ZKIZ Archives


【我主場】享受入片場鬧人 洪金寶退而不休

1 : GS(14)@2016-08-13 14:59:47

洪金寶跟陳木勝日前為電影《危城》宣傳,現年64歲的洪金寶對於退休有另一種體驗,他日前接受本報專訪說:「我十年前試過退休,去咗美國一兩年後返香港就唔再退休,有乜嘢好玩過拍電影,現場有幾百人可以畀你用粗口鬧,最重要食得、玩得,做得開心。我而家一把年紀,講嘢仲有人聽,呢樣嘢用錢都買唔到,所以千祈唔好講退休,只可講『退而不休』,好多朋友一話退休,兩年就歸古,心靈好空虛㗎。」已經榮升爺爺的洪金寶,講到孫仔其詞若有憾的說:「佢哋(孫仔)玩我㗎咋,又要畀錢又要睇佢面色,真係特攻爺爺。」



■陳木勝(右)新戲強調「公義要有人執行」以對抗惡勢力,但否認影射現今社會。

■彭于晏在戲中以俠客身份仗義出手對抗強權。劇照


「公義要有人執行」


戲中劉青雲擔起衞城的責任,跟吳京、古天樂周旋,本着「驚先要面對,唔可以退縮」,彭于晏以俠客身份仗義出手對抗強權,似有香港現今狀況的縮影,洪金寶說:「咁啱啫,你睇番三十年前古裝片,有邊套題材唔係講呢啲,只係遇着香港社會畀你嘅感覺就好重。」陳木勝認為全世界都有欺凌的情況,內地窮人不敢跟富二代鬥,大國家會欺凌弱國,陳木勝說:「戲入面有一句對白『公義要有人執行』,靠講冇人執行係冇用嘅,有冇呢種俠義精神(彭于晏)嘅人走出嚟呢?大家感受到幾多就幾多,電影世界就係咁,冇得勉強人哋感覺。」那麼香港要到幾時至會有個彭于晏?撰文:卓寶花場地:E-Max九龍灣展貿中心




來源: http://hk.apple.nextmedia.com/entertainment/art/20160813/19733870
PermaLink: https://articles.zkiz.com/?id=305695

Next Page

ZKIZ Archives @ 2019