ZKIZ Archives


【我尋你開心】本土設計師:社會環境好灰 成功靠群眾力量

1 : GS(14)@2016-11-20 23:52:08

2001年第一次同呢個大型商場合作嘅合照,大家認唔認得出邊個係Andy呀?(海港城提供圖片)



「你知o依家好唔開心,將啲唔開心嘅嘢化解一下先。忘我一陣,感受下呢度啲氣氛。」



唔理你係乜絲物絲﹑左膠﹑右膠定真心膠,相信大部分嘅香港人都會覺得o依家生活喺呢片曾經熟悉嘅土地,過得越來越唔開心,越來越灰……不過空間設計師湯兆榮(Andy)就希望為o依家灰到裂嘅香港,加番少少色彩同生氣。



Andy今年就以小雪人做主題,因為覺得小朋友一定鍾意喎

Andy話每逢節日都係佢最忙嘅時候

入行20多年,Andy堅持要用一支筆一張紙去起稿,佢話咁先有feel呀

畢業於香港演藝學院舞台設計嘅Andy,入行廿幾年,單單為尖沙嘴呢個大型商場設計聖誕燈飾已經有14次經驗。聖誕係普天同慶嘅日子,但當大家好開心咁同燈飾影相打卡嘅時候,Andy就忙到甩晒轆:「做節日,我哋將自己嘅……有時辛苦啦,辛酸啦,換取就係人哋嘅快樂。其實我覺得某程度上,唔係唔值得嘅。」辛苦得嚟值得,全因為Andy覺得佢設計嘅聖誕裝飾,可以令到香港人暫時忘記現實中嘅煩惱:「坦白講個社會風氣大家都感受到嘅,姑勿論係咪serious啲嘅社會環境嘅政治現象,或者到一啲家庭呀生活呀;壓力呀賺錢呀,其實o依家唔容易㗎。咁如果你話樣樣都唔容易,我哋就好灰……我哋唔畀個心落去做件事,令到佢開心啲嘅時候呢。我覺得有一半嘅責任……令佢開心嘅話,或者一家大細有個好好嘅memory啦。」



大家嚟度呢度,會唔會感受到愛?

自認係「完美主義者」嘅佢,每件裝置都要check得好清楚o架

「令香港人開心啲」,呢個job絕對唔容易,但Andy都抱住個心態—「盡做」。但作為老闆,梗係搵錢大過天啦,講抱負﹑講理想?傻的嗎?攞過好多國際性獎項,揚威去到海外嘅Andy,以今時今日嘅名氣同江湖地位,要背靠祖國搵真銀,真係大把機會,但佢就唔係咁睇,仲覺得香港先係佢嘅根:「錢你賺唔晒嘅,香港比較共融啲,乜嘢文化都有。國內呢,有啲嘢要就佢哋囉,係嗰個價值觀問題。我自己比較喜愛多啲推動下本土嘅設計,即係本地設計師嘅一個認同,唔使下下要用外國嘅。」本土設計師要得到肯定,Andy話一定要凝聚群眾嘅力量,「成功嘅作品多數有群眾力量,喺個城市方面有一個共融嘅話,我覺得對個社會都有積極意義。如果有政府多啲推動,其實係緊要嘅,o依家有西九,但都搞咗好多年,暫時未見到有啲乜嘢。」



估唔到cool cool哋嘅Andy都幾有童真o架喎

你哋嘅聖誕回憶應該同Andy一樣,喺海傍睇燈飾度過。

聖誕節就嚟到,意味住新一年又即將來臨,希望新一年嘅香港唔好再有咁多事同人,令我哋灰落去啦。採訪:植詠珊(Cathy)編審、編導:懷鈺剪接:Roy拍攝:馮峰、Neo場地:ANDY TONG DESIGN、海港城




來源: http://hk.apple.nextmedia.com/entertainment/art/20161119/19838612
PermaLink: https://articles.zkiz.com/?id=316278

Next Page

ZKIZ Archives @ 2019