《中佬手記》就以相親相愛娛樂大家 得個跑字
http://solelyrun.blogspot.hk/2014/08/blog-post_3.html一個星期話咁快又過去，要數一單最「爆」嘅新聞，肯定係高雄發生氣體爆炸引致多人死傷。人命傷亡所換來嘅教訓，就係發現問題而延誤處理，係會死人嘅－－而人類總係重複相同嘅錯誤。唔駛召喚阿寶喇，星期日畀佢抖下好。
講汲取教訓，其實同佔中商討日好相似。第一次咪興致勃勃或者慶烚烚咁，第二次已經開始跌 watt ，到第三四五六次，直情謝晒皮、頭都抬唔起咁滯。重複犯錯係會麻木嘅，唔係邊得嚟「習非成是」呢句成語？
以前社會人物出嚟亂 up 廿四，會畀人鬧係「指鹿為馬」。但隨住社會「習非成是」嘅風氣蔓延，係鹿係馬都開始變得唔重要。連最基本嘅客觀事實陳述錯都好多人唔介意，其他邏輯謬誤、搬龍門、模糊焦點，就更加少人察覺或者有感覺。 2012 年 7 月 1 日大家上街大嗌「梁振英、大話精」，然後佢喺西九文化區嘅利益衝突嫌疑、佢嘅山頂大宅僭建疑雲、佢嘅語言偽術……一笑已經風雲過，大家都司空見慣，佢再講「香港同大陸和諧嘅關係決定我哋食粥定食飯」，甚或「政府官員反佔中係應有態度」，喺民間莫講話風波，連一絲漣漪都冇。
一個政府之首嘅品德、操守以至政治敏感度、政治倫理水平都可以低處未算低，其他官員以至民間組織嘅代表自然可以有樣學樣而且大模施樣直行直過。最新一個代表係律師會主席林新強，佢太太打骰嘅公司喺中環中心出租場地賺大錢，背後其實係受梁粉組織「香港專業聯盟」任命，而組織只需要向中環中心業主市建局繳交一蚊雞年租。
早多十年八載，大家可能已經群起而攻之，「喂，擺明有利益輸送啦」。但今時唔同往日咯。如果程介南以權謀私嘅案件喺 2014 年被揭發，我都唔敢肯定佢會唔會被判罪成入獄。因為商交所涉嫌詐騙案而一身蟻嘅前行政會議成員張震遠，喺受到商業罪案調查科調查一年有多之後，亦遲遲都未見有下文。特首曾經掛喺口邊嘅「香港速度」，似乎只應用喺拘捕示威者嘅行動。
都講到厭、講到悶。悶咯，咪尋求娛樂。香港報紙最多人睇嘅如無意外係娛樂版。由我細細個開始搭巴士見到上班一族 C 疊不離手，到最近見到馬賽成香港風雲人物，傳媒從實體到虛擬，讀者習性其實冇大改變。 90 年代嘅年輕人同 2014 年嘅年輕人，骨子裡流嘅血、散發嘅氣質，其實好可能大同小異……咁嗰小小嘅差異係咩呢？
90 年代嘅政治就係政治，副刊專欄就係副刊專欄。嚟到而家，政治要有八卦花邊，副刊冇返個化名性格巨星亦唔似樣。兩者嘅性質都係娛樂大家，由李八方嘅《隔牆有耳》到紀曉風嘅獨眼新聞》都以捕捉政治人物小動作或者奇聞為主，《主場新聞》製圖加一句點睛嘅慣技更加令大眾著眼於蔣麗芸或者鍾樹根嘅言論多於相對複雜嘅政府施政策略與佈局。冇計啦，容易入口同易消化丫嘛，讀緊 BB 班就梗係食糊仔，唔通食雞背脊吮骨頭？
政治有政治娛樂版，副刊有王迪詩帶起潮流。雖然已故的丘世文曾在《號外》雜誌以顧西蒙為筆名書寫《周日床上》 (而且好好睇) ，但論知名度、論爭議性，真係拍馬都追唔到王迪詩。一個單身貴族住喺蘭開夏道，以高姿態高角度寫盡金融中心眾生 (外加類似《 Sex and the City》嘅情節) ，謎一般嘅身份令人遐想王小姐到底真有其人定係集體創作。當然，及至王迪詩 come out (！！) 公開真人為楊潔深之後，謎底已經解開，原先嘅可塑性自然歸零。
不過一雞未死，一雞又鳴。喺《蘋果日報》嘅《金融中心》專頁彈出一個自稱「 IFC 張智霖」嘅葉朗程，走男版 Daisy Wong 路線，人哋有個 Philip ，佢有個 Danielle 。王迪詩喺財經報章嘅副刊出沒，葉朗程直情喺財經版同大家見面，再走入《主場新聞》。如此一來，食住新媒體興起嘅升浪，葉朗程論盡 A 餐 B 餐嘅文章喺網上瘋傳，連其中一個當事人嘅老公張繼聰賣廣告都攞嚟自嘲一番。
香港人就係咁可愛。有娛樂圈姐仔爭風呷醋嘅新聞都嫌唔夠，仲要透過以第一身寫作嘅專欄作家筆下故事捕風捉影、尋找趣味。半年前我寫過一篇名為
《大象出現時，我們還忙著挑選 AB 餐 》嘅文章，半年過去，大家依然為王迪詩典型嘅兜個圈踩低人抬高自己嘅文章而咬牙切齒，拗個面紅耳熱。至於「『主流民意』反佔中」、 「學民學聯八月佔中」……是但啦，算數啦，唔煩你喇……