ZKIZ Archives


泛民建制炮轟:中咗星洲組屋毒

1 : GS(14)@2017-10-30 00:51:57

【本報訊】林鄭月娥在報章專訪中提出,有80萬公屋單位已足夠應付需求,日後會主力興建綠置居,圖令更多公屋戶交回單位買樓,不過有關構想不但遭民主派炮轟,連建制派亦質疑想法是否可行,反問「睇唔到80萬係點計出嚟」。有政界人士更形容,林鄭對新加坡組屋的公營房屋模式中毒太深,「佢嘅諗法會得罪晒民主同建制派」。


尹兆堅:應先解決土地問題

民主及建制派立會議員,昨不約而同質疑林鄭對公屋政策想法。民主黨尹兆堅狠批林鄭的說法是「天荒夜譚,匪夷所思」,因現時公屋需求量龐大,起碼要有逾三分一公屋住戶願意購買綠置居或其他樓宇,才能騰出足夠公屋單位滿足輪候冊的需要,「可能林鄭真係覺得自己好打得,但都要有譜,唔應該隨口噏得就噏」。尹又強調,林鄭不解決土地供應問題,就無法解決整體房屋問題,建議當局考慮釋放粉嶺高爾夫球會土地及棕地、軍事用地等。工聯會麥美娟亦質疑稱,「睇唔到80萬點計出嚟」。麥指綠置居計劃成效如何,有多少公屋居民願意購買綠置居仍是未知數,除非綠罝居計劃非常成功,有足夠公屋單位騰出,否則林鄭提出以新思維解決房屋問題的同時都必須審慎,不能離開目前有數十萬人在公屋輪候冊,以及是否維持到3年上樓目標。有政界中人稱林鄭上任後到新加坡考察組屋,並堅信可在港推行,形容林鄭「中咗組屋嘅毒」,有建制派亦懷疑,林鄭過於相信組屋模式,相信林鄭是「中新加坡模式太深」,有另一民主派中人指,新加坡組屋與綠置居比較,不論單位大小、質素均較綠置居好,「綠置居只係公屋質素,公屋居民有幾大誘因,放棄一個月畀千零兩千蚊租,改用萬幾蚊供間公屋質素綠置居」,他又指不少輪候公屋市民均是建制派支持者,「林鄭諗法即係叫建制派得罪佢哋嘅選民」。■記者呂浩然




來源: https://hk.news.appledaily.com/l ... e/20171028/20197165
PermaLink: https://articles.zkiz.com/?id=343453

Next Page

ZKIZ Archives @ 2019