,但有老臣子睇唔過眼,向小宗爆料,指星展算到盡,借重組之名,唔裁員,亦無肥雞餐,但就會cut資源、cut樓層、cut佣金,務求令啲員工「識趣」「自然流失」咁話,總之就唔使賠錢。最慘係一班前線經紀,近一、兩個月開始,由合約轉晒做自僱,變咗「無底薪、無福利、無保險」嘅三無人士。咁都唔走,盛傳高層仲有一招,就係將經紀和公司嘅分賬比例,由五五變成二八。

朝不保夕,有老員工指公司內部人心惶惶,個個望實電腦,唔係落盤,而係搵工,仲話個個星期都有散水餅食。小宗問過吓公司營業部董事張天生,佢笑騎騎話完全唔理公司政策,亦無受影響。今年七十有一嘅佢,行內打滾五十幾年,喺唯高達有間「專房」,每日返去食過早餐,聽點音樂,同老主顧傾吓電話落下盤,又一日。佢仲點出打工之道:「做好本分,唔會撈過界。」

星展唯高達有今日,皆因佢唔係星展親生仔,而喺○一年,發展銀行(星展前身)旗下嘅發展證券,與唯高達(Vickers Ballas)合併而來。星展近年積極搞緊自己嘅股票團隊,對呢個合併得來嘅「油瓶仔」,自然無乜感情,甩得快好世界。

慈山寺秘密任務

誠哥出錢出力興建大埔慈山寺,最觸目除咗全球第二高嘅觀音像,還有已曝光嘅防彈高設防「僧侶宿舍」。誠哥咁緊張,固然出於一份佛心。除此之外,有知名風水師指行內流傳,誠哥早年已睇中慈山寺呢塊風水地,並在此種咗個衣冠塚,另於老家潮州也有一個。衣冠塚係一種祈福、去病厄嘅法事。潮汕鄉間嘅老人家,有時會於家中放置壽棺,寫上姓名,並喺棺內放置衣物鞋襪等物,亦係衣冠塚嘅一部分。該風水師指,至今鄉音未除嘅「家己冷」誠哥,篤信風水,「有幾個師傅跟佢o架,全部都好低調嘅,最出名係蔡伯勵。」他指誠哥唔理係「安門」或「安床」,由尺寸到位置、日子、時間,都計算得好仔細,他笑說:「潮州人係廣東人入面最迷信嘅,我大部分客都係潮州人。」

PermaLink: https://articles.zkiz.com/?id=74525

Next Page

ZKIZ Archives @ 2019