舊將緬懷邱德根鮑姐：佢好愛亞視
1 :
GS(14)@2015-03-18 22:26:04
【1925至2015】■邱德根節儉作風竟成為亞視最蓬勃的日子，其平易近人的作風更獲員工讚賞。
亞洲電視前老闆兼遠東集團創辦人邱德根，昨日在荃灣寓所突然暈倒送院後不治，享年90歲。當年邱德根掌管亞視，其慳家節儉作風最為人津津樂道，有指他限定員工去廁所只可以用兩格廁紙，農曆新年派遠東銀行禮券當利是，不過因他作風平易近人，離開亞視後，有不少老臣子不時相約敍舊，對於舊老闆離去，昨日不少藝員同事坦言感惋惜。
■鮑姐大讚邱生掌管亞視時是前所未有的輝煌時代。
朱慧珊：有腦
作為元老級的亞視前一姐鮑起靜，昨日從記者口中獲悉邱德根逝世，她很愕然說：「我哋舊年見過面，今年我屋企有啲喪事要辦，所以冇去拜會啲長輩，真係好突然，不過老人家年紀都大，上次見佢行動都唔方便，但精神同胃口好好。冇辦法，老人家始終有咁嘅一日。」鮑姐更有感而發：「不過真係可惜，我初初仲希望佢哋買番亞視，等邱生自己搞番起。」這個會否是邱生的遺願呢？鮑姐說：「喺邱生年代，亞視好輝煌，嗰種蓬勃係有史以來都未試過，我哋以前見親面，佢都講好掛住亞視，仲話亞視點解會搞成咁，佢真係好愛亞視。」一九八五年亞洲小姐「和平小姐」的朱慧珊也說：「邱生創辦亞姐，佢對我哋都好有感情，記得我哋當選時，邱生會落嚟探班，過時過節又會請我哋食飯。佢好祥和，又有頭腦同魄力，喺佢領導下亞視有錢賺，希望佢嘅子孫學到呢份精神。幾年前我哋約埋啲亞姐食飯，今日接到佢死訊好突然，希望佢安息，一路走好。」其他藝人，如在邱德根年代擔任替身和大配角的尹天照說：「佢係一個好聰明嘅人，好識得賺錢同儲錢。」楊玉梅大讚邱生是個很勤力的人。「六合彩之子」蔡國威則雖未與邱生合作，但大家有一面之緣感覺平易近人，並謂從前輩口中知道邱德根年代很好、很有人情味。
■朱慧珊大讚舊老闆做事有頭腦兼有魄力，希望邱生一路好走。資料圖片
好識得賺錢
至於在林百欣年代當選亞姐的張文慈說：「我知道佢係一位重要人物，係亞視唯一賺錢老闆，幫亞視成為最黃金年代，好可惜，如果再有咁叻嘅人帶領亞視就好。」亞視前一哥陳啟泰則希望他一路好走。採訪：何慧斯、嵐山、陳杰、卓寶花
來源:
http://hk.apple.nextmedia.com/entertainment/art/20150318/19079994