| ||||||
上週豪宅市場有一宗成交，惹來很多中環人無限遐想。中半山雅賓利道一號The Albany高層C單位，最近以九千三百萬元沽出。市場指這個單位的業主，正是澳門前特首何厚鏵兒子何敬民（Justin）。何敬民長居香港，曾在JP Morgan任股票銷售部職員，○八年因違規披露上市公司資料而停牌四個月。其後他自立門戶成立基金，閒時愛鋤大弟，去年當選為上海市政協港澳委員。這個單位他於○三年以二千五百萬買入，如今一鋪賺近七千萬元。 小宗翻查土地註冊處資料，購入這個單位的公司Greatway Sources Limited，股東除了何敬民之外，還有張立群。張立群是澳門立法會議員，從體育會間選出戰，在澳門有一定江湖地位。現時內地打貪，官階做到幾高級，都可以被拉下馬。有傳何厚鏵也被開「快勞」。就在全城競猜下一個被打擊對象時，何厚鏵兒子就沽貨套現，夠曬撲朔迷離啩！ 職場秘笈 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。 緊記上位五點 一個打工仔要上位，其實最終歸納起來只有幾點：一、把公司利益放在前提，個人榮譽放在其次，跟公司利益無關的無謂事情，別要做。二、處理事情時，把自己代入老闆的角色。要知道，你的人工是從集團的收入而來。假如該收入並不是支付你的人工，就會去了老闆的口袋裡。三、做每一件事，都要有火！做事無勁，便容易頹，做什麼都慢過人、差過人，又怎上位？四、為每一項工作，訂立計劃、目標以及時間。五、做打工仔要三心兩意。做事要上心、做人夠鬥心、對公司要關心；千萬不要大意，有時老闆寧願你做慢一點，但千萬不要出錯。亦不要在意，不要斤斤計較。你𢭃一萬蚊人工，只願做一萬蚊的事情，那你份人工一直只會跟通脹掛鈎，永遠不會出人頭地。你𢭃一萬蚊人工，起碼做到值一萬二千蚊的工作量，才可以「升值」快過同事。若各打工仔覺得以上五點太煩，那就只做一樣：欣然接受公司給你的任務及有責任感地完成。如能做到，就無往而不利！因近來工作實在太繁重，這將是我最後一篇《職場秘笈》。但讀者日後有需要，仍可電郵給我分享在職場上的煩惱。（[email protected]） 本週鐵竇 中環渣打銀行大廈地庫，最近開咗間新飯堂「Mott 32」。內裡裝潢同食物都走「中西合璧」路線，迅即成為中環人新鐵竇。小宗上週四就撞到任志剛同惠理基金嘅謝清海（左），喺度邊食邊斟。中環人想收風，又有新地方咯！ 送大禮與華爾街狼人共聚 裡安納度狄卡比奧主演嘅《華爾街狼人》嘅真身，即係前華爾街股票經紀Jordan Belfort，將於本月廿三日喺會展開talk，講Sales and Marketing，即係佢喺戲中教人嘅「sell me this pen」呀！狼人收費夠曬狼，普通座入場費由$680到$1,680，已經賣出咗三千幾張飛。VIP位收費仲「揦脷」，只係坐最前，同可以參加個雞尾酒會，就要成萬蚊。據知佢將演講收入還番俾以前被佢害到雞毛鴨血的投資者。Jordan Belfort九十年代係華爾街最成功的經紀，每年賺超過五千萬美元。佢嘅成功之道，令唔少金融界人士趨之若鶩，據聞唔少基金「入飛」。各位，學佢識得「賣筆」之餘，都要吸取佢人生最大的教訓，就是不要詐騙客戶，淪為階下囚。小宗一向好照顧本欄讀者，將送出十張入場券，每張價值$1,280。有興趣嘅讀者，請連同一條你最想問Jordan Belfort的問題（小宗會轉交佢回答），於七月十六日下午三點後，連同姓名、聯絡電話，電郵至[email protected]，一人一張，先到先得！ 恆指論功過 比較回歸至今的恆指走勢，尤其三任特首上任初期，唔多唔少睇到「資金」對佢哋幾信任。老董九七年上台，個市即跌到叭叭聲，○三年沙士，恆指瀉得更勁，老董亦黯然腳痛下台。曾蔭權○五年吹住口哨上任，個市即刻狂升，個個發大達，一直升到二○○八年。至於CY，一二年至今，經濟明明唔太差，偏偏股市升唔上，絕大部分時間係二萬二千點至二萬三千點徘徊。咪就同佢處境一樣，政策推唔郁，一啲突破都無囉，唉！ 金牙大狀講嘢 教嚇北京乜嘢叫做口齒港大王於漸、中大宋恩榮等十三位學者主張押後向人大常委提交政改報告，等社會可以由而家劍拔弩張嘅局面冷靜落嚟、作理性討論、凝聚共識。梁粉飯焦則認為冇乜好拖，反而第一時間將時間表呈上北京，到人大發落之後，仲可以多啲時間商討細節咁講。何以香港人冇辦法就政改冷靜落嚟作理性討論？好簡單，俾人踩到上心口，咁你叫佢哋點冷靜先？家嚇明明係北京反口，應承咗嘅嘢唔算數，一國兩制、港人治港變咗北京全面管治；一人一票選特首，變咗阿爺選咗至到你選。講嘢咁冇口齒，請問十三位學者叫香港人點冷靜先？唔通香港人特別好蝦啲？學得飯焦話齋，長痛不如短痛，即管放馬過嚟囉，睇嚇香港人會點。事已至此，拖嚟做乜？你估拖兩三個月會出現奇蹟嗎？江山易改、本性難移，北京會洗心革面履行諾言嗎？發夢冇咁早吖，老友。 | ||||||