ZKIZ Archives


中環在線:內地樓價好平因中國人太有錢 李華華

2009-07-31  AppleDaily





 

曾經揚言只會為有錢人起樓嘅內地「大嘴」發展商、北京華遠集團董事長任志強,經常語出驚人,佢對樓市嘅睇法,自然同一般老百姓唔同。好似樓價咁,佢前日出席喺南京一個房地產論壇時,就話內地樓價實在「太便宜」,因為中國人太有錢咁話。

華遠:買樓睇需要非樓價

賣 花自然讚花香,任志強話樓價平,皆因佢對未來樓市走勢睇得好好,佢話唔少城市出現「嚴重供不應求」,土地供應不足、房屋供應不足;預期下半年將會有「六個 加速」,包括投資增長、新開工面積、竣工面積、房價等。喺論壇中,有記者問佢下半年係唔係買樓好時機?呢位內地任總話,「問甚麼時候買房是最愚蠢的問 題」,佢話買樓唔應該睇樓價高低,而睇自己需要同埋負擔能力,有需求但冇能力供樓就唔好買,否則會背負好大嘅負擔,生活質量會下降。佢又話,長時間嚟睇, 十年廿年房價永遠係看漲,倒轉嚟睇,十年廿年前最貴嘅樓房亦比o依家嘅平。「長期來看,越晚買越貴;只有投資客會根據利息和盈利來看今年買還是明年買。」 咁講法,即係叫你有能力o依家好買樓啦,果然係發展商口脗!李華華[email protected]



PermaLink: https://articles.zkiz.com/?id=9991

股市攻略【蘇俊祺:港股好平】

2012-6-21  NM




港股踏入第二季,恒指由二萬一千六百點高位迅速回落,打回原形。惠理集團(806)副主席兼聯席首席投資總監蘇俊祺直言﹕「港股好平﹗依家嘅市盈率較過去五年平均值低兩、三倍,市場price in咗可能發生嘅金融危機。如果歐洲無出大問題,中國經濟下半年又慢慢好轉,恒指至少有一成嘅升幅,升番上二萬一千點。」中國出招撐大市

雖然覺得港股便宜,但歐債問題一日未明朗,蘇俊祺都不會大舉入市。「歐債明朗化有三大信號,第一,六月中希臘大選,脫唔脫歐都好,一定要有明確嘅結果;第二,歐央行諗到方法建立『防火牆』,就算希臘真係脫歐,都可以確保銀行體系嘅穩定性;第三,西班牙銀行業一千億歐元嘅債務諗到解決方法。依家我哋暫時唔會太過進取。」利好大市因素主要來自中國,蘇俊祺相信下半年中央會出招救市。「三、四月份中國嘅經濟數據都好差,出口只有百分之四點幾嘅增長,我哋估計四月份內地GDP增長只有百分之七或者更低。對中央來講,GDP低過七屬於硬着陸,唔能夠接受。」他表示。六月初,人民銀行已減息四分一釐。「如果下半年通賬脹近百分之三或以下,中央減息空間更大。其他政策包括減稅﹑基建項目,以及重提家電下鄉、汽車舊換新計劃等。」

吼實內房及藥業股

蘇俊祺透露,惠理基金現在吸納兩類股票,「第一類是直接受惠國家減息及政策嘅公司,行業涉及房地產、藥業及基建。第二類係運用『逆向』操作,買入平得好緊要嘅股票,硬性指標包括七、八倍市盈率、龍頭企業、穩定現金流等,呢類股票唔理大市點我哋都會買。」現在,惠理十大持股之一的股票包括在內地A股上市的萬科地產,集團早前收購香港上市公司南聯地產(1036),準備「借殼」來港上市。「萬科係內地最大嘅地產商,全國有超過二百個項目,負債少,現金流斷裂嘅風險相對低。」另外,基金亦「碼實」個別市盈率跌至十倍的藥業股。「早前政府為打擊藥企賺取暴利嘅價格管制,有望放寬,藥業股已經見底。」

四招揀民企「爛橙」

上半年,核數風暴引發民企股股災。蘇俊祺指買民企如隔山打牛,惠理旗下的研發團隊,約四十人,每人負責一百至一百二十間公司,每年訪問二千五百間公司管理層,不時北上「巡視業務」,「試過派分析員去民企間廠數出入嘅貨車數量,再同年報做比較,俾廠方嘅人發現咗,查問一輪先放人。好似賣汽車嘅公司,我哋每星期都抽樣調查三十間鋪,問下職員訂車要等幾耐,有幾多折扣,咁就知道啲車好唔好賣。」蘇俊褀教路,問題民企有四大特徵。一︰超現實盈利「有民企股本回報率去到百分之五、六十,一係做假,一係不正常暴利,唔會持續。仲要諗下個行業既入行門檻係咪好高,值唔值賺咁多錢。」二︰神秘關連交易「防止有人『左手交右手』,管理層將資產賣俾公司,或者公司將資產賣俾管理層,當中好易有利益輸送,涉及管治問題。」三︰無厘頭配股「如果公司賺緊十蚊,股價七十蚊,回報率講緊十幾釐回報,點解唔問銀行借錢,息率都係八、九釐。另外,筆錢係咪用來投資?投資嘅項目合唔合理?如果產能過剩仲走去起廠,亦有古怪。」四︰唔熟唔買「產品最好係市面見得到、買得到,起碼有眼睇兼有數得計。礦業公司最難搞,你都唔知個礦係咪真係佢嘅,同埋一日出產幾多礦,好難查。」

