| ||||||
16歲開始，由張玉珊幫減肥的鄭欣宜，試過一年減走一百磅佳績，締造肥人福音，生活亦從此改寫。減肥十年，近年欣宜防線崩圍，甚至放肆到一餐飯吃五人分量亦面不改容，體重多次反彈，更翻脹到180磅危險線，連一手打造神話的修身堂老闆張玉珊，亦決定放棄，代言人身份不再。早前修身堂上海旗艦店開幕，張玉珊請外援袁詠儀做主禮嘉賓，無請欣宜。對此，張玉珊語帶無奈：佢都咁大個，我好難管到佢！剪綵用外援 今個月中，修身堂上海旗艦店搬遷開幕，張玉珊請Cool魔嫂袁詠儀做剪綵嘉賓，代言人鄭欣宜卻無影，據了解，近年體重有增無減的欣宜，已不獲續約。「Shirley（張玉珊）好錫欣宜，一路都有睇住佢，好多時欣宜失晒控狂食，Shirley都親自開解佢，點知欣宜唔領情，仲喺外邊唱Shirley，話之前減到肥同佢無關，係靠自己跳舞；呢個圈好細，啲說話傳到Shirley耳中，佢當然會好失望！」知情者說。唔識飲水思源，更甚是身為減肥代言人的欣宜堅持認為自己唔肥，拒絕忍口控制體重。自拆招牌，以至張玉珊最近連修身堂內地加盟店開幕，也不預欣宜剪綵。「肥姐過身後，欣宜自己搵錢生活，Shirley好放上心，兩年幾前，內地好多加盟店開張，每次Shirley都指定要搵欣宜去剪綵，每次都有幾萬蚊o架，就算星煥老闆何哲圖叫Shirley俾高啲價欣宜，佢都無所謂！不過欣宜近年好似吹脹咁，有次喺內地做剪綵活動，啲觀眾大嗌話佢肥，搞到主人家好尷尬，之後都唔敢再叫佢去剪綵！」 無份做義工 欣宜十五歲已經有二百三十五磅，令當時比女兒還要輕的肥姐十分擔心，親自搵張玉珊幫寶貝女減肥，肥姐患病後，亦曾託孤給張玉珊，大家關係密切；一○年，積極減肥的欣宜體重一度低見一百二十八磅。「之後欣宜再同修身堂簽咗新一輯泳衣廣告合約，點知佢突然故態復萌，仲搞到一發不可收拾，廣告拍唔成，合約亦不了了之！」知情者說。每年中秋節，修身堂有義工活動，欣宜都會陪住張玉珊到場，但今年只請了蔡一智，不見欣宜。 十年回歸 曾經由235磅減到130磅，曾經努力瘦身的欣宜，有過唔少美麗回憶。 個人選擇 對欣宜無出席今個中秋義工活動及無再用她做代言人，張玉珊表現無奈。張：今日係佢唔得閒啫！我哋合約係滿咗，所以無話特別搵佢！壹：之前同佢簽咗份泳衣廣告約？張：有同佢傾過，但嗰個階段佢自己都唔係太ready想去減！佢減咗咁耐，如果佢唔想，我都唔勉強佢，都咁大個，其實我都好難管到佢，最緊要佢開心！壹：未減肥前佢高血壓、高膽固醇，怕唔怕佢身體再出毛病？張：佢依家無以前咁重！佢咁長時間去減肥，精神上可能唔係太開心，反而身體方面我唔太擔心，當然我都希望佢靚。壹：佢一餐飯食五個人分量，有無勸佢要注意？張：等佢放縱吓先啦！放縱完可能有一日佢想再減！我當然希望佢又瘦又靚又健康，但佢咁大個，等佢自己選擇，呢啲嘢好難逼！壹：佢喺外邊同朋友講，話瘦到唔關你事，係靠自己跳舞！張：所有我無聽過都唔會當真，唔特別講嘞！ 留下神話 三歲已經鮑魚做早餐，吞雞髀當食糖的欣宜，十幾歲體重已經高見二百三十五磅，買唔到衫，肥姐要買兩件成人大碼衫叫裁縫改給欣宜穿著，後來健康更出問題，欣宜八歲已經膽固醇超標，有高血壓；○三年，肥姐要張玉珊助女兒減肥，當時在加拿大讀書的她，暑假返港減肥外，張玉珊更搵營養師專程到加拿大照顧欣宜飲食，令她一年內成功減掉一百磅，變身美少女，留下神話。○五年欣宜推出《我的減肥日記》大賣十五萬本，成為肥人偶像。 | ||||||