3600秒緣定一生55歲徐錦江愛妻剃頭定盟
1 :
GS(14)@2017-01-19 08:08:02為愛情，你可以去到幾盡？啫神徐錦江嘅老婆殷祝平(螞蟻)，就為咗愛，甘願將一把長長嘅秀髮剪掉，同徐錦江一齊Keep住光頭Look，連帶佢哋嘅囝囝都保持住光頭造型，一家三口齊齊整整，保持住徐家嘅隊形。外表睇嚟一啲都唔浪漫嘅啫神徐錦江，但當佢認定咗一段愛情，你真係估唔到佢可以咁不顧一切。94年，徐錦江喺雲南開工拍戲期間，遇見一個著軍服嘅女仔經過，一見鍾情，用蹩腳普通話自我介紹係香港演員徐錦江：「我想以最真誠的態度對你說，我要和你結婚。」第一次食檸檬。第二次，亦即半年後，徐錦江與女神喺北京重遇，當時徐錦江同黎明、張敏等人正拍攝《飛狐外傳》，今次徐錦江可不肯放手，同女方講:「這說明我們有緣份啊，你給我一個禮拜時間，我會娶你的。」用99支玫瑰求完婚再飛車一齊去買戒指，徐錦江話佢同妻子——殷祝平，相處了3600秒就定終身。徐太2000年為徐家誕下一子徐非，本來留咗一把長髮嘅佢，望住老公光禿禿嘅頭顱，有日忽發奇想，不如一家三口都「光頭」啦，就係咁，毅然放棄了一頭長髮至今。徐生徐太果然都係「非常人」。轉眼佢哋結婚都超過廿載，螞蟻就話老公做每一件事都要求完美，畫一幅畫可以畫幾年，做個雕塑可以改完又改，試過一次凌晨2點拉我起身，話返工作室改個雕塑嘅面部表情，佢一有靈感就要去做，唔會理其他嘢，作為佢老婆，我只可以盡量配合佢嘅需要。除此之外，徐錦江仲為咗藝術園停工2年唔拍戲，又要使幾千萬投資，到底有冇經濟壓力呢？徐錦江老婆螞蟻就話：「經濟冇乜大壓力，盡做啦！我喺貴州開咗一間好大酒吧！生意唔錯，加上呢幾年我幫佢投資下房地產同收藏古董傢俱都賺到錢，你真諗唔到我用20幾萬買張黃花梨木枱回來，2年後已經有人出價980萬叫我讓張枱俾佢，我地經濟還可以嘅。」相信就係徐錦江呢份堅持，螞蟻對佢亦義無反顧咁愛下去......
來源:
http://hk.apple.nextmedia.com/entertainment/art/20170119/19901168