黃國英押注「梁營」股

豐盛金融資產管理董事黃國英指港股「能見度」低,大市能否扭轉劣勢,視乎希臘的情況,「最驚係萬一希臘脫歐,以後歐洲國家出事都要自己執生,無人『照』住,引來信貸緊縮。不過今年係美國大選年,歐洲爆鑊,奧巴馬瓜得啦!希臘六月中選舉,七月頭歐債不明朗因素可望解決。」黃國英指淡市會維持多半個月,港股下半年有機會重上二萬二千點,可等大市轉勢再入市,「金、油、銅等資產會升先,然後到大市,留意有冇好消息,扭轉市場悲觀情緒。」

中資股上位

黃國英指今年大市波動,揀股應選上半年的強勢股,如恒安(1044)、中移動(941)、太古地產(1972)等,貪其穩陣。梁振英政府七月上台,黃國英認為另一隻強勢股中銀香港(2388)最能受惠香港「變天」,「中銀香港出咗業績後,股價一度升到二十四蚊高位,十分硬淨,買咗都唔擔心,起碼有息收,好過你買滙豐(5)、內銀股啦。」梁振英「低票」當選,中銀香港反而因「禍」得福,「因為梁振英民望唔高,中央想幫一幫佢,所有利好香港嘅財金政策,好似早前嘅RQFII,好多時都會經中銀香港去執行。九七時英資退華資上,依家係華資退中資上嘅時代。」另外,黃國英亦睇好另一隻「梁營股」嘉華國際(173)。「政府想地產界營造一個更公平的競爭平台,所以香港大型地產商將會面對來自本地中型地產商,以及大陸發展商的威脅,如中國海外(688)。如果中央要將以前四大地產商嘅餅仔重新分配過,專攻豪宅嘅嘉華好大機會分到一份,佢市值唔夠一百億,變二、三百億唔算過分,值得搏。」另邊廂,黃國英續稱,嘉華與中央關係密切亦是跑出的原因,「九九年澳門開放賭牌,佢係唯一一個香港發展商拎到賭牌,證明佢同中央嘅關係好好。」黃國英指,嘉華公布業績後,股價在二點八元至三點四元浮動,「好多友都係呢兩個價位之間建倉,二點八元是不錯的支持位。」

植耀輝冷敲熱捧

今年初,耀才證券市場研究部副經理植耀輝推介恒安及中移動,兩者在跌市中表現硬淨,前者更一度創新高,到近月才回軟。下半年,植耀輝認為仍屬波動市,但睇得較樂觀,「假如希臘脫歐,歐央行一定會重招救市,大市會跌得好急,然後起得好快。相反,希臘唔脫歐,局勢緩和番,大市唔難彈返去上半年二萬一千點高位。」植耀輝補充,中央放水是港股上升的動力,「中國經濟數據,不論係新增貸款、又或出口都好差,中央失咗預算,下半年會再出招,如減息。」

中移動破一百大關

植耀輝下半年仍然睇好中移動,認為其業務穩健。「依家個價屬合理水平,派息三、四釐,六十八蚊嘅價位基本上唔會穿,年底我睇一百元。」植耀輝認為大陸3G市場會加速發展,「按過往經驗,一個地區3G佔手機使用率達一成至兩成,上客量就會高速增長,內地依家係一成五。」植耀輝認為,4G仍在概念階段,反而中移動六億客戶中,農村客戶比例較多,有望成為增長火車頭,「中移動依家ARPU係四十蚊,再跌空間有限,以前3G手機好貴,依家平咗好多,可以吸引農村客轉用3G。」另外,喜歡研究冷門股的植耀輝亦推介中國玉米油(1006),「大陸每年消耗二千五百萬噸食油,玉米油只佔一百萬噸。玉米油價格較貴,但內地人收入多咗,開始注重健康。公司PE得十倍,估值唔高,又揸住四億淨現金,較穩健。」另邊廂,中國玉米油旗下品牌「長壽花」有望成為國內玉米油國家標準,「長壽花喺內地比較知名,質量上較有保證,食品安全好緊要,內地打算對食用油嘅監管定出標準,長壽花有機會成為國家標準。」另外,植耀輝指集團把業務重心放在發展自家品牌的玉米油,產品的平均售價較非品牌高約四成,有助提升毛利率。

