ZKIZ Archives


新居屋收表房委會先袋$3千萬

2014-01-01 NM今時今日,二百萬有找嘅上車盤仲可以喺邊度搵?嗱,咪走雞呀,呢個月派申請表嘅五個新居屋屋苑,最平嘅單位只係一百八十七萬元,實用面積有三百七十一呎,新居屋可以話係「蔗渣嘅價錢,燒鵝髀嘅味道」,房委會揀喺聖誕節期間推出,變咗係香港窮人嘅聖誕恩物!但新居屋總數只係得二千一百六十伙,點夠分呀?咁多日嚟,位於樂富嘅房委會客務中心,門外排隊攞表嘅人龍都打晒蛇餅,房委會話六日間就派咗十三萬八千份申請表。每一份遞回嘅表格,房委會都會收番二百元申請費,而派表會派到明年一月十二號。咁計落,齋收表起碼可袋三千萬元以上,即係印表就等於印銀紙!房委會多年來都呻有資金缺口,今次派表咁好賺,話唔定衍生出一條財路喎!至於居屋申請人,就無咁開心啦,因為暫時來講,平均每個綠表單位有三十八個人一齊搶,即係命中率只係百分之二點六,每個白表單位有一百零一個人一齊搶,命中率只有百分之零點九。有人呻仲難過中六合彩!咁又唔係嘅,小宗計過,用二百蚊買六合彩,中三獎嘅機會率係百分之零點零三。抽新居屋點都易中啲;況且喺而家畸形樓市下,抽中咗仲可能贏得多過中六合彩三獎!搏得過噃!踢竇九倉會所撞吳宗權在尖沙咀海港城「鳩嗚」完,人潮嘈雜,穿過海港城一樓,可以通往一個幽靜的「秘密花園」,這裡門上印着logo:Pacific Club(太平洋會),正是今勻要踢的竇。打開玻璃門後是一條海上長廊,走過後便是大門入口,只要出示會所會員身份證,印巴籍保安就會給你過路 。Pacific Club位處海上,前身是貨櫃碼頭,後來碼頭搬走,這裡便改裝成海港城及會所。太平洋會會所屬九倉集團旗下,於1990年已建成,現時約有二千名會員,有明星劉德華、成龍、周星馳、林青霞等蹤影。現時個人會籍費$625,000,公司會籍$770,000。係人都知九倉主席吳光正一家好動,會所亦着重運動,各類球類運動設施一應俱全。另亦有室內泳池,話唔定隨時見到有三十幾吋胸嘅吳宗權在此暢泳! 會所內的餐廳都甚有水準,中菜廳紫荊閣更必試他們的招牌菜火腿瑤柱汁貴妃雞。採用新鮮黃油雞以金華火腿及瑤柱熬成的濃湯汁慢慢浸至全熟,中途經過幾次冷河,直至瀝乾上碟。新鮮的雞肉味濃郁,肉質嫩滑鮮甜。而紅棗清湯加拿大牛肋肉,最適合女士享用。上菜時以小鍋盛載,牛肋肉腍軟得幾乎入口即化,肉汁豐盈,食完全身暖笠笠,潤顏養生。捐錢富豪檔次下滑政府成日都話要明白後生仔諗法,但後生仔明明要真普選,政府就話要搞多啲跳舞班,等後生仔發洩精力,永遠都雞同鴨講,離晒地上埋太空。好啦,政府搞唔掂,總係有好多人湧出嚟抽水。最近就有個名叫「香港善德基金會」嘅組織、由前仁濟主席董吳玲玲創立,打正「培育正向青年人才」旗號,話要幫青年人建立正確的人生觀,促進社會和諧發展喎。講到「和諧」,都知呢個基金會咩背景。早幾個禮拜,佢哋搞創會典禮,就請到689同中聯辦副主任林武到場,好明顯受到阿爺祝福。咁做得基金會,最緊要都係搵人揼心口捐錢啦。不過大孖沙就搵唔到啦,最後搵咗工廈大王楊耀松長子楊國佳嚟「捱義氣」。雖則楊公子錢多到褲袋都袋穿窿,但佢唔係隨便捐o架,「咁要睇吓個project有冇創意、新思維,甚至會interview吓年輕人睇吓有冇料到先科水,唔係好似乜乜基金會,七老八十都話係年輕人喎。」寸爆!本週惡魔邊個咁夠薑,講到明自己係邪惡博士?根據運輸署資料,登記車主叫林溥仁,真係一位doctor,喺元朗區執業,網上評論話佢最叻幫生完BB嘅產婦減肥。對佢啲病人來講,係咪似Dr Angel多啲呢!金牙大狀講嘢勁過長掛真普選條幅亞視向員工發放十一月份一半薪水,餘下半個月及十二月份糧,未見有着落。挨年近晚,員工心情如何,仲使講乎?廣大市民更加關注嘅,係政府會否續個牌俾佢。從亞視嘅往績睇,應唔應該續牌,唔使多講。續唔續牌,大家都知道唔到香港人話事,亦同亞視嘅財政無關。歸根結底,同唔發牌俾王維基一樣,都係689一個人講晒。佢唔係香港人選出來嘅,冇責任遵從香港人嘅意願辦事。故此唔使係佢肚裡蛔蟲,大家都知道亞視有冇得續牌矣。不過,續牌俾亞視形同日日提醒香港人689同佢嘅班子如何倒行逆施,對促進真普選之訴求,效力肯定勁過獅子山上長掛「我要真普選」條幅。夠膽就續牌啦,你。中環人語迷你版侫做首富不是我的目標。侫估中邊個中環人講呢句說話,送你J-WATCHJ-37尊貴版藍寶石鏡面限量版手錶一隻有意參加者,請於十二月三十一日(星期三)下午一時後,將答案、姓名及聯絡電話電郵至[email protected]小宗只接受電郵,郵寄免問。上週人語揭曉侫女士精嘅就keep住自己啲錢。侫答案:羅美美得獎者:Chan Hin Wing中獎時間:1:00pm 24/12/14本刊員工及直系親屬不得參加。為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。超過一位讀者估中,先到先得,恕不接受上訴。答案及中獎者姓名將於下期本欄揭曉。廣告時間你有某財團嘅黑幕想爆?你知邊間上市公司造假?你仲想舉報地產霸權嘅不公?歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!爆料熱線/whatsapp:6829 5929平治
PermaLink: https://articles.zkiz.com/?id=125950

Next Page

ZKIZ Archives @ 2019