ZKIZ Archives


姓資還是姓社 左丁山


2010-7-11 AD





 

最低工資法案, 一定會通過,主要關鍵在於最低工資訂在乜嘢水位,工會要求時薪三十三元,飲食界、零售界提出二十三至二十五元,現時最多人講嘅係二十七元至二十八元,即中 間落墨。是否如此,視乎商界議員與工會派議員談判拔河嘅啫,雙方達成妥協,應該唔難,須知道幾乎每一個民主國家都有最低工資,社會主義國家更唔在講,呢項 係政治議題,與經濟學概念無關,經濟學家通常反對無效嘅。

本着政治目標而立法嘅最低工資法案,一旦落實,就係一個經濟議題,影響企業之僱用 員工政策及薪資政策,所有上市或非上市公司都要應付,上市公司(特別係飲食、零售業)更加要公布最低工資對未來盈利嘅影響。大家樂集團主席陳光裕對傳媒表 示,假若最低工資時薪設於三十三元,大家樂便要發盈警,立即招來批評,仲有社論話一啲「行政貴族」肥己瘦下,自己收年薪幾百萬,前線員工就得四、五千,高 層行政人員以壓榨員工薪水,為自己立功。咁講法,對啲高級行政人員並不公道。根據勞工市場供求,如果時薪二十三元嘅工作,有大把人排隊應徵嘅話,行政人員 做乜嘢要向董事會建議將時薪提高至三十三元?如果時薪二十三元、二十四元、二十五元,都搵唔到工人(例如上世紀七十年代末,八十年代初,工廠周街搶工人, 做介紹人都有現金回贈之時),行政人員梗會為咗維持正常營運,向董事會建議將時薪提高到三十三元,並且增發獎金o忝啦。

陳光裕年薪近一千萬 元,假如最低工資時薪係三十三元,陳光裕完全唔收人工嘅話,大家樂要不要發盈警?當然要啦。陳光裕嘅年薪與大家樂將來(假設時薪訂於三十三元)發盈警,根 本全無關係,乘機鬧佢薪水過高,只係情緒發洩而已,並非理性分析。

因最低工資而指責他人薪水過高,係一種仇富心理反射,在資本主義社會,不 是一件好事。究竟香港要行資本主義市場經濟還是社會主義規劃經濟,好值得辯論。



PermaLink: https://articles.zkiz.com/?id=16536

Next Page

ZKIZ Archives @ 2019