迴避版塊

版塊銀行股睇淡原因蘇俊祺︰我哋估計嚟緊內地減息係不對稱減息,即係唔減存款利率,減貸款利率,息差收窄。事關之前溫總理講銀行盈利太好,可能要回饋番社會,有機會再減息。喺一個放水嘅情況下,內銀股都會升,但係跑輸大市。同埋,經濟轉差,不良貸款可能增加,影響佢哋嘅盈利能力。版塊「大陸土炮」品牌股睇淡原因黃國英︰大陸土炮品牌風險太高,一定要好精選,唔好「集郵」,買中一隻可以贏好多,好似當年嘅康師傅(322)、恒安、維達(3331),但係一輸就仆直,例如博士蛙(1698)、碧生源(926),變數好大!其中,內地體育用品股、時裝股就唔好買,大陸做品牌好似打緊世界盃,有好多外國品牌同佢哋競爭,好難跑出。版塊航運股睇淡原因植耀輝︰呢個版塊面對運力過剩問題,經濟咁差仲要加運費意味成本上升,唔加價會蝕錢。○八年海嘯後,好多航運公司見市道轉好,落咗單買船,呢幾年開始付運,但係全球運力需求量只係增加咗百分之六、七,除非經濟比預期增長快,航運股要避免,特別係做集裝箱生意

PermaLink: https://articles.zkiz.com/?id=34486

樂視獨家播世盃稱作價好平 TVB隨時無得播

1 : GS(14)@2016-01-15 16:38:01

■2018世界盃將於俄羅斯舉行,圖為早前外圍賽巴西對阿根廷。資料圖片


【本報訊】中國公司樂視繼續「土豪」,繼先聲奪人取得未來三年播放英超賽事後,再奪得2018年俄羅斯世界盃的獨家播放權!樂視體育香港行政總裁程益中表示,公司已取得世界盃外圍賽及決賽周的香港獨家播放權,但未有披露作價,僅稱「好平」,目前仍未決定如何收費。由於國際足協規定必須分享部份賽事免費播放,但電訊盈科(008)的viuTV即將開台,TVB隨時無得播世界盃賽事。記者:胡仲邦 石永樂樂視香港再確認,2016至2018年FIFA(國際足協)所有賽事,包括2018年俄羅斯世界盃的香港地區全媒體播出版權,都屬於LeSports(樂視體育)。翻查資料,FIFA舉辦的賽事除世界盃外,亦包括世界冠軍球會盃、奧運足球比賽及女子世界盃等賽事,意味這些大型賽事亦有機會在樂視平台播放。然而,較受歡迎的世界盃外圍賽則未有機會透過樂視收看。因有線寬頻(1097)早於2014年已取得世界盃歐洲區外圍賽獨家播放權,有線發言人強調,會繼續播放該賽事。


■樂視體育香港行政總裁程益中稱分享播放權問題仍磋商中。

收費方式未決定

樂視未取得免費電視牌,故於俄羅斯世界盃決賽周期間,必須向免費電視台提供部份賽事。如上屆世界盃決賽周,獨播權持有人必須在本地提供至少22場免費賽事。然而兩年後至少有viuTV、香港電台及TVB三個免費電視台,故播放上屆巴西世界盃賽事的TVB,屆時有機會被其他對手搶走播放權。程益中強調,分享播放權問題仍有待與免費電視台磋商,收費方式亦未有決定。有業界人士指,早前代表國際足協的代理來港,並約見多個電視平台,當中包括投得2014年巴西世界盃播放權的TVB。如今樂視確認獲得獨家播映權,他相信與早前投得英超一樣,樂視出價遠離對手。之前TVB高層李寶安表示,2014年巴西世界盃獨家播放權連同製作費約4億元,業界人士指,當年的播放權費僅約3至3.2億元,估計樂視今次的出價逾4億元。他又指,相對上屆巴西的南美時區,俄羅斯屬於歐洲時區,平均較香港慢約3至6小時,預期屆時主要賽事將集中於香港晚上9點至凌晨時段舉行,對香港市民來說屬於「靚時段」。事實上,樂視去年已大肆進軍香港,更有傳以47億元天價取得未來3年的英超播放權。程益中表示,未來英超賽事可作4K、3D及虛擬實境(VR)方式在香港播放,又指公司正商討取得美國職業籃球(NBA)賽事在香港的播放權。有樂視員工指,公司已覓得地方建設製作場地,自行製作體育節目,亦考慮贊助部份本地賽事。





來源: http://hk.apple.nextmedia.com/news/art/20160115/19452881
PermaLink: https://articles.zkiz.com/?id=294196

Next Page

ZKIZ Archives @ 